އިންޑޮނޭޝިއާގެ ފެރީއެއް ގެއްލުނު ހާދިސާގައި 102 މީހުން ސަލާމަތްކޮށްފި، އެކަކު މަރު

އިންޑޮނޭޝިއާގެ ޖާވާ ކަނޑުން ގެއްލުނު ފެރީއަކުން 102 މީހުން ސަލާމަތްކޮށް، އެކަކު މަރުވެފައިވާކަމަށް އެ ގައުމުގެ އޮފިޝަލުން ހާމަކޮށްފި އެވެ.

އިންޑޮނޭޝިއާގެ ސާޗް އެންޑް ރެސްކިއު އެޖެންސީން ބުނީ، ޖުމްލަ 243 މީހުންނާއެކު ދަތުރުކުރި "ވާގޯ ޓްރާންސްޕޯޓް 8" ނަމަކަށް ކިޔާ މި އުޅަނދާ ގުޅުން ކެނޑުނީ މޫސުން ގޯސްވުމުގެ ސަބަބުން ކަމަށެވެ. މި ހާދިސާއާ ގުޅިގެން އެ އުޅަނދު ހޯދުމުގެ ބޮޑު އޮޕަރޭޝަނެއް ވަނީ ފަށާފަ އެވެ.

Advertisement

މި ހާދިސާގައި ގެއްލުނު އިތުރު މީހުން ހޯދުމުގެ މަސައްކަތް މިހާރުވެސް ދަނީ މެދުކެނޑުމެއް ނެތި ކުރަމުންނެވެ.

ސުރަބާޔާ އިން ފުރައިގެން ދެކުނު ކަލިމަންޓަންގެ ބަންޖަރުމާސިން ސިޓީއަށް ދަތުރުކުރި މި ފެރީއާ އެންމެ ފަހުން ގުޅިފައިވަނީ އާދީއްތަ ދުވަހުގެ ފަތިހު، އެ ގައުމުގެ ގަޑިން 02:00 ހާއިރު އެވެ. އެ ވަގުތު ފެރީ އޮތީ ބަންޖަރުމާސިންގެ ދެކުނުން ގާތްގަނޑަކަށް 150 ކިލޯމީޓަރު ބޭރުގަ އެވެ.

މި ހާދިސާ ހިނގި ސަރަހައްދުގައި ސާޗް އެންޑް ރެސްކިއު އުޅަނދުތަކާއި ހެލިކޮޕްޓަރެއް ދަނީ ހަރަކާތްތެރިވަމުންނެވެ. މީގެ އިތުރުން، ޖާވާ ކަނޑުގެ އެ ސަރަހައްދުން ދަތުރުކުރާ އެހެން ހުރިހާ އުޅަނދުތަކަކުންވެސް ގެއްލުނު މީހުންނާ ބެހޭ އެއްވެސް ނިޝާނެއް ފެނޭތޯ ބަލައި، އެފަދަ މައުލޫމާތެއް ލިބިއްޖެނަމަ އެކަން ރިޕޯޓްކުރުމަށް ވަނީ އަންގާފަ އެވެ.

މި ހާދިސާ ހިނގާފައި މިވަނީ، މިދިޔަ މަހު އިންޑޮނޭޝިއާގެ މަދޫރާ ރަށުގެ ކައިރިން ދަތުރުކުރި އެހެން ފެރީއެއްގައި އަލިފާން ރޯވެ، ފަސް މީހުން މަރުވެފައިވަނިކޮށެވެ.

17،000 އަށްވުރެ ގިނަ ރަށްތަކުގެ މައްޗަށް އެކުލެވޭ އިންޑޮނޭޝިއާގައި އެއް ރަށުން އަނެއް ރަށަށް ދަތުރުފަތުރު ކުރުމަށް އާންމުކޮށް ބޭނުންކުރަނީ ފެރީ އެވެ.