ދިވެހިބަހުގެ ކޮންމެ ބަހުރުވަޔަކުން މުޚާޠަބު ކުރެއްވިޔަސް ވަޒީރުން ޖަވާބުދާރީ ވާންޖެހޭނެ: ޝާހިދު
ރައްޔިތުންގެ މަޖިލީހުގައި މެންބަރަކު އައްޑޫ ބަހުރުވައިން ކުރެއްވި ސުވާލަށް، ބަހުރުވަ އެނގިވަޑައިނުގަންނަވާ ކަމަށް ވިދާޅުވެ ހެލްތު މިނިސްޓަރު ޖަވާބު ނުދެއްވި މައްސަލައިގައި އިދިކޮޅު އެމްޑީޕީގެ ރައީސް އަބްދުﷲ ޝާހިދު ފާޑުވިދާޅުވެއްޖެ. ޝާހިދު ވިދާޅުވީ ދިވެހިބަހުގެ ކޮންމެ ބަހުރުވަޔަކުން މުޚާޠަބު ކުރެއްވި ނަމަވެސް ސަރުކާރުގެ އިސްވެރިން ރައްޔިތުންނަށް ޖަވާބުދާރީވާން ޖެހޭނެ ކަމަށާއި، ބަހުރުވައަށް މަލާމާތް ކުރުމަކީ ބަލައިގަނެވޭނެ ކަމެއް ނޫން ކަމަށް. މި މައްސަލަ ފެންމަތިވީ އައްޑޫ އިކުއެޓޯރިއަލް ހޮސްޕިޓަލުގެ ޚިދުމަތްތަކާ ގުޅޭގޮތުން ހިތަދޫ އުތުރު ދާއިރާގެ މެންބަރު ކުރެއްވި ސުވާލުތަކަށް މިނިސްޓަރު ދެއްވި ޖަވާބާ ގުޅިގެން.
އެމްޑީޕީގެ ރައީސް އަބްދުﷲ ޝާހިދު | ރާއްޖެ އެމްވީ
ދިވެހިބަހުގެ ކޮންމެ ބަހުރުވަޔަކުން މުޚާޠަބު ކުރެއްވި ނަމަވެސް، ސަރުކާރުގެ މުއައްސަސާތަކުގެ އިސްވެރިން ރައްޔިތުންނަށް ޖަވާބުދާރީވާން ޖެހޭނެ ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ، ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އަބްދުﷲ ސޯދިގު (ސޯބެ) އައްޑޫ ބަހުރުވައިން ކުރެއްވި ސުވާލަކަށް، އެ ބަހުރުވަ އެނގިވަޑައިނުގަންނަވާ ކަމަށް ވިދާޅުވެ ހެލްތު މިނިސްޓަރު ގީލާ އަލީ ޖަވާބު ނުދެއްވި މައްސަލައާ ގުޅިގެންނެވެ.
މީސްމީޑިއާގައި ކުރެއްވި ޕޯސްޓެއްގައި ޝާހިދު ވިދާޅުވީ އައްޑޫ ބަހުރުވަ އަކީވެސް ދިވެހި ބަސް ކަމަށެވެ. ސަރުކާރުގެ މުއައްސަސާތަކުގެ އިސްވެރިން ކޮންމެ ރަށަކަށް ނިސްބަތް ވިޔަސް، ދިވެހިބަހުގެ ކޮންމެ ބަހުރުވަޔަކުން މުޚާޠަބު ކުރެއްވިޔަސް ޖަވާބުދާރީ ވާންޖެހޭނެ ކަމަށް އޭނާ ފާހަގަކުރެއްވި އެވެ.
މަޖިލީހުގެ މެންބަރަކު އައްޑޫ ބަހުން ސުވާލު ކުރެއްވުމުން އެއީ މަޖާ ކަމަކަށް ހައްދަވައި، މެންބަރަށް ރައްދުވާ ގޮތަށް ދެއްވި ޖަވާބަކީ އައްޑޫގެ ހުރިހާ ރައްޔިތުންނަށް ކުރެއްވި މަލާމާތެއްގެ ގޮތުގައި ޝާހިދު ސިފަކުރެއްވި އެވެ. އަދި އެފަދަ ގޮތަކަށް އަމަލު ނުކުރެއްވުމަށް ވެސް އޭނާ ވަނީ ސަރުކާރުގެ އިސްވެރިންނަށް ގޮވާލައްވާފަ އެވެ.
މި މައްސަލަ ފެންމަތިވީ މަޖިލީހުގެ ހިތަދޫ އުތުރު ދާއިރާގެ މެންބަރު އަބްދުﷲ ސޯދިގު (ސޯބެ)، އައްޑޫ ބަހުރުވައިން ހެލްތު މިނިސްޓަރާ ސުވާލު ކުރެއްވުމުންނެވެ. ސޯބެ ސުވާލު ކުރެއްވީ އައްޑޫ އިކުއެޓޯރިއަލް ހޮސްޕިޓަލް (އޭއީއެޗް) އިން ނަފްސާނީ ބައްޔަށް ބޭސްކުރާ މީހުންނަށް ބޭހާއި އިންޖެކްޝަން ނުލިބޭތީ އެކަމަށް އޮތް ހައްލަކީ ކޮބައިތޯ އާއި، ހޮސްޕިޓަލުގައި ބޭސް ހުރިކަން ކަށަވަރު ކުރަން މިނިސްޓްރީން ކުރާ މަސައްކަތްތަކާ ގުޅޭގޮތުންނެވެ. މީގެ އިތުރުން އޭއީއެޗްގެ އައު އިމާރާތުގެ މަސައްކަތް ފެށޭނެ ތާރީޚަކާ ގުޅޭގޮތުން ވެސް އޭނާ ސުވާލު ކުރެއްވި އެވެ.
އައްޑޫ އޭއީއެޗް ހޮސްޕިޓަލުން ނަފްސާނީ ބަލިއަށް ބޭސްކެރާ ފަރާއްތަކަށް ބޭހާއި އިންޖިކްޝަން ނިލިބޭ ޝަކުވާ ވަރަށް ގިނައިން ލިބެއި އަފިންނަށް. މިކަމަށް އޮތް ހައްލަކީ ކޮބައިތޯ؟ މިނިސްޓްރީން މިކަން ޔަގީންކެރާއް ހޮސްޕިޓަލި ބޭހާއި އިންޖިކްޝަން ތިބިތޯ ޔަގީންކެރާއް ހޮސްޕިޓަލާއި އެއްކޮށް ކެރާ މަސައްކަތަކީ ކޮބާތޯ؟، ދެވަނަ ސުވާލަކީ ހޮސްޕިޓަލުގެ، އޭއީއެޗްގެ ދަތިކަން ވަރަށް ބޮޑަ. އެތަނި އެޑާ އޮށް އައު އިމާރާތުގެ މަސައްކަތް ފެށޭނެއި ކޮން ހިސާބަކިތޯ. ޝުކުރިއްޔާރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އަބްދުﷲ ސޯދިގު (ސޯބެ)، މިނިސްޓަރ ގީލާ އާ ކުރެއްވި ސުވާލު
ނަމަވެސް މިނިސްޓަރު ވިދާޅުވީ އައްޑޫ ބަހުރުވައިން ކުރެއްވި ސުވާލު ދޭހަނުވި ކަމަށާއި، އޭނާއަކީ އައްޑޫ މީހަކަށް ނުވާތީ އެ ބަހުރުވަ ނޭނގޭ ކަމަށެވެ. މިނިސްޓަރުގެ މި ޖަވާބާ ގުޅިގެން އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެ ފައެވެ. އެހެންނަމަވެސް، ސޯބެ ކުރެއްވި އެއް ސުވާލަށް ޖަވާބު ދެއްވަމުން މިނިސްޓަރު ވަނީ އޭއީއެޗްގެ މަސައްކަތް އަންނަ އޯގަސްޓް މަހުގެ ތެރޭގައި ފެށޭނެ ކަމަށް ވިދާޅުވެފަ އެވެ.
މި މައްސަލައިގައި ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފަ އެވެ. ޚާއްޞަކޮށް ރައްޔިތުންގެ މަޖިލީހަކީ ހުރިހާ ދާއިރާއެއްގެ ރައްޔިތުންގެ ބަސް އިއްވާ ތަނަކަށް ވާއިރު، ބަހުރުވަޔަށް އިޙްތިރާމް ކުރުމުގެ މުހިންމުކަން ގިނަ ބަޔަކު ދަނީ ފާހަގަކުރަމުންނެވެ.
