އަފްޣާނިސްތާން އިން ރާއްޖެ ބަލިކޮށްފި

ދިވެހި ރާއްޖޭގައި ފެށި ޑައިމަންޑް ޖުބިލީ އިންޓަނޭޝަނަލް މުބާރާތުގައި އަފްޣާނިސްތާންއާ ދެކޮޅަށް ކުޅުނު މެޗުން ދިވެހި ރާއްޖެ ބަލިވެއްޖެ އެވެ. 

މިއީ ރާއްޖޭގެ ފުޓުބޯޅަ އަށް 75 އަހަރު ފުރުމުގެ މުނާސަބަތުގައި ބާއްވާ މުބާރާތެކެވެ. މުބާރާތުގައި ޖުމުލަ ހަތަރު ޤައުމެއް ވާދަ ކުރެ އެވެ. އެއީ ރާއްޖެ އާއި އަފްޣާނިސްތާންގެ އިތުރުން ބަންގްލަދޭޝް އާއި ޕާކިސްތާން އެވެ. 

ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އަފްޣާނިސްތާން އިން ކާމިޔާބު ކުރީ 1-0 އިންނެވެ. މެޗުގައި އަފްޣާނިސްތާން އިން އެ ޓީމުގެ ހަމައެކަނި ލަނޑު ޖެހީ ވެސް ދެ ވަނަ ހާފުގަ އެވެ. 

މެޗުގެ ފުރަތަމަ ހާފުގައި ވެސް އަފްޣާނިސްތާން އިން ވަނީ ލަނޑު ޖަހަން ވަރަށް ބޮޑަށް މަސައްކަތް ކޮށްފަ އެވެ. ރާއްޖެ އިން ވެސް ވަނީ ލިބުނު ފުރުސަތު ތަކުގައި ލަނޑު ޖަހަން މަސައްކަތް ކޮށްފަ އެވެ. 

މެޗުގެ 80 ވަނަ މިނެޓުގައި އަފްޣާނިސްތާން އިން ވަނީ ރާއްޖެ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އަފްޣާނިސްތާން އަށް ޖަހައިދިނީ ރޯމަން ފާޒީ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެެއްގެ ގޮތުގަ އެވެ. 

މުބާރާތުގައި ރާއްޖޭގެ ފުރަތަމަ މެޗުގައި އަފްޣާނިސްތާން އަތުން ބަލިވެފައިވާއިރު، ދެ ވަނަ މެޗުގައި ޕާކިސްތާންއާ ދެކޮޅަށް ނިކުންނާނީ ބުރާސްފަތި ދުވަހުގެ ހަވީރު އެވެ. ބުރާސްފަތި ދުވަހުގެ ރޭ އަފްޣާނިސްތާން ނިކުންނާނީ ބަންގްލަދޭޝްއާ ދެކޮޅަށެވެ. ބަންގްލަދޭޝް އާއި ޕާކިސްތާން ބައްދަލު ކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެވެ.