ރައީސް މުޢިއްޒު 2021 ވަނަ އަހަރު އޭސީސީ އަށް ހާޒިރު ކުރުމާ ގުޅޭ ގޮތުން ނެރުނު ނޫސް ބަޔާން އެ ކޮމިޝަން އިން ޑިލީޓު ކޮށްލައިފި

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު، މީގެ ކުރިން އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރު ކުރުމާ ގުޅޭ ގޮތުން އެ ކޮމިޝަން އިން ނެރެފައި އޮތް ނޫސް ބަޔާނެއް ޑިލީޓު ކޮށްލައިފި އެވެ.

މީގެ ކުރިން 2021 ވަނަ އަހަރުގެ މާޗު މަހުގެ ތެރޭގައި އޭސީސީ އިން ވަނީ ރައީސް މުޢިއްޒު އޭސީސީ އަށް ހާޒިރު ކޮށްފައި އެވެ. އެކަމާ ގުޅޭ ގޮތުން 2021 ވަނަ އަހަރުގެ މާޗު މަހުގެ ތެރޭގައި އޭސީސީ އިން ވަނީ ނޫސް ބަޔާނެއް ނެރެފައި އެވެ. 

2021 ވަނަ އަހަރުގެ މާޗު މަހުގެ 24 ވަނަ ދުވަހު އޭސީސީ އިން ނެރެފައިވާ ނޫސް ބަޔާނަކީ، "ކުރީގެ ހައުސިން މިނިސްޓަރު ޑޮކްޓަރު މުޙައްމަދު މުޢިއްޒު މިކޮމިޝަނަށް ހާޒިރުކުރުމާ ގުޅޭ" މި ސުރުޚީގެ ދަށުން އޮތް ނޫސް ބަޔާނެކެވެ. އޭސީސީގެ ރަސްމީ އެކްސް އެކައުންޓުގައި އެ ބަޔާންއާ ގުޅޭ ޕޯސްޓު މިހާރު ވެސް އެބަ އޮތެވެ. ނަމަވެސް، އެ ބަޔާން ފެންނާކަށް ނެތެވެ. 

އެ ޕޯސްޓުގައި ހިމަނާފައިވާ ލިންކަން ވަނުމުން މިހާރު ފެންނަނީ، "ހޯއްދަވަން އުޅުއްވި ޞަފްހާ ނުފެނުނު" ކަމަށެވެ. 

އޭސީސީ އިން އޭރު ބަޔާން ނެރެފައި ވަނީ ރައީސް މުޢިއްޒު އޭރު ދެއްކެވި ވާހަކަ އަކަށް ރައްދު ދިނުމުގެ ގޮތުންނެވެ. އޭރު ރައީސް މުޢިއްޒު ވިދާޅުވެފައި ވަނީ، އެމަނިކުފާނު އޭސީސީ އަށް ހާޒިރު ކޮށްފައި ވަނީ ސިޔާސީ ބޭނުމެއްގައި ކަމަށެވެ. ނަމަވެސް އޭސީސީ އިން ވަނީ އެ ވާހަކަތައް ދޮގު ކޮށްފައި އވެެ. 

އެގޮތުން އެ ބަޔާނުގައި އޭސީސީ އިން ބުނެފައި ވަނީ އޭރު ރައީސް މުޢިއްޒު އޭސީސީ އަށް ހާޒިރު ކުރީ ލޯކަލް ކައުންސިލް އިންތިޚާބަށް ނުފޫޒު ފޯރުވުމާއި، ވަކި ފަރާތަކުން އަންގައިގެން ކުރާ ކަމެއް ކަމަށް ދޭހަވާ ގޮތަށް ދައްކާ ވާހަކަ އަކީ އެއްވެސް ހަގީގަތެއް ނެތް ވާހަކަ ތަކެއް ކަމަށެވެ. އަދި އެ ދުވަހު ރައީސް މުޢިއްޒު އޭސީސީ އަށް ހާޒިރު ކުރުމުގެ ކުރިން، އެހެން ދުވަހެއްގައި ވެސް ހާޒިރު ކޮށްފައިވާ ކަމަށް އެ ބަޔާނުގައި ބުނެފައިވެ އެވެ. 

އޭސީސީ އިން އެ ބަޔާނުގައި ބުނެފައި ވަނީ 2021 މާޗު 23 ވަނަ ދުވަހު ރައީސް މުޢިއްޒު އޭސީސީ އަށް ހާޒިރު ކުރާ ކަމުގެ މައުލޫމާތު މީޑިއާ ތަކަށް ދީފައި ވަނީ އެ ކޮމިޝަން އިން ނޫން ކަމަށެވެ. އަދި ތަޙުގީގަށް ހާޒިރު ކުރާ ފަރާތްތަކާއި، އެ ފަރާތްތައް ހާޒިރު ކުރާ ދުވަހުގެ މައުލޫމާތު އާންމު އުސޫލުން ކޮމިޝަން އިން ނުދޭ ކަމަށް ވެސް އެ ބަޔާނުގައި ފާހަގަ ކޮށްފައިވެ އެވެ. 

ނަމަވެސް މިހާރު އޭސީސީ އިން ވަނީ އެ ބަޔާން ޑިލީޓު ކޮށްލައިފަ އެވެ. އޭސީސީގެ ވެބްސައިޓުގައި އެ ބަޔާން ފެންނަން ނެތްއިރު، އެ ބަޔާން ޑިލީޓު ކޮށްލި ސަބަބެއް ސާފެއް ނުވެ އެވެ. މިކަން މިހެން ދިމާވެފައިވާއިރު، ރައީސް މުޢިއްޒުގެ ސަރުކާރުން ވަނީ މިނިވަން މުއައްސަސާ ތަކުގެ ރައީސުންނާއި، ނައިބު ރައީސުން އައްޔަން ކުރައްވާނީ ރައީސުލްޖުމްހޫރިއްޔާ ކަމަށް ކަނޑައަޅައި، ޤާނޫނަށް ބަދަލު ގެނެސްފައި އެވެ.

ރައީސް މުޢިއްޒުއާ ގުޅޭ ގޮތުން މީގެ ކުރިން ނެރެފައިވާ ބަޔާނެއް އޭސީސީ އިން ޑިލީޓު ކޮށްލުމުން، ސޯޝަލް މީޑިއާގައި ވެސް ގިނަ ބަޔަކު އަންނަނީ އެކަމުގެ ނުރުހުން ފާޅު ކުރަމުންނެވެ. އަދި އެއީ ސަރުކާރުގެ ނުފޫޒު އޮވެގެން އޭސީސީ އިން ކޮށްފައިވާ ކަމެއް ކަމަށް ވެސް ބައެއް ފަރާތް ތަކުން ބުނެފައިވެ އެވެ.