އެމްބާޕޭގެ ހެޓްރިކާ އެކު ރެއާލް އަށް ދެވަނަ މޮޅު

ސްޕެނިޝް ލީގުގައި ރެއާލް ސޮސިއެޑާޑްއާ ދެކޮޅަށް ކުޅުނު މެޗުން ވެސް މޮޅުވެ، ރެއާލް މެޑްރިޑުން ލީގުގައި ދެވަނަ މޮޅު ހޯދައިފި އެވެ.

ރެއާލްގެ އަމިއްލަ ދަނޑުގައި ބުދަ ދުވަހުގެރޭ ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. މެޗުގައި ރެއާލް އިން ލަނޑު ޖަހައި ކުރި ހޯދާފައި ވަނިކޮށް، ސޮސިއެޑާޑް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ހާފުގައި ތިން ލަނޑު ޖަހައިގެން ރެއާލް ވަނީ މެޗުން މޮޅުވެފައި އެވެ.

މެޗުގެ ފުރަތަމަ ހާާފުގެ 40 ވަނަ މިނެޓުގައި ރެއާލް އަށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެއީ ފެޑެރިކޯ ވަލްވާޑޭ ތަނަވަސްކޮށްދިން ފުރުސަތެއްގައި އެމްބާޕޭ ޖެހި ލަނޑެކެވެ. އޭގެ ހަތަރު މިނެޓު ފަހުން ލޫކާ ސުސިކް ވަނީ ސޮސިއެޑާޑް އަށް މެޗުގެ ނަތީޖާ ހަަމަހަމަ ކޮށްދީފައި އެވެ.

ދެ ވަނަ ފަހަރަށް ރެއާލް އިން ލީޑު ނެގީ މެޗުގެ 60 ވަނަ މިނެޓުގައި އެމްބާޕޭ ޖެހި ލަނޑުންނެވެ. އެއީ ޖޫޑް ބެލިންހަމް ތަނަވަސްކޮށްދިން ފުރުސަތެއްގައި އެމްބާޕޭ ޖެހި ލަނޑެކެވެ. އޭގެ އަށް މިނެޓު ފަހުން ވިނީޝިއުސް ޖޫނިއާ ވަނީ ރެއާލްގެ ތިން ވަނަ ލަނޑު ޖަހައިފަ އެވެ. އެ ލަނޑު ޖަހަން ވިނީޝިއުސް އަށް ވެސް ފުރުސަތު ތަނަވަސްކޮށްދިނީ ބެލިންހަމް އެވެ. މެޗުގެ 80 ވަނަ މިނެޓުގައި އެމްބާޕޭ ވަނީ ރެއާލްގެ ހަތަރު ވަނަ ލަނޑު ޖަހައި އޭނާގެ ހެޓްރިކް ހަމަކޮށްފައި އެވެ. 

މިއީ ރެއާލްގެ ކޯޗުކަމާ ހޯސޭ މޮރީނިއޯ ހަވާލުވީ ފަހުން، ރެއާލްގެ އަމިއްލަ ދަނޑުގައި އެ ޓީމުން ކުޅުނު ފުރަތަމަ މެޗެވެ. ލީގުގައި މިހާތަނަށް ކުޅުނު ދެ މެޗުން ވެސް ރެއާލް މޮޅުވެފައިވާއިރު، އެ ޓީމަށް ލިބެނީ ހަ ޕޮއިންޓެވެ. ލީގުގައި ރެއާލް އަށް ދެން އޮންނާނީ މަލާގާއާ ދެކޮޅަށް ކުޅޭ މެޗެވެ.