ރައީސް މުޢިއްޒު އަށް ދެން ވެރިކަން ނުލިބޭނެކަން އަރިސް ބޭފުޅުންނަށް އިނގޭ، ކެބިނެޓުގައި ވެސް އިންގިލާބެއް އެބަ ހިނގާ: ރައީސް ޔާމީން
7 ސެޕްޓެމްބަރު 2026 | ހޯމަ 05:59ސަރުކާރުގެ ކެބިނެޓުގެ ތެރޭގައި ވެސް އެކަން ހިނގާ ކަމަށް ފާހަގަ ކުރައްވައި ރައީސް ޔާމީން ވިދާޅުވީ، ރައީސް މުއިއްޒި ގޮވައިގެން ނިކުމެ 2028 ވަނަ އަހަރުގެ ރިޔާސީ އިންތިޚާބު ކާމިޔާބު ނުވާނެކަން އެ ބޭފުޅުންނަށް ވެސް އިނގޭ ކަމަށް.
ކުރީގެ ރައީސް ޢަބްދުﷲ ޔާމީން | ސޯޝަލް މީޑިއާ
މިހާރުގެ ރައީސް ޑރ. މުޙައްމަދު މުއިއްޒު އަށް ދެ ވަނަ ދައުރެއް ނުލިބޭނެކަން ޕީއެންސީގެ އިސްވެރިންނަށް އިނގޭ ކަމަށާއި، ސަރުކާރުގެ ކެބިނެޓުގައި ވެސް އިންގިލާބެއް ހިނގަމުން އަންނަ ކަމަށް ކުރީގެ ރައީސް ޢަބްދުﷲ ޔާމީން ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވީ އާދީއްތަ ދުވަހުގެ ރޭ ޕީއެންއެފް އިން ބޭއްވި ޖަލްސާގައި ވާހަކަ ދައްކަވަމުންނެވެ. އޭގެ ކުރީ ޖަލްސާއެއްގައި ރައީސް ޔާމީން ވަނީ، ރައްޔިތުންގެ މަޖިލީހުގެ ތެރޭގައި ހިމޭން އިންގިލާބެއް ހިނގަމުން އަންނަ ކަމަށް ވިދާޅުވެފައި އެވެ.
ރަައީސް ޔާމީންގެ އެ ވާހަކަ ތަކަށް ޕީއެންސީގެ މަޖިލިސް މެމްބަރުންނާއި، އިސްވެރިން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވެސް ވަނީ ރައްދު ދެއްވައިފަ އެވެ. ޕީއެންސީގެ ޖަލްސާގައި ޢަބްދުއްރަޙީމް ވިދާޅުވެފައި ވަނީ، މަޖިލިސް ތެރެއިން ރައީސް ޔާމީން އަށް އެއްވެސް ކަމެއް ނުކުރެއްވޭނެ ކަމަށާއި، އެމަނިކުފާނު ޖެހޭނީ މަހަށް ވަޑައިގަންނަވަން ކަަމަށެވެ.
ޕީއެންއެފްގެ ޖަލްސާގައި ރައީސް ޔާމީން ވިދާޅުވެފައި ވަނީ ރައްޔިތުންގެ މަޖިލީހުގެ ތެރެއިން ހިމޭން އިންގިލާބެއް ހިނގަމުން އަންނަ ކަމަށް އެމަނިކުފާނު ކުރިން ވިދާޅުވެފައިވާއިރު، އެކަން ހިނގަނީ މަޖިލީހުގައި އެކަނި ނޫން ކަމަށެވެ. ސަރުކާރުގެ ކެބިނެޓުގެ ތެރޭގައި ވެސް އެކަން ހިނގާ ކަމަށް ފާހަގަ ކުރައްވައި ރައީސް ޔާމީން ވިދާޅުވީ، ރައީސް މުއިއްޒި ގޮވައިގެން ނިކުމެ 2028 ވަނަ އަހަރުގެ ރިޔާސީ އިންތިޚާބު ކާމިޔާބު ނުވާނެކަން އެ ބޭފުޅުންނަށް ވެސް އިނގޭ ކަމަށެވެ.
އެކަން ފާހަގަ ކުރައްވައި ރައީސް ޔާމީން ވިދާޅުވެފައި ވަނީ، މިހާރު ހިނގަމުން އެ އަންނަ ކަންތައްތަކަކީ އެކަމުގެ ހޫނުގަނޑުގެ ތެރެއިން ހިނގާ ކަންކަން ކަމަށެވެ. ރައީސް މުއިއްޒުގެ ކެބިނެޓަށް ގެނައި ބަދަލު ތަކަކީ، ބައެއް މިނިސްޓަރުން ކޮފީ މޭޒެއްގެ ދޮށުގައި ދެއްކެވި ވާހަކަ ތަކެއްގެ ސަބަބުން ގެނައި ބަދަލެއް ކަމަށް ވެސް ރައީސް ޔާމީން ވަނީ ވިދާޅުވެފައި އެވެ.
އެއީ ތެދެއް އިނގޭތޯ. ފަހުން ކެބިނެޓުގެ ބައެއް ވަޒީރުންނަށް އައި ބަދަލަކީ އެ ބޭފުޅުން ކޮފީ މޭޒެއްގެ ދޮށުގައި ދެއްކި ވާހަކަ ތަކެއް ލީކުވެގެން އިނގޭތޯ. އެހެންވީމާ މި މީހުންނަށް އިނގޭ ކިހާ ވަރެއްގެ މީހަކާ އެކުގައިކަން މި މީހުން މި އުޅެނީ.ކުރީގެ ރައީސް ޢަބްދުﷲ ޔާމީން
މީގެ އިތުރުން ރައީސް ޔާމީން ވިދާޅުވެފައި ވަނީ އެއްވެސް ދާއިރާއެއްގައި ކަންކަން ނުހިނގާ ވާހަކަ އާއި، ރައްޔިތުންގެ ތާއީދު ނެތް ވާހަކަ ވެސް ދައްކަވަނީ އެ ބޭފުޅުން ކަމަށެވެ. އެ ވާހަކަ މިއަދު ޢަބްދުއްރަޙީމް ދައްކަވާއިރު، މިއޮތް ހުރިހާ ދުވަހު ޢަބްދުއްރަޙީމް ހުންނެވީ ހަ ފޮޅު ބޭރުގައި ކަމަށް ވެސް ރައީސް ޔާާމީން ވިދާޅުވި އެވެ. ސަރުކާރާއި، ރައީސް މުޢިއްޒުގެ ދިފާއުގައި މިއަދު ޢަބްދުއްރަޙީމް ކޮންމެ ވާހަކައެއް ދެއްކެވި ނަމަވެސް، ޢަބްދުއްރަޙީމް އާއި ރައީސް މުއިއްޒުގެ ގުޅުން ރަނގަޅު ނޫން ކަމަށް ވެސް ރައީސް ޔާމީން ވަނީ ފާހަގަ ކުރައްވައިފަ އެވެ.
ރައްޔިތުންގެ މަޖިލީހުގެ ޕީއެންސީގެ މެމްބަރުން ތިއްބެވީ "ދަރުބޮނޑިއެއްހެން ބަނދެވިފައި" ކަމަށް ވިދާޅުވެ ޢަބްދުއްރަޙީމް ދެއްކެވި ވާހަކަ އަށް އިޝާރާތް ކުރައްވައި ރައީސް ޔާމީން ވިދާޅުވީ، އެއީ މަޖިލިސް މެމްބަރުންނަށް ޢަބްދުއްރަޙީމް ކުރެއްވި މަލާމާތެއް ކަމަށެވެ. އެ ވާހަކަ އިން ދޭހަވީ ރައްޔިތުންގެ މަޖިލީހުގެ ޕީއެންސީގެ މެމްބަރުން ތިއްބެވީ ބަނދެވިފައިކަން ކަމަށާއި، އެމަނިކުފާނު ވެސް ދައްކަވަމުން އަންނަނީ އެ ވާހަކަ ކަމަށް ރައީސް ޔާމީން ވަނީ ވިދާޅުވެފައި އެވެ.
ސަރުކާރަށް ނިސްބަތް ކުރައްވައި ރައީސް ޔާާމީން ދެއްކެވި ވާހަކަ ތަކެއްގެ ސަބަބުން، ޕީއެންސީގެ އިސްވެރިން އަދި ރައީސް މުއިއްޒުގެ އަރިސް ބޭފުޅުން ގެންދަވަނީ ރައީސް ޔާމީން އަށް ވަރަށް ބޮޑަށް ރައްދު ދެއްވަމުންނެވެ.
