އިންޑޮނޭޝިއާއަށް އައި ބިންހެލުމުގައި މަރުވި މީހުންގެ އަދަދު 47 އަށް، ބޮޑެތި ގެއްލުންތަކެއް!

އިންޑޮނޭޝިއާގެ ފްލޯރެސް އައިލެންޑަށް އައި ބާރުގަދަ ބިންހެލުމަކާ ގުޅިގެން ކުއްލި ހާލަތުގައި މީހުން ސަލާމަތް ކުރުމުގެ މަސައްކަތް ރެސްކިއު ޓީމުތަކުން ފަށައިފި އެވެ.

ރިކްޓަރ މިންގަނޑުން 7.7 ގެ ބާރުމިނުގައި އައި މި ބިންހެލުމުގައި މިހާތަނަށް މަދުވެގެން 47 މީހުން މަރުވެފައިވާ ކަމަށް ވަނީ ކަށަވަރުވެފައި އެވެ. އިންޑޮނޭޝިއާގެ މީޓިއޮރޮލޮޖީ އެންޑް ޖިއޯފިޒިކްސް އެޖެންސީ އިން ބުނި ގޮތުގައި، މި ބިންހެލުން އައިސްފައިވަނީ ހޮނިހިރު ދުވަހުގެ ފަތިހު 05:00 ހާއިރު ބިމުގެ 15 ކިލޯމީޓަރު އަޑިއަށެވެ.

އިންޑޮނޭޝިއާގެ ނޭޝަނަލް ޑިޒާސްޓަރ މެނޭޖްމަންޓް އެޖެންސީ (ބީއެންޕީބީ) އިން ހާމަކޮށްފައިވާ ގޮތުގައި، މި ބިންހެލުމާއި އޭގެ ފަހުން އައި 341 އާފްޓަރ ޝޮކްތަކުގެ ސަބަބުން 900 އަށް ވުރެ ގިނަ ގެދޮރާއި، އެތައް ސަތޭކަ އިމާރާތަކަށް ވަނީ ބޮޑެތި ގެއްލުންތަކެއް ލިބިފައި އެވެ. މި ހާދިސާގައި ލިބުނު ގެއްލުންތަކުގެ ފުރިހަމަ ތަފްސީލު އަދި ސާފު ނުވާއިރު، އިންޑޮނޭޝިއާގެ އަނެއްކޮޅަށް 6.9 ގެ ބާރުމިނުގައި އައި ދެވަނަ ބިންހެލުމަކާ އެކު، އެ ސަރަހައްދަކީ ބިންހެލުންތަކާއި އަލިފާން ފަރުބަދަ ގޮވުމުގެ ނުރައްކާ ބޮޑު "ރިންގް އޮފް ފަޔަރ" ގައި ހިމެނޭ ސަރަހައްދެއްކަން ވަނީ އަނެއްކާ ވެސް ހަނދާން ކޮށްދީފައި އެވެ.

ބިންހެލުމުގެ ލޮޅުންތައް ހުޅަނގުން ބީމާ ސަރަހައްދާ ހަމައަށް އިހުސާސް ކުރެވުނު ނަމަވެސް، އެންމެ ބޮޑު ގެއްލުމެއް ލިބުނީ މަންގަރާއީ ޕްރޮވިންސް އަށެވެ. ވަގުތީ ތަފްސީލުތަކަށް ބަލާއިރު އެ ސަރަހައްދުން 24 މީހަކު މަރުވެފައިވާއިރު، އީސްޓް މަންގަރާއީ އިން 17 މީހުން، ސިއްކަ ޕްރޮވިންސުން ތިން މީހުން އަދި އެންގާޑާ، އެންޑޭ އަދި ވެސްޓް މަންގަރާއީން އިން ކުރެ ކޮންމެ ސަރަހައްދަކުން އެކަކު ވަނީ މަރުވެފައި އެވެ. މީގެ އިތުރުން ދެ މީހަކަށް ސީރިއަސް އަނިޔާތަކެއް ލިބިފައިވާއިރު، 11 މީހަކަށް ކުދި އަނިޔާތައް ލިބިފައިވާ ކަމަށް ރިޕޯޓުތައް ބުނެ އެވެ.

ބީއެންޕީބީ އިން ބުނީ 5،000 އަށް ވުރެ ގިނަ މީހުން މިހާރު ވެސް ވަގުތީ ހިޔާވަހިކަމުގައި ތިބި ކަމަށާއި، އެ ސަރަހައްދުތަކަށް 10،500 އެހީގެ ޕެކޭޖު ފޮނުވާފައިވާ ކަމަށެވެ. ކާރިސާގެ ވަގުތުގައި އެންމެ އިސްކަމެއް ދެނީ ހާލުގައި ޖެހިފައިވާ މީހުންގެ އަސާސީ ބޭނުންތައް ފުއްދައި ދިނުމަށް ކަމަށް އެ އެޖެންސީ އިން ބުނެ އެވެ. ފްލޯރެސްގެ އެންމެ ބޮޑު ރަށް ކަމަށްވާ މައުމެރޭގެ ބަނދަރުގައި ހުރި ޓާމިނަލް އިމާރާތުން ބޮޑެތި ކޮންކްރީޓް ގަނޑުތައް ފެރީ އަށް އަރަން ތިބި މީހުންގެ ގަޔަށް ވެއްޓޭ މަންޒަރު ފެންނަ ވީޑިއޯތައް ވަނީ އާންމުވެފައި އެވެ. އަދި ބައެއް މީހުން ކަނޑަށް ވެއްޓުނީ ފެރީ އަށް އަރަން އޮތް ސިޑި ކަހާލުމުގެ ސަބަބުންނެވެ.

އީސްޓް ނޫސާ ތެންގާރާ ޕްރޮވިންސްގެ ގަވަރުނަރު އެމަނުއަލް މެލްކިއަޑޭސް ލަކަ ލޭނާ ވިދާޅުވީ، މަރުވި މީހުންގެ ތެރެއިން ގިނަ މީހުން މަރުވީ ނިދާފައި ތިއްބާ އިމާރާތްތައް ބޯމައްޗަށް ވެއްޓުމުގެ ސަބަބުން ކަމަށެވެ. ބިންހެލުމާ ގުޅިގެން ސުނާމީގެ އިންޒާރު ކުރިން ނެރުނު ނަމަވެސް، ކަނޑުގެ ލޮނުގަނޑަށް ބޮޑު ބަދަލެއް ނައުމުން، ތިން ގަޑިއިރު ފަހުން އެ އިންޒާރު ވަނީ އުވާލާފައި އެވެ. ނަމަވެސް ބިންގަނޑު ކަނޑައިގެން ދިޔުމުގެ ސަބަބުން ބައެއް އަވަށްތަކަށް ދާން އޮތް މަގުތައް ބަންދުވެފައިވާއިރު، ރެސްކިއު ޓީމުތަކުން ދަނީ އިމާރާތްތަކުގެ ދަށުގައި ތާށިވެފައިވާ މީހުން ސަލާމަތް ކުރުމަށް މެދުކެނޑުމެއް ނެތި މަސައްކަތް ކުރަމުންނެވެ.

އިންޑޮނޭޝިއާ އަކީ ދުނިޔޭގެ ތިން ޓެކްޓޯނިކް ޕްލޭޓެއް ބައްދަލުވާ ސަރަހައްދެއްގައި އޮންނަ ޤައުމަކަށް ވުމުން، އެ ޤައުމަކީ އަބަދުވެސް ބިންހެލުމާއި އަލިފާން ފަރުބަދަ ގޮވުމުގެ ނުރައްކާ އިންތިހާ އަށް އޮންނަ ޤައުމެކެވެ. ބީއެންޕީބީ އިން ވަނީ އާންމުން ހާސް ނުވުމަށާއި، އައްސޭރިފަށުގެ ސަރަހައްދުތަކާއި ގެއްލުން ލިބިފައިވާ އިމާރާތްތަކާ ދުރުގައި ތިބުމަށް އިލްތިމާސްކޮށްފައި އެވެ.