ނަތަންޔާހޫ: އިރާނުގެ ސަރުކާރު ވަރަށް އަވަހަށް ވެއްޓިދާނެ

އިރާނުގެ މިހާރުގެ ސަރުކާރު ވަރަށް އަވަހަށް ވެއްޓިދާނެ ކަމުގެ ފުރިހަމަ ޔަގީންކަން އެބައޮތް ކަމަށާއި، އެމެރިކާއިން އަލުން ހަމަލާތައް ދޭން ފެށުމާއެކު އެ ގައުމު މިހާރު އޮތީ ކުރިއަށްވުރެ ބޮޑަށް ބަލިކަށިވެފައި ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުރާސްފަތި ދުވަހު ވިދާޅުވެއްޖެ އެވެ.

އިސްރާއީލުގެ އަސްކަރީ ލީޑަރުންނާއެކު ބޭއްވި ބައްދަލުވުމެއްގައި ވާހަކަދައްކަވަމުން ނަތަންޔާހޫ ވިދާޅުވީ، އިރާނުގެ ސަރުކާރު މިހާރު އޮތީ ގޮތް ހުސްވެ، ވެއްޓުމުގެ މަގުމަތީގައި ކަމަށެވެ. އަދި އެ ގައުމުގެ ހާލަތު ކުރިއަށްވުރެ ބޮޑަށް ބަލިކަށިވެފައިވާ ކަމަށާއި، މިހާރު އެ ސަރުކާރުން މަސައްކަތް ކުރަމުންދަނީ ހަމައެކަނި ސަލާމަތްވުމަށް ކަމަށްވެސް އޭނާ ވިދާޅުވި އެވެ.

ނަތަންޔާހޫ އިތުރަށް ވިދާޅުވީ، އިރާނުގެ ފަރާތުން ކުރިމަތިވާ ނުރައްކާތައް އެއްކޮށް ނައްތާލެވޭނެ ކަމުގެ ފުރިހަމަ އިތުބާރު އެބައޮތް ކަމަށާއި، އެއީ އެ ގައުމުގެ މިހާރުގެ ސަރުކާރު ވައްޓާލުން ކަމަށެވެ. އަދި އެއީ ކުރިއަށް އޮތް އެންމެ މުހިންމު މަސައްކަތް ކަމަށާއި، އެ އަމާޒަށް ވާސިލުވުމަކީ ނުކުރެވޭނެ ކަމެއް ނޫން ކަމަށާއި އެކަން އޮތީ ވަރަށް ގާތުގައި ކަމަށްވެސް އޭނާ ވިދާޅުވި އެވެ.

ދީނީ އިލްމުވެރިން އިސްވެ ތިބެ ހިންގާ އިރާނުގެ ސަރުކާރަކީ އިސްރާއީލުގެ ދެމިއޮތުމަށް އޮތް ނުރައްކަލެއްގެ ގޮތުގައި އެތައް އަހަރެއް ވަންދެން ސިފަކުރެއްވުމަށްފަހު، ނަތަންޔާހޫ ވަނީ މިދިޔަ ފެބްރުއަރީ މަހުގެ ފަހުކޮޅު އެމެރިކާއާ ގުޅިގެން އިރާނަށް ހަމަލާތަކެއް ދީފަ އެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ ކުއްލި ގޮތަކަށް މިދިޔަ އޭޕްރީލް މަހު ހަމަލާ ބަދަލުކުރުން ހުއްޓާލުމަށް އަމުރުކުރައްވާފަ އެވެ.

އެމެރިކާއިން އިރާނަށް އިގްތިސާދީ ގޮތުން އިތުރު ފިއްތުންތައް ކުރިމަތިކޮށް، މި ހަފުތާގައި އަލުން ހަމަލާތައް ދޭން ފެށުމާ ގުޅިގެން، އިރާނުން ވަނީ ގަލްފުގެ ގައުމުތަކާއި، އުރުދުން އަދި އިރާގުގެ ކުރުދިސްތާން ސަރަހައްދުގައި ތިބި އެމެރިކާގެ ބައިވެރިންނަށް ރައްދު ހަމަލާތައް ދީފައެވެ. ނަމަވެސް، އިރާނުން އިސްރާއީލަށް އެއްވެސް ހަމަލާއެއް ދީފައެއް ނުވެ އެވެ.

މިކަމާ ގުޅޭގޮތުން ނަތަންޔާހޫ ވިދާޅުވީ، އިރާނުން އިސްރާއީލަށް ހަމަލާ ނުދެނީ އެއީ އިއްތިފާގަކުން ވާކަމެއް ނޫން ކަމަށެވެ. އަދި އެ ގައުމުން އެހެން ހުރިހާ ފަރާތްތަކަށް ހަމަލާދިން ނަމަވެސް، އިސްރާއީލަށް ހަމަލާދޭން ނުކެރޭ ކަމަށް އޭނާ ވިދާޅުވި އެވެ.

"އެމީހުންނަށް އަހަރެމެންގެ ބާރާއި، އަހަރެމެންގެ އަތުގައި ހުރި ހަތިޔާރުގެ ވަރުގަދަކަން އެނގޭ. އަދި އަހަރެމެންގެ އަޒުމްވެސް އެމީހުންނަށް އެނގޭ،" ނަތަންޔާހޫ ވިދާޅުވި އެވެ.

ނަތަންޔާހޫ މިފަދަ މޭރުމަކުން ވާހަކަދައްކަވާފައި މިވަނީ، އަންނަ އޮކްޓޫބަރު މަހުގެ 27 ވަނަ ދުވަހު ބޭއްވުމަށް ހަމަޖެހިފައިވާ އާންމު އިންތިޚާބާ ދިމާކޮށެވެ. ބައެއް ޚިޔާލު ހޯދުމުގެ ވޯޓުތަކުން ދައްކާގޮތުގައި ނަތަންޔާހޫ އޮތީ ފަހަތުގަ އެވެ. އަދި އިދިކޮޅު ލީޑަރުން ދަނީ އިރާނުގެ މައްސަލައިގައި ނަތަންޔާހޫ ނާކާމިޔާބުވެފައިވާ ކަމަށް ބުނެ އޭނާއަށް ވަރަށް ބޮޑަށް ފާޑުކިޔަމުންނެވެ.