ހަވާލުކުރިތާ 7 މަސް ފަހުން ފެށި އައްޑޫ ލިންކް ރޯޑް މަޝްރޫއު އާ ގުޅޭ ސުވާލަށް މިނިސްޓަރަށް ޖަވާބެއް ނުދެއްވުނު
އައްޑޫ ލިންކް ރޯޑް ތަރައްގީކުރުމުގެ މަޝްރޫއު ނިމޭނެ ސީދާ ތާރީޚެއް ވިދާޅުވާން އިންފްރާސްޓްރަކްޗަރ މިނިސްޓަރު ޑރ. މުއްތަލިބަށް މަޖިލީހުގައި މިއަދު ދަތިފުޅުވި. މަސައްކަތް ލަސްވާތީ މެންބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރު ވިދާޅުވީ، މަގު ހެދުމުގައި ދިމާވާ ދަތިތަކާއެކުވެސް މަޝްރޫއު އަވަސްކުރުމަށް މަސައްކަތް ކުރައްވާނެ ކަމަށް. މި މަޝްރޫއުގެ ދަށުން 12.3 ކިލޯމީޓަރުގެ ސަރަހައްދެއް ފުޅާކޮށް ތަރައްގީކުރުމަށް ވަނީ ހަމަޖެހިފަ.
އިންފްރާސްޓްރަކްޗަރ މިނިސްޓަރ ޑރ. އަބްދުﷲ މުއްތަލިބް ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި | ރައްޔިތުންގެ މަޖިލިސް
މިދިޔަ 2025 ވަނަ އަހަރުގެ އެޕްރީލް 8 ވަނަ ދުވަހު ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއި ހަވާލުކުރި އައްޑޫ ލިންކް ރޯޑު ޒަމާނީ ފެންވަރަށް ތަރައްގީ ކުރުމުގެ މަސައްކަތް އޭގެ 7 މަސް ފަހުން ނޮވެމްބަރުގައި ފަށާފައިވާ ކަމަށް އިއުލާނު ކުރުމަށް ފަހު އޭގެ އިތުރު 8 މަސް ފަހުން އެކަމާ ގުޅޭ ސުވާލު ކުރުމުން ވެސް އިންފްރާސްޓްރަކްޗަރ މިނިސްޓަރ ޑރ. އަބްދުﷲ މުއްތަލިބަށް ޖަވާބެއް ނުދެއްވުނެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ހިތަދޫ މެދު ދާއިރާގެ މެންބަރު އަހްމަދު އަޒާން މަރުޒޫގު ވަނީ އައްޑޫ ލިންކްރޯޑްގެ މަސައްކަތް އަދިވެސް ނުނިމޭތީ އެކަމާ ގުޅޭގޮތުން ސުވާލު ކުރައްވާފަ އެވެ.
އެ ސުވާލަށް ސީދާ ޖަވާބެއް ނުދެއްވާ މިނިސްޓަރު މުއްތަލިބު ވަނީ އެކަމުގައި ހުރި އުނދަގޫތަކުގެ ވާހަކަ ދައްކަވާފަ އެވެ. އަދި މަސައްކަތް ނިމޭނެ ސީދާ ތާރީޚެއް ވެސް މިނިސްޓަރަކަށް ވިދާޅެއް ނުވެވުނެވެ.
ވަރަށް ކާރޫބާރޫ ބޮޑު އެހެން ޑައިވަރޝަން މަގެއް ނެތް ތަނެއް ލިންކްރޯޑަކީ. އެހެންވީމަ އަޅުގަނޑުމެން އެ މަގު ހަދާއިރު ވިސްނާލަން ޖެހޭނެ އެއްފަޅީގައި ހަދާފަ ހުޅުވާފަ އަނެއް ފަރާތް ހެދުމުގެ މަސައްކަތް ކުރަން. އެހެންވީމާ އެގޮތުން ފުޅާ ކުރުމަށް ސާފު ކުރަން ޖެހޭ ބައި ސާފު ކުރުމަށްފަހުގައި ސައިޑް ވޯކް ހެދުމެއް ނޫން. ފުރަތަމަ އެންމެ އިސްކަމެއް ދޭނީ ކެރިއޭޖް މަސައްކަތް ކުރުމަށްޓަކައި. އިއްޔެ ވެސް ރައީސް، އައްޑޫގެ ލިންކް ރޯޑްގެ ވާހަކަ، އާރްޑީސީ އެމްޑީ ވެސް އިންވައިގެން އަޅުގަނޑުމެން އެވާހަކަ ދެއްކިން. އައްޑޫ ލިންކްރޯޑްގެ މަސައްކަތަކީ އަޅުގަނޑުމެން ވަރަށް އިސްކަމެއް ދީގެން ހިންގާ މަޝްރޫއެއް.އިންފްރާސްޓްރަކްޗަރ މިނިސްޓަރ ޑރ. އަބްދުﷲ މުއްތަލިބް
އެކަމުގެ އެންމެ ފަހުގެ މައުލޫމާތު ވެސް މިނިސްޓަރު ދެއްވާފައި ނުވާއިރު އެ މަސައްކަތް އަވަސްކޮށްގެން ގެންދިއުމަށް މަސައްކަތް ކުރައްވާނެ ކަމަށް މިނިސްޓަރު މުއްތަލިބު ވިދާޅުވި އެވެ.
އައްޑޫ ލިންކް ރޯޑުގެ އަމަލީ މަސައްކަތް 2024 ވަނަ އަހަރުގެ ތެރޭގައި ފަށާނެކަމުގެ ޔަގީންކަން ހައުސިން މިނިސްޓަރު ޑރ. އަބްދުﷲ މުއްތަލިބު ދެއްވާފައިވާއިރު 2 އަހަރު ފާއިތުވެގެން ދިޔައިރު ވެސް މަގުގެ އަމަލީ އެއްވެސް މަސައްކަތެއް ކޮށްފައި ނުވެ އެވެ.
މިކަމާ ގުޅިގެން ރައްޔިތުންގެ މަޖިލީހުގައި އެތައް ފަހަރެއްގެ މަތިން މިނިސްޓަރު މުއްތަލިބާ އެ ސުވާލު ކުރެވުނު ނަމަވެސް މިނިސްޓަރު އެ ސުވާލަށް ސީދާ ޖަވާބެއް ދެއްވާފައެއް ނުވެ އެވެ. އެކިފަހަރުމަތިން ތަކުރާރުކޮށް އެ ސުވާލު މެންބަރުން ކުރެއްވި އިރު މިނިސްޓަރު ވިދާޅުވީ ވަރަށް އަވަހަށް އެކަމުގެ އަމަލީ މަސައްކަތް ފެށޭނެ ކަމަށެވެ.
މި މަސައްކަތް ނުފަށާ އެތައް ދުވަހެއް ފާއިތުވެފައިވާއިރު ލިންކު ރޯޑް ހެދުމުގެ މަޝްރޫޢުގެ ދަށުން މަގު ފުޅާކޮށް އިތުރު ލޭންތައް ހެދުމަށް އެ މަގުގައި ހުރި ގަސްތައް އެހެން ސަރަހައްދު ތަކަށް ބަދަލުކޮށް ސާފު ކުރުމުގެ މަސައްކަތް މިހާރު ފަށާފައިވާ ކަމަށް އެ ކުންފުނިން ވަނީ ބުނެފަ އެވެ. އަދި މަޝްރޫއަށް ބޭނުންވާ ސާމާނު ވެސް މިހާރު ގެންގޮސްފައިވާ ކަމަށް އާރްޑީސީ ވަނީ އިން ދައުލަތުގެ މީޑިއާގައި ބުނެފަ އެވެ.
ލިންކް ރޯޑުގެ މަޝްރޫއު ދަށުން ޖުމްލަ 12.3 ކިލޯމީޓަރުގެ ސަރަހައްދެއް ހެދުމަށް ވަނީ ހަމަޖެހިފައެވެ. އަދި އައްޑޫގެ މަގު ހެދުމުގެ މަޝްރޫއުގެ ތެރެއިން ސީޓީބީ އަޅާފައިވާ މަގުތަކުގައި ތާރު އެޅުމުގެ މަސައްކަތް ވެސް މި މަސައްކަތުގެ ދަށުން ކުރިއަށް ގެންދާނެ އެވެ. އެގޮތުން 67.58 ކިލޯމީޓަރުގައި ތާރު އަޅާނެ އެވެ.
2028 ގެ ކުރިން، މި މަޝްރޫއު ނިންމަން އަމާޒު ހިފާފައިވާއިރު، ފާއިތުވި ދުވަސްތަކުގައި މިމަގު ބޭނުން ކުރާ ފަރާތްތަކަށް ބޮޑެތި ދަތިތަކާއި ވަނީ ކުރިމަތިވެފަ އެވެ.
އައްޑޫ ލިންކް ރޯޑަކީ 2003 ގައި ބޭނުން ކުރަން ފެށި މަގެކެވެ.
