އިންޓަރ ބަލިކޮށް، ރެއާލްގެ ފެށުން ވެސް ރަނގަޅުކޮށްފި

ޔުއެފާ ޗެމްޕިއަންސް ލީގުގެ ލީގު ބުރުގައި އިންޓަރ މިލާންއާ ދެކޮޅަށް ކުޅުނު މެޗުން މޮޅުވެ، ސްޕެއިންގެ ރެއާލް މެޑްރިޑުން މުބާރާތުގެ ފެށުން ރަނގަޅުކޮށްފި އެވެ.

ރެއާލްގެ އަމިއްލަ ދަނޑުގައި އަންގާރަ ދުވަހުގެރޭ ދަންވަރު ކުޅުނު މެޗު އެ ޓީމުން ކާމިޔާބުކޮށްފައި ވަނީ 2-1 އިންނެވެ. މެޗުގެ ފުރަތަމަ ހާފުގައި ރެއާލް އިން ދެ ލަނޑު ޖެހިއިރު، އިންޓަރ އިން އެ ޓީމުގެ ހަަމައެކަނި ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން 14 ވަނަ މިނެޓުގައި ރެއާލް އަށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެއީ ބްރަހިމް ޑިއާޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 23 ވަނަ މިނެޓުގައި ފެޑެރިކޯ ވަލްވާޑޭ ވަނީ ރެއާލްގެ ދެ ވަނަ ލަނޑު ޖަަހައި ލީޑު ފުޅާކޮށްފަ އެވެ. 

މެޗުގައި ލަނޑު ޖަހަން އިންޓަރ އިން ވަރަށް މަސައްކަތްކުރިއިރު، އެ ޓީމަށް އެކަން ކާާމިޔާބު ކުރެވުނީ ދެ ވަނަ ހާފުގަ އެވެ. މެޗުގެ 77 ވަނަ މިނެޓުގައި އިންޓަރގެ ހަމައެކަނި ލަނޑު ޖެހީ ކާލޯ އަގުސްޓޯ އެވެ. އެއީ ލައުޓާރޯ މާާޓިނޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މެޗުން ރެއާލް މޮޅުވީއިރު، މިއީ އެ ޓީމުގެ ކޯޗުކަމާ ހޯސޭ މޮރީނިއޯ ހަވާލުވި ފަހުން ޗެމްޕިއަންސް ލީގުގައި ކުޅުނު ފުރަތަމަ މެޗެވެ. ރެއާލް އަށް ޗެމްޕިއަންސް ލީގުގައި ދެން އޮންނާނީ ރޯމާއާ ދެކޮޅަށް ކުޅޭ މެޗެވެ.