އިސްރާއީލުގެ ހަމަލާތަކުގައި ލުބުނާނުން ކޮންމެ ދުވަހަކު 7 ކުޑަކުދިން ޝަހީދުކޮށްލާ

މިދިޔަ މާރިޗު މަހުން ފެށިގެން އިސްރާއީލުން ލުބުނާނަށް ދެމުންދާ ހަމަލާތަކުގައި ކޮންމެ ދުވަހަކު އެވުރެޖުކޮށް ހަތް ކުޑަކުދިން ޝަހީދުކޮށްލާ ކަމަށް ކުޑަކުދިންގެ ހައްގުތައް ހިމާޔަތްކުރަން މަސައްކަތްކުރާ އެހީދޭ ޖަމުއިއްޔާ 'ސޭވް ދި ޗިލްޑްރަން' އިން ހާމަކޮށްފި އެވެ. އެ ޖަމުއިއްޔާއިން ބުދަ ދުވަހު ނެރުނު ރިޕޯޓެއްގައި ބުނެފައި ވަނީ، ހަނގުރާމަ ހުއްޓާލުމަށް ލުބުނާނުގެ ސަރުކާރާއި އިސްރާއީލާ ދެމެދު އެއްބަސްވުމެއް ގާއިމުކުރެވުނު ނަމަވެސް، އާންމުން ދިރިއުޅޭ ގެދޮރާއި ވަސީލަތްތަކަށް އިސްރާއީލުން ދެމުންދާ ޢުދުވާނީ ހަމަލާތަކުގެ ސަބަބުން ކުޑަކުދިންގެ ފުރާނައަށް އޮތް ނުރައްކާ ބޮޑުވަމުންދާ ކަމަށެވެ.

ވޭތުވެދިޔަ ހަ މަސްދުވަހުގެ ތެރޭގައި އިސްރާއީލުން 4،300 އަށްވުރެ ގިނަ މީހުން ޝަހީދުކޮށްލާފައި ވާއިރު، 12،000 އަށްވުރެ ގިނަ މީހުން ޒަޚަމްކޮށްލާފައިވާ ކަމަށް ސޭވް ދި ޗިލްޑްރަންގެ ތަފާސްހިސާބުތަކުން ދައްކަ އެވެ. މީގެ އިތުރުން، 60 އާއި 70 އާ ދެމެދުގެ އަދަދަކަށް އަވަށްތައް ވަނީ ސުންނާފަތިކޮށްލާފަ އެވެ. ޝަހީދުކޮށްލާފައިވާ މީހުންގެ ތެރޭގައި މަދުވެގެން 257 ކުޑަކުދިން ހިމެނޭއިރު، 1،039 ކުދިންނަށް ވަނީ އެކިވަރުގެ އަނިޔާތައް ލިބިފަ އެވެ.

ސޭވް ދި ޗިލްޑްރަންއިން ލުބުނާނަށް ކަނޑައަޅާފައި ހުންނަވާ ކަންޓްރީ ޑައިރެކްޓަރު ނޯރާ އިންގްޑާލް ވިދާޅުވީ، ލުބުނާނުގެ ކުޑަކުދިންނަށް އަމާޒުކޮށް ދޭ ހަމަލާތަކާއި، އެ ކުދިން ގެދޮރުން ބޭރުކުރުމާއި، ގެދޮރަށް އެނބުރި ދިއުމަށް ހުރަސްއެޅުމުގެ އިތުރުން އާންމު ވަސީލަތްތައް ހަލާކުކުރުމަކީ އާންމު ކަމެއްގެ ގޮތުގައި ބަލައިގަތުމަށް ބައިނަލްއަގުވާމީ މުޖުތަމައުން ފުރުސަތު ދީގެން ނުވާނެ ކަމަށެވެ.

ހަނގުރާމަ އެންމެ ނުރައްކާތެރިވި ދުވަސްވަރު ލުބުނާނުގެ ދެކުނުން މިލިއަނަކަށްވުރެ ގިނަ މީހުން ގެދޮރު ދޫކޮށް ދާން މަޖުބޫރުކުރުވި އެވެ. އދ. ގެ އޮފީސް ފޯ ދި ކޯޑިނޭޝަން އޮފް ހިއުމެނިޓޭރިއަން އެފެއާޒްއިން (އޯސީއެޗްއޭ) ބުނާ ގޮތުގައި، ޖޫން މަހު ސޮއިކުރި ހަނގުރާމަ ހުއްޓާލުމުގެ އެއްބަސްވުމަށްފަހު ވެސް 348،800 އަށްވުރެ ގިނަ މީހުންނަށް އަދިވެސް އެނބުރި ގެދޮރަށް ދެވޭގޮތެއް ނުވެ އެވެ.

ލުބުނާނުގެ މުޖާހިދުންގެ ހިޒްބުالله ޖަމާއަތާއި އިސްރާއީލާ ދެމެދު ބޯޑަރު ހުރަސްކޮށް ހަމަލާ ބަދަލުކުރަން ފަށާފައިވަނީ، 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ފަލަސްތީނުގެ ޣައްޒާގެ ރައްޔިތުންގެ ނަސްލުހޭދު ކުރުމަށް އިސްރާއީލު ސިފައިން ފެށި ގަތުލުއާންމާ ގުޅިގެންނެވެ.

ލުބުނާނުގެ ދެކުނުގެ ބޮޑު ސަރަހައްދެއް އިސްރާއީލުން ހިފުމަށްފަހު، 2024 ވަނަ އަހަރުގެ ނޮވެމްބަރު މަހު ދެ ފަރާތުން ވަނީ ވަގުތީ ގޮތުން ހަނގުރާމަ ހުއްޓާލުމުގެ އެއްބަސްވުމަކަށް އައިސްފަ އެވެ. ނަމަވެސް، އިސްރާއީލުގެ ސިފައިން ލުބުނާނުގެ ދެކުނުގެ ގިނަ ސަރަހައްދުތަކެއްގައި އަދިވެސް ތިބިއިރު، އެ ގައުމުން ދަނީ ތަކުރާރުކޮށް ހަނގުރާމަ ހުއްޓާލުމުގެ އެއްބަސްވުމާ ޚިލާފުވަމުންނެވެ. އީރާނުގެ ރޫހާނީ ލީޑަރު އާޔަތުالله އަލީ ޚާމަނާއީ ޝަހީދުކޮށްލުމުގެ ބަދަލުހިފުމުގެ ގޮތުން، މާރިޗު މަހުގެ 2 ވަނަ ދުވަހު ހިޒްބުالله އިން އިސްރާއީލުގެ އުތުރުގައިވާ އަސްކަރީ މަރުކަޒަކަށް ރޮކެޓާއި ޑްރޯން ހަމަލާތަކެއް ދިނުމާ ގުޅިގެން، އެ އެއްބަސްވުން ވަނީ އުވިފަ އެވެ.

ލުބުނާނުގެ ސަރުކާރާއި އިސްރާއީލުން ޖޫން މަހު ހަނގުރާމަ ނިންމުމުގެ އޮނިގަނޑު އެއްބަސްވުމަކަށް އައި ނަމަވެސް، އިސްރާއީލުން ލުބުނާނުގެ ބިންތަކުން ފޭބުމުން ނޫނީ އެ އެއްބަސްވުން ގަބޫލުނުކުރާނެ ކަމަށް ހިޒްބުالله އިން ވަނީ ބުނެފަ އެވެ. މީގެ ކުރިން އޭޕްރީލް މަހުވެސް ހަނގުރާމަ ހުއްޓާލުމަށް ދެ ފަރާތުން އެއްބަސްވުމަކަށް އަ އެވެ.

ސޭވް ދި ޗިލްޑްރަންއިން ފާހަގަކުރި ގޮތުގައި، ފާއިތުވި މަސްތަކުގައި އެނބުރި ގެދޮރަށް ދިޔަ ކުދިންނަށް ވެސް ސްކޫލްތަކާއި ހޮސްޕިޓަލްތައް ފަދަ އަސާސީ ޚިދުމަތްތައް ހޯދުމުގައި ބޮޑެތި ހުރަސްތަކެއް އެބަހުއްޓެވެ. ލުބުނާނުގެ އެޑިއުކޭޝަން މިނިސްޓްރީން މުޅި ގައުމުގައި ކުރި ދިރާސާއަކުން ދައްކާ ގޮތުގައި، ވޭތުވެދިޔަ ހަ މަސްދުވަހުގެ ތެރޭގައި 340 ސްކޫލަކަށް ވަނީ އެކިވަރުގެ ގެއްލުންތައް ލިބި ނުވަތަ އެއްކޮށް ސުންނާފަތިވެފަ އެވެ. ލުބުނާނުގެ ސްކޫލްތައް މަރާމާތުކޮށް އަލުން ހުޅުވުމަށް އަވަސް ފިޔަވަޅުތަކެއް ނާޅައިފިނަމަ، ކުރިއަށް އޮތް ދިރާސީ އަހަރު މަދުވެގެން 100,000 ކުދިން ތައުލީމުން މަހުރޫމްވުމުގެ ބިރު އެބައޮތް ކަމަށް ސޭވް ދި ޗިލްޑްރަންއިން ވަނީ އިންޒާރު ދީފަ އެވެ.