ދެކުނު ކޮރެއާ އާއި އިންޑިއާ އިން ކަސްޓަމްސްގެ ދާއިރާ އިން ގުޅުން ބަދަހިކުރުމަށް އެއްބަސްވެއްޖެ

ދެކުނު ކޮރެއާ އާއި އިންޑިއާއާ ދެމެދު ކަސްޓަމްސްގެ ދާއިރާ އިން އޮންނަ ގުޅުން އިތުރަށް ވަރުގަދަކޮށް، ދެ ޤައުމުގެ ދެމެދުގައި ކުރެވޭ ވިޔަފާރިތަކަށް މަގުފަހިކޮށްދިނުމަށް އެއްބަސްވެއްޖެ އެވެ.

ދެކުނު ކޮރެއާގެ ކަސްޓަމްސް ސަރވިސް އިން މީޑިއާ އަށް މައުލޫމާތު ދީފައިވާ ގޮތުގައި، މި އެއްބަސްވުމަށް އާދެވުނީ އިންޑިއާގެ ވެރިރަށް ނިއު ދިއްލީގައި އިންޑިއާގެ ސެންޓްރަލް ބޯޑް އޮފް އިންޑައިރެކްޓް ޓެކްސަސް އެންޑް ކަސްޓަމްސްގެ އޮފިޝަލުންނާ އެކު ބޭއްވުނު ބައްދަލުވުމެއްގައި އެވެ. މި ބައްދަލުވުމުގައި ދެކުނު ކޮރެއާ އިން ވަނީ އިންޑިއާގައި ހަރަކާތްތެރިވާ ކޮރެއާގެ ވިޔަފާރިތަކަށް ކަސްޓަމްސް މަރުހަލާތައް ފަސޭހަ ކޮށްދިނުމަށް އިންޑިއާ ސަރުކާރުގެ އެހީތެރިކަމަށް އެދިފައި އެވެ.

މި ބައްދަލުވުމުގައި އިންޑިއާގައި ހަރަކާތްތެރިވާ ކޮރެއާގެ ކުންފުނިތަކަށް ކަސްޓަމްސްއާ ގުޅުންހުރި ކަންކަމުގައި ދިމާވާ ދަތިތަކުގެ މައުލޫމާތު ހިއްސާކޮށްފައިވެ އެވެ. އަދި ދެ ޤައުމުގެ ދެމެދުގައި ތަމްރީނު ޕްރޮގްރާމްތައް ހިންގުމާއި، އެކި ދާއިރާތަކުން ގުޅުން ބަދަހިކުރުމާ ބެހޭ ގޮތުން މަޝްވަރާ ކުރެވުނެވެ.

ކޭސީއެސްގެ އިންޓަނޭޝަނަލް އެފެއާޒްގެ ޑިރެކްޓަރ ޖެނެރަލް ހަން މިން ވިދާޅުވީ، އިންޑިއާ އަކީ ދެކުނު ކޮރެއާގެ މުހިންމު ބައިވެރިއެއް ކަމަށާއި، އިންޑިއާ އަށް މުދާ އެކްސްޕޯޓްކުރާ ކޮރެއާގެ ކުންފުނިތަކަށް ދިމާވާ ގޮންޖެހުންތަކަށް ހައްލު ހޯދައިދިނުމަށް ކުރިމަގުގައި ދެ ޤައުމުގެ ގުޅުން އިތުރަށް ވަރުގަދަ ކުރާނެ ކަމަށެވެ.