ވ.ފުލިދޫ ކަނޑަށް މުދާ އުފުލާ ބޯޓެއް އަޑިޔަށް ހިނގައްޖެ
9 ޖުލައި 2026 | ބުރާސްފަތި 13:49މި ބޯޓު އަޑިޔަށް ދާ ކަމުގެ މައުލޫމާތު ފުލުހުންނަށް ލިބިފައި ވަނީ ބުރާސްފަތި ދުވަހުގެ ހަވީރު 15:26 ހާއިރު ކަމަށް.
ޖަޒީރާ Q-10 ބޯޓު އަޑިޔަށްދާ މަންޒަރު. | ސޯޝަލް މީޑިއާ
މާލެ އިން ފުރައިގެން ގދ.ތިނަދޫ އަށް ދަތުރު ކުރަމުން ދިޔަ "ޖަޒީރާ" ނަމަކަށް ކިޔާ ބޯޓެއް، ވ.ފުލިދޫ ހުޅަނގުގެ ކަނޑަށް އަޑިޔަށް ހިނގައްޖެ އެވެ.
ދިވެހި ފުލުހުންގެ ޚިދުމަތުގެ ފަރާތުން މީޑިއާ ތަކަށް ފޮނުވި މެސެޖުގައި ބުނެފައި ވަނީ، މި ބޯޓު އަޑިޔަށް ދާ ކަމުގެ މައުލޫމާތު ފުލުހުންނަށް ލިބިފައި ވަނީ ބުރާސްފަތި ދުވަހުގެ ހަވީރު 15:26 ހާއިރު ކަމަށެވެ.
މީގެ އިތުރުން އެމްއެންޑީއެފް އިން ބުނެފައި ވަނީ މި ބޯޑު އަޑިއަށް ދާ ކަމުގެ މައުލޫމާތު އެ އިދާރާ އަށް ވެސް ލިބިފައިވާ ކަމަށާއި، އެ ބޯޑު އަޑިޔަށް ދަނީ ފުލީދުގެ 5 ނޯޓިކަލް މޭލި ބޭރުން ކަމަށެވެ. އަދި އެމްއެންޑީއެފް މާލެ އޭރިޔާ ކޮމާާންޑް އާއި، ކޯސްޓްގާޑް ސެކަންޓް ސްކޮޑްރަންގެ އުޅަނދެއް އެ ސަރަހައްދަށް ދަތުރު ކުރަމުންދާ ކަމަށް ވެސް ބުނެފައިވެ އެވެ.
ޖަޒީރާ Q-10 ބޯޓު އަޑިޔަށްދާ މަންޒަރު.
އެމްއެންޑީއެފް އިން ބުނެފައި ވަނީ އެ އުޅަނދުގެ ބައެއް ތަކެތި އޮޔާ ދާ ކަމަށާއި، ދަތުރު ކުރާ ފަރާތް ތަކުން އެކަމަށް ސަމާލުވުމަށް އިލްތިމާސް ކުރާ ކަމަަށެވެ. އަދި މި ތަކެތި އޮޔާދާ ކަމަށް ލަފާ ކުރެވެނީ ވ.ފެލިދޫގެ 5 ނޯޓިކަލް މޭލު ބޭރުން އިރުމައްޗަށް ކަމަށް ވެސް އެމްއެންޑީއެފް ކޯސްޓްގާޑުން ބުނެފައިވެ އެވެ. މި ސަރަހައްދުން ރޭގަނޑުގެ ވަގުތުގައި ދަތުރު ކުރާ ނަމަ، ސަމާލުކަަން ދިނުމަށް ވެސް އެމްއެންޑީއެފް އިން ވަނީ އެދިފައި އެވެ.
އަޑިޔަށް ދިޔަ ބޯޓުން ދަތުރު ކުރި އެންމެން މިހާރު ވަނީ ފުލުހުންގެ އެހީތެރިކަމާ އެކު ފުލިދޫ އަށް ގެންގޮސްފައި އެވެ. އެ މީހުންގެ ތެރޭގައި ހިމެނެނީ ހަތަރު ބިދޭސީ ފިރިހެނުންނާއި، ތިން ދިވެހި ފިރިހެނުންނެވެ. އަދި މި އެންމެންގެ ވެސް ޙާލު ރަނގަޅު ކަމަށް ބުނެފައިވެ އެވެ.
އެމްއެންޑީއެފް އިން މިހާރު އަންނަނީ މި ބޯޓު ފުން ކުރުމުގެ މަސައްކަތް ކުރަމުންނެވެ.
