ހަމާސް: އިސްރާއީލުން ޣައްޒާ ގަތުލުއާންމުގެ ހެކި ނައްތާލަނީ

ފަލަސްތީނުގެ ޣައްޒާގެ ރައްޔިތުންނާ ދެކޮޅަށް ހިންގަމުންދާ ނަސްލު ނައްތާލުމުގެ ގަތުލުއާންމުގެ ހެކި ނައްތާލުމަށް އިސްރާއީލުން މަސައްކަތްކުރާ ކަމަށް ބުނެ، ހަމާސް ޖަމާއަތުން އިންޒާރު ދީފި އެވެ. ހަމާސްއިން ބުނީ، އިސްރާއީލުން މި ކަން ކުރަނީ ހާހަކަށް ވުރެ ގިނަ މީހުންގެ ހަށިތައް ވަޅުލެވިފައިވާ ކަމަށް ބެލެވޭ އިމާރާތްތަކުގެ ކުނިތައް ނަގައި، މުގުރައި އަދި އެ ތަކެތި އެހެން ތަންތަނަށް އުފުލައިގެން ކަމަށެވެ. މިއީ، ވޭތުވެދިޔަ ދެ އަހަރުދުވަހުގެ ތެރޭގައި ހިންގާފައިވާ ރަހުމުކުޑަ ޖަރީމާތަކުގެ މާއްދީ ހެކިތައް ނައްތާލުމަށް އިސްރާއީލުގެ ސިފައިންނާއި އެ ގައުމުގެ ސަރުކާރުން ހިންގާ ޖަރީމާއެއް ކަމަށް ވެސް ހަމާސްގެ ބަޔާނުގައި ފާހަގަކުރި އެވެ.

ފަލަސްތީނުގެ މިނިވަންކަމަށް ޖިހާދުކުރާ ހަމާސްއިން ބުނީ، ޝަހީދުކޮށްލާފައިވާ މީހުންގެ ހަށިތަކާއި ހެކިތައް ހުރި ސަރަހައްދުތަކަށް ބަދަލު ގެނައުމަކީ ބައިނަލްއަގުވާމީ ގާނޫނުތަކާއި، ހެކި ރައްކާތެރިކުރުމަށް ބައިނަލްއަގުވާމީ ކޯޓް އޮފް ޖަސްޓިސްއިން (އައިސީޖޭ) ނެރެފައިވާ އަމުރާ ޚިލާފު ކަމެއް ކަމަށެވެ. އަދި، މިއީ ޝަހީދުންގެ ކަރާމާތަށް އަރައިގަތުމުގެ އިތުރުން، އިސްލާމީ އުސޫލުން އެ މީހުން ވަޅުލުމަށް އާއިލާތަކަށް ލިބިގެންވާ ހައްގަށް ހުރަސްއެޅުން ކަމަށެވެ.އދ. ގެ ހާއްސަ ރެޕޯޓާ ފްރެންޗެސްކާ އަލްބަނޭޒޭ ވެސް ވަނީ ސުންނާފަތި ކޮށްލާފައިވާ ގެދޮރާއި އިމާރާތްތަކުގެ ކޮންކުރިޓުތަކާއި ގައުކުނޑި މުގުރުމުގެ ސަބަބުން ޣައްޒާގައި ހިންގި "ލާއިންސާނީ ބޮޑެތި ޖަރީމާތަކުގެ" ނިޝާންތައް ފޮހެވިދާނެ ކަމަށް ވިދާޅުވެ އިންޒާރު ދެއްވައިފަ އެވެ.

އެހެންކަމުން، މި ސަރަހައްދުތައް ހިމާޔަތްކުރުމަށް އދ. އާއި ބައިނަލްއަގުވާމީ ޖިނާއީ ކޯޓުން އަވަސް ފިޔަވަޅުތަކެއް އެޅުމަށާއި، ތަހުގީގީ ޓީމުތަކަށާއި ފޮރެންސިކް މާހިރުންނަށް ޣައްޒާއަށް ވަނުމުގެ ހުއްދަ ދިނުމަށް ހަމާސްއިން ވަނީ ގޮވާލައިފަ އެވެ. އަދި، ކުނި ނަގައި ޣައްޒާ އަލުން އާރާސްތުކުރުމަކީ ރައްޔިތުންގެ ހައްގަކަށް ވިޔަސް، ޖަރީމާތަކުން ރެކުމަށް މި މަސައްކަތުގެ ބޭނުން ހިފިޔަދީގެން ނުވާނެ ކަމަށާއި، ޝަހީދުކޮށްލާފައިވާ އެތައް ހާސް މީހުންގެ ހަށިތައް ހޯދައި ހެކިތައް ރައްކާތެރިކުރަންޖެހޭނެ ކަމަށް އެ ޖަމާއަތުން ފާހަގަކުރި އެވެ.

ޖެނީވާގައި މަރުކަޒުވެފައިވާ ޔޫރޯ-މެޑިޓެރޭނިއަން ހިއުމަން ރައިޓްސް މޮނިޓާއިން އޮގަސްޓް މަހު ބުނީ، އިސްރާއީލުގެ މަދަނީ ކުންފުނިތަކާ ގުޅިގެން، ސިފައިންގެ ކޮންޓްރޯލްގައިވާ ޣައްޒާގެ 66 އިންސައްތަ ސަރަހައްދުން މަދުވެގެން 10 މިލިއަން ޓަނުގެ ކުނި ނަގައި، މުގުރައި ނުވަތަ އެހެން ސަރަހައްދުތަކަށް ބަދަލުކޮށްފައިވާ ކަމަށެވެ. މީގެ އިތުރުން، ކޮންމެ ދުވަހަކު 100 އެއްހާ ލޮރީގައި ޣައްޒާއިން ބޭރަށް ކުނި އުފުލާއިރު، އެ ސަރަހައްދުތަކުގައި 400 އެއްހާ އުޅަނދު ހަރަކާތްތެރިވަމުންދާ ކަން އެ ޖަމުއިއްޔާއިން ހާމަކުރި އެވެ. ފަލަސްތީނުގެ ތަފާސްހިސާބުތަކުން ދައްކާ ގޮތުގައި، ޣައްޒާ ގަތުލުއާންމުގައި އިސްރާއީލުން ވަނީ ދެ އަހަރު ދުވަހުގެ ތެރޭގައި ފަލަސްތީނުގެ 73،000 އަށް ވުރެ ގިނަ މީހުން ޝަހީދު ކޮށްލާފަ އެވެ. އަދި، 174،000 އަށް ވުރެ ގިނަ މީހުން ޒަޚަމްކޮށްލާފައިވާއިރު، 9،000 އަށް ވުރެ ގިނަ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެ، ގެއްލިފައިވާ ކަމަށް ވެސް އިދާރާތަކުން އަންދާޒާ ކުރެ އެވެ.