އިންޑޮނޭޝިއާގެ ސްކޫލަކުން ކެއި 2,000 އެއްހާ ދަރިވަރުންނާއި މުދައްރިސުން ބޭރަށްހިންގަނީ

އިންޑޮނޭޝިއާ ސަރުކާރުން ކުރިއަށްގެންދާ ހިލޭ ކާނާ ފޯރުކޮށްދިނުމުގެ ޕްރޮގްރާމުގެ ދަށުން ފޯރުކޮށްދޭ ކާބޯތަކެތި ކެއުމުގެ ސަބަބުން ފާއިތުވި ތިން ދުވަހުގެ ތެރޭގައި 2,000 އަށްވުރެ ދަރިވަރުންނާއި މުދައްރިސުން ބަލިވެ، ބޭރަށްހިންގުން ޖެހިފައިވާ ކަމަށް އެ ގައުމުގެ އިދާރާތަކުން ހާމަކޮށްފި އެވެ. މި ހާދިސާތަކުގެ ތެރެއިން އެންމެ ފަހުން ފާހަގަކުރެވުނު ވޭދަނައިގައި، ސެންޓްރަލް ޖާވާގެ ރެމްބަންގްގައި ހުންނަ ހައިސްކޫލަކުން ކެއި 777 މީހަކު ބަލިވެފައިވާ ކަމަށް އެ ސްކޫލުގެ ހެޑްޓީޗަރު ވިދާޅުވި އެވެ. މި ކެއުންތަކަކީ އިންޑޮނޭޝިއާގެ ދަރިވަރުންނަށް ފައިދާހުރި ކާނާ ފޯރުކޮށްދިނުމަށް ޓަކައި ރައީސް ޕްރަބޮވޯ ސުބިއަންޓޯ ފެށްޓެވި، ބިލިއަން ޑޮލަރުގެ އަގުހުރި ޕްރޮގްރާމްގެ ދަށުން ފޯރުކޮށްދެމުންދާ ކެއުންތަކެއް ކަމަށް ވާއިރު، އެއްފަހަރާ ގިނަ ބަޔަކު ކާނާ ވިހަވުމުގެ ސަބަބަކަށް މި މަޝްރޫއު ވެ، މި ޕްރޮގްރާމަށް ހިނގާ ބޮޑު ހޭދައާއި ކޮރަޕްޝަންގެ ތުހުމަތުތަކާ ގުޅިގެން ގިނަ ފާޑުކިޔުންތަކެއް ވަނީ އަމާޒުވެފަ އެވެ.

ލަސެމްގައި ހުންނަ ހައިސްކޫލުގައި ބުދަ ދުވަހުގެ މެންދުރުގެ ކެއުމަށް "މަކަން ބަރުގިޒީ ގްރާޓިސް" (އެމްބީޖީ) ޕްރޮގްރާމްގެ ދަށުން ދިން ކާބޯތަކެތި ކެއުމަށްފަހު، ޖުމްލަ 752 ދަރިވަރުންނާއި 25 މުދައްރިސުންގެ ކިބައިން ކާނާ ވިހަވުމުގެ އަލާމާތްތައް ވަނީ ފެނިފަ އެވެ. ބީބީސީ ނޫހަށް މައުލޫމާތު ދެއްވަމުން އެ ސްކޫލުގެ ހެޑްޓީޗަރު ޖުހަރުޓުޓިކް ވިދާޅުވީ، އެ އެންމެންނަށް ބޭރަށްހިންގުމުގެ މައްސަލަ ދިމާވެ ފާޚާނާ ބޭނުންކުރުމަށް ކިއޫ ހަދަން ޖެހުނު ކަމަށާއި، ސްކޫލުގައި ހުރި 40 ފާޚާނާއަކީ އެހާ ގިނަ އަދަދެއްގެ ބަޔަކަށް އެއްފަހަރާ ބޭނުންކުރެވޭނެ މިންވަރެއް ނޫން ކަމަށެވެ. މި ހާދިސާއާ ގުޅިގެން ސްކޫލުގެ 1،200 އެއްހާ ދަރިވަރުންނާއި 95 މުވައްޒަފުން ގެއަށް ފޮނުވާލާފައިވާއިރު، އޭގެ ތެރެއިން ބައެއް މީހުންނަށް ވަނީ ހޮސްޕިޓަލުގައި ފަރުވާ ދޭން ޖެހިފަ އެވެ. ޖުހަރުޓުޓިކް ވިދާޅުވި ގޮތުގައި، ބަލިވި މީހުންގެ ބޭސްފަރުވާގެ ހުރިހާ ޚަރަދެއް ސަރުކާރުން ހަމަޖައްސައިދޭނެ އެވެ. އަދި ކާނާ ފޯރުކޮށްދިން ފަރާތުން ސްކޫލަށް ޒިޔާރަތްކޮށް، މިކަމުގެ ޒިންމާ ނަގާނެ ކަމަށް ބުނެފައިވާ ކަމަށް ވެސް އޭނާ ވިދާޅުވި އެވެ.

އިރުމަތީ ޖާވާގެ ސިދްއަރުޖޯގައި ހުންނަ ބޯޑިންގ ސްކޫލެއްގައި އަންގާރަ ދުވަހު އެމްބީޖީ ޕްރޮގްރާމްގެ ދަށުން ފޯރުކޮށްދިން ކާނާ ކުއެމަށްފަހު 730 މީހަކު ބަލިވެފައިވާ ކަމަށް އެ ސަރަހައްދުގެ ސިއްހީ އޮފިޝަލަކު ވަނީ ވިދާޅުވެފަ އެވެ. ރޭނީ ނަމަކަށް ކިޔާ ބެލެނިވެރިއަކު ބުނި ގޮތުގައި، އެ ކެއުން ކެއުމަށްފަހު އޭނާގެ ދަރިފުޅަށް ބޮލަށް އެނބުރުން އެރުމާއި މޭނުބައިކުރުމުގެ އިތުރުން ބަނޑުގެ މައްސަލަތައް ދިމާވި އެވެ. އަދި މި ހާދިސާގައި ބަލިވި ބައެއް ކުދިން ކޮޅަށް ހުންނަން ދަތިވާ މިންވަރަށް ވަރުދެރަވުމުގެ ސަބަބުން، ހޮސްޕިޓަލަށް ގެންދަން ޖެހުނީ ފުރޮޅުލީ ގޮނޑީގަ އެވެ. މީގެ އިތުރުން، މި ހަފުތާގައި ދެކުނު ސުލަވެސީގެ ތާނާ ޓޮރާޖާގެ ބައެއް ސްކޫލްތަކުގެ އެތައް ސަތޭކަ ދަރިވަރުންނަކަށް ވެސް، ހިލޭ ދިން ކެއުންތަކާ ގުޅިގެން ކާނާ ވިހަވުމުގެ މައްސަލަތައް ވަނީ ކުރިމަތިވެފަ އެވެ.

އާންމު ގޮތެއްގައި ކާނާ ވިހަވަނީ އެ ތަކެތި ރައްކާކުރުމުގައި ހުންނަ ނުރަނގަޅު އާދަތަކުގެ ސަބަބުން ނުވަތަ ކާނާ ތައްޔާރުކުރުމުގައި ސާފުތާހިރުކަން ކުޑަވުމުގެ ސަބަބުން ކަމަށް ވާއިރު، މި ކަން މެދުވެރިވި ސަބަބު ދެނެގަތުމަށް ކަމާބެހޭ އިދާރާތަކުން މިހާރު ދަނީ ތަހުގީގު ކުރަމުން އެވެ. އަދި، ކާނާގައި އެއްވެސް ވިހަ މާއްދާއެއް ހުރިތޯ ބެލުމަށް ސާމްޕަލްތައް ޓެސްޓުކުރުމުގެ މަސައްކަތް ވެސް ދަނީ ކުރަމުން އެވެ. ބައެއް ބެލެނިވެރިންނާއި މުދައްރިސުން ބުނެފައި ވަނީ، ކެއުމަށް ދިން ކުކުޅު މަސް ރޯފިލަންދެން ކައްކާފައި ނުވާ ކަމަށާއި، ބައެއް ތަކެތި ރަނގަޅަށް ނުކެކި ހުރުމުގެ އިތުރުން ކަނޑު މަސް އެކުލެވޭ ކާނާތަކުން ކުނިވަސް ދުވާ ކަމަށެވެ.

ލަސެމްގެ ކާނާ ފޯރުކޮށްދޭ ޔުނިޓުގެ ވެރިޔާ އަހުމަދު ސޮލާހް ޝަރަފުއްދީން ވަނީ މި ކަމަށް މައާފަށް އެދިވަޑައިގަންނަވައި، "ދަރިވަރުންނާއި މުދައްރިސުންގެ ފަރުވާއަށް ބޭނުންވާ ހުރިހާ ކަމެއްގެ ފުރިހަމަ ޒިންމާ" ނަގާނެ ކަމަށް ވިދާޅުވެފަ އެވެ. އަދި، މި ހާދިސާއާ ގުޅިގެން އެ ޔުނިޓުގެ މަސައްކަތްތައް ކުރިއަށްދާ ގޮތުގެ ފުރިހަމަ އިވެލުއޭޝަނެއް ހަދާނެ ކަމަށް ވެސް އޭނާ ވިދާޅުވި އެވެ. އިންޑޮނޭޝިއާގެ ނޭޝަނަލް ނިއުޓްރިޝަން އެޖެންސީގެ އިސްވެރިޔާ ވިދާޅުވީ، މިނކަމުގައި އިހުމާލެއް އޮތްކަން ފާހަގަކުރެވިއްޖެނަމަ އަދި ޖިނާއީ ކުށެއްގެ އުންސުރު އެކުލެވޭނަމަ، އެ ކަމުގައި އެއްވެސް އެހީތެރިކަމެއް ދެވެން ނެތް ކަމަށެވެ. ނަމަވެސް، މި ހާދިސާއަށް މައާފަށް އެދޭ ކަމަށް އޭނާ ވިދާޅުވި އެވެ.