އެފްއޭއެމް ފުޓްސަލް އެޓޯލް ޗެމްޕިއަންޝިޕް: އއ.އަތޮޅުގެ ޗެމްޕިއަންކަން މަތިވެރި ހޯދައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ފުޓްސަލް އެޓޯލް ޗެމްޕިއަންޝިޕްގެ އއ.އަތޮޅުގެ ޗެމްޕިއަންކަން މަތިވެރި އިން ހޯދައިފި އެވެ.

މަތިވެރި އިން ޗެމްޕިއަންކަން ހޯދީ އަންގާރަ ދުވަހުގެރޭ ކުޅުނު ފައިނަލް މެޗުގައި 1-0 އިން ބޮޑުފޮޅުދޫ ބަލިކޮށްގެންނެވެ. މެޗުގައި މަތިވެރީގެ ހަމައެކަނި ލަނޑު ޖެހީ ޒުވާން ކުޅުންތެރިޔާ އަލީ އަލްސަން އެވެ. ފައިނަލް މެޗުގެ މޮޅު ކުޅުންތެރިޔަކީ ވެސް އޭނާ އެވެ.

އަތޮޅު ޗެމްޕިއަންޝިޕްގައި އއ.އަތޮޅުން ބައިވެރިވީ ބޮޑުފޮޅުދޫ އާއި މަތިވެރި އެވެ. މިއާއެކު ދެ ޓީމަށް ވެސް ވަނީ ޒޯން ބުރުން ފުރުސަތު ލިބިފަ އެވެ.

އއ.އަތޮޅާ އެކު މިހާތަނަށް އަށް އަތޮޅެއްގެ ޗެމްޕިއަންޝިޕް ވަނީ ނިމިފައި އެވެ. މި މަހުގެ ހަ ވަނަ ދުވަހު އަތޮޅު ޗެމްޕިއަންޝިޕް ފެށީ ހަ ރަށަކުން ވާދަ ކުރި ބ. އަތޮޅުންނެވެ. މި އަތޮޅުގެ ފައިނަލްގެ ޖާގަ އާއެކު ޒޯނަށް ކޮލިފައިވީ ޗެމްޕިއަން އޭދަފުށްޓާއި ރަނަރަޕް ތުޅާދޫ އެވެ. ޅ. އަތޮޅުން ދެ ޓީމު ވާދަކުރި އިރު ނައިފަރު ބަލިކޮށް ޗެމްޕިއަންކަން ހޯދީ ހިންނަވަރެވެ. ރ. އަތޮޅު ފައިނަލްގައި އިނގުރައިދޫ ބަލިކޮށް ޗެމްޕިއަންކަން ހޯދީ ދުވާފަރެވެ.

ހަތަރު ޓީމު ވާދަކުރި ނ. އަތޮޅުގެ ޗެމްޕިއަންކަން ހޯދީ މަގޫދޫ އެން ސްޕޯޓްސް އެވެ. އެ ޓީމުން ވަނީ ފައިނަލްގައި މަނަދޫ ބަލިކޮށްފައި އެވެ. ހދ. އަތޮޅުން ހަ ޓީމު ވާދަ ކުރި އިރު، ޗެމްޕިއަންކަން ހޯދީ ފައިނަލްގައި ނައިވާދޫ ބަލި ކުރި ހަނިމާދޫ އެވެ. އަދި ފިއްލަދޫ ބަލިކޮށް އިހަވަންދޫ އިން ވަނީ ހއ. އަތޮޅުގެ ޗެމްޕިއަންކަން ހޯދައިފަ އެވެ.

އެފްއޭއެމް އިން ވަނީ ކުލަބު މޯލްޑިވްސް ކަޕް އާއި އެއިޓީން ތަރޓީ އަކީ ރާއްޖޭގެ ޤައުމީ މުބާރާތުގެ ގޮތުގައި ކަނޑައަޅައިފަ އެވެ. އަދި ކުލަބު މޯލްޑިވްސްއާ ގުޅިގެން ވަނީ މުޅި ރާއްޖެ ހިމެނޭހެން، ފުޓުބޯޅައިގެ އައު ލީގު ސިސްޓަމާ އެއް އުސޫލެއްގެ ދަށުން މޯލްޑިވްސް ފުޓްސަލް ލީގު ތައާރަފުކޮށްފަ އެވެ.

އަތޮޅު ޗެމްޕިއަންޝިޕްގައި ޖުމްލަ 59 ރަށަކުން ބައިވެރިވެފައިވާއިރު، ކެންމެ އަތޮޅަކުން ވެސް އެންމެ ގަދަ ދެ ޓީމު، ޒޯން ބުރަށް ކޮލިފައިވާނެ އެވެ. އަދި ޒޯން ބުރުގެ ގަދަ ދެ ޓީމު ކޮލިފައިވާނީ ރީޖަން ލީގަށެވެ. އެއަށްފަހު، ކޮންމެ ރީޖަނެއްގެ ޗެމްޕިއަން ޓީމު ކޮލިފައިވާނީ މޯލްޑިވްސް ފުޓްސަލް ލީގަށެވެ.

އަތޮޅު ފުޓްސަލްގެ ފޯމެޓު އެކުލަވާލެވިފައި ވަނީ މުޅި ރާއްޖެ ހަތަރު ރީޖަން އަކަށް ބަހާލައިގެންނެވެ. ނޯތު، ސެންޓްރަލް، ސައުތު އަދި މާލޭ ރީޖަން އަށް ބަހާލާފައި ވާއިރު، ނޯތު ރީޖަންގައި ހިމެނެނީ ހއ، ހދ، ށ، ނ، ރ، ބ އަދި ޅ އަތޮޅެވެ. ސެންޓްރަލް ރީޖަންގައި ހިމެނެނީ ކ، އއ، އދ، ވ، މ، ފ އަދި ދ އަތޮޅެވެ. ސައުތު ރީޖަންގައި ހިމެނެނީ އެންމެ ދެކުނުގައި އޮންނަ ތ، ލ، ގއ، ގދ، ޏ. އަދި ސ. އަތޮޅެވެ. އަދި ގްރޭޓާ މާލޭ ސަރަހައްދު އެއީ ވަކި ރީޖަން އެކެވެ.

ނޯތު ރީޖަންގެ ށ. އަތޮޅުގެ އިތުރުން ސެންޓްރަލް ރީޖަންގެ ވ. އަތޮޅާއި ސައުތު ރީޖަން އިން. ޏ އަދި ސ. އަތޮޅުން ވެސް އަތޮޅު ބުރުގައި ބައިވެރިވީ އެއް ޓީމެވެ. މިއާ ގުޅިގެން އެ ހަތަރު ރަށް ވެސް ވަނީ އޮޓަމެޓިކުން ޒޯން ބުރަށް ކޮލިފައިވެފައި އެވެ.

ހަމަ އެގޮތުން މާލޭ ރީޖަން އިން ވެސް މުބާރާތުގައި ބައިވެރިވީ އެންމެ ޓީމެކެވެ. އެއާ އެކު މާލޭ ރީޖަން އިން ވާދަ ކުރާ ހަމައެކަނި ޓީމަށް ވަނީ މޯލްޑިވްސް ފުޓްސަލް ލީގުގެ ޖާގައެއް ޔަގީންވެފައި އެވެ.

އެންމެ ފުރަތަމަ މޯލްޑިވްސް ފުޓްސަލް ލީގު ކުރިއަށްދާނީ 12 ޓީމާ އެކުއެވެ. ހަތަރު ރީޖަންގެ އެއް ވަނަ ޓީމުގެ އިތުރުން ދެން ހިމެނޭނީ ކްލަބް މޯލްޑިވްސް ކަޕްގެ ގަދަ އަށް ޓީމެވެ.