މަލާގާ ބަލިކޮށް، ރެއާލްގެ މޮޅުވުން ކުރިއަށް

ސްޕެނިޝް ލީގުގައި މަލާގާއާ ދެކޮޅަށް ކުޅުނު މެޗުން ވެސް މޮޅުވެ، ރެއާލް މެޑްރިޑުން އެ ޓީމުގެ މޮޅުވުމުގެ ސިލްސިލާ ދަމަހައްޓައިފި އެވެ.

ރެއާލްގެ އަމިއްލަ ދަނޑުގައި އާދީއްތަ ދުވަހުގެރޭ ކުޅުނު މެޗު އެ ޓީމުން ކާމިޔާބުކޮށްފައި ވަނީ 4-0 އިންނެވެ. މެެޗުގެ ފުރަތަމަ ހާފުގައި ރެއާލް އިން ތިން ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 19 ވަނަ މިނެޓުގައި ރެއާލް އަށް ލީޑު ނަގައިދިނި ޖޫޑް ބެލިންހަމް އެވެ. އޭގެ ފަހުން މެޗުގެ 26 ވަނަ މިނެޓުގައި ރެއާލްގެ ދެ ވަނަ ލަނޑަކީ މަލާގާގެ އަލްފަންސޯ ހެރޭރޯ އަތުން ބައި ކޮޅަށް ވަތް ލަނޑެކެވެ.

އޭގެ ހަތަރު މިނެޓު ފަހުން ރެއާލް އަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ. އެއީ ޓްރެންޓް އެލެގްޒެންޑާ އާނޯލްޑް ތަނަވަސްކޮށްދިން ފުރުސަތެއްގައި އެމްބާޕޭ ޖެހި ލަނޑެކެވެ. މެޗުގައި ރެއާލްގެ ފަހު ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ އާޑާ ގުލާ އެވެ.

މި މޮޅާއެކު ރެއާލް އިން މި ވަނީ އެ ޓީމުގެ ފުރަތަމަ ތިން މެޗުން ވެސް މޮޅުވެފަ އެވެ. މިވަގުތު ރެއާލް އެއް ވަނައިގައި އޮތީ އެ ޓީމު ކުޅެފައިވާ ތިން މެޗުން ނުވަ ޕޮއިންޓާ އެކު އެވެ.