ޔަމަނުގައި ވަރުގަދަ ކުރިމަތިލުންތަކެއް، ބައެއް ރަށްތައް ސަރުކާރު ސިފައިންގެ ބާރުގެ ދަށަށް

ޔަމަނުގެ ސަރުކާރުގެ ސިފައިންނާއި ހޫޘީ ހަނގުރާމަވެރިންނާ ދެމެދު ކުރިއަށްދާ ވަރުގަދަ ކުރިމަތިލުންތަކުގައި، އެ ގައުމުގެ ހުޅަނގު ދެކުނުގައިވާ މުހިންމު ސަރަހައްދުތަކެއް އަލުން ސަރުކާރުގެ ބާރުގެ ދަށަށް ގެނެސްފައިވާ ކަމަށް ޔަމަނުގެ އަސްކަރިއްޔާއިން ބުނެފި އެވެ. ހުކުރު ދުވަހު ނެރުނު ބަޔާނެއްގައި ސަރުކާރުގެ ފައުޖުތަކުން ހާމަކޮށްފައިވާ ގޮތުގައި، ތާއިޒް ސިޓީގެ ހުޅަނގުން ޖަބަލް ހަބަޝީ ޑިސްޓްރިކްޓްގައި ހިމެނޭ އަލް-ޚަޒާން އަދި އަލް-މަކަހްނާ ފަރުބަދަތައް މިހާރު ވަނީ ސަރުކާރު ސިފައިންގެ ބާރުގެ ދަށަށް ގެންގޮސްފަ އެވެ.

ރަތް ކަނޑުގެ އައްސޭރިފަށުގައިވާ ދެ ގަވަރުނަރޭޓް ކަމަށްވާ ހުޅަނގު ތާއިޒް އަދި ދެކުނު ހުދައިދާގައި ސިފައިންނާއި ހޫޘީ ހަނގުރާމަވެރިން ހަމަލާ ބަދަލުކުރަމުންދާއިރު، މި ކުރިމަތިލުންތައް ފެށުނީ އައްސޭރިފަށުގެ ސަރަހައްދުތަކަށް ހޫޘީ ހަނގުރާމަވެރިން ވަރުގަދަ ހަމަލާތަކެއް ދޭން ފެށުމާ ގުޅިގެން އެވެ. ހޫޘީންގެ މަސްދަރަކުން ބުނީ، ބުރާސްފަތި ދުވަހު ފެށި މި ހަމަލާތަކުގައި މިހާތަނަށް ދެ ފަރާތުން ޖުމްލަ 100 އަށްވުރެ ގިނަ މީހުން މަރުވެފައިވާ ކަމަށެވެ.

ޔަމަނުގެ އަސްކަރިއްޔާގެ އޮފިޝަލަކު ވިދާޅުވީ، ހުޅަނގުގެ ސަރަހައްދުތަކަށް ހޫޘީން ދިން ހަމަލާތަކުގައި ސަރުކާރު ސިފައިންގެ 24 މީހުން މަރުވެފައިވާ ކަމަށާއި، ތާއިޒްގައި ހިނގި ކުރިމަތިލުންތަކުގައި އިތުރު 15 ސިފައިން މަރުވި ކަމަށެވެ. އަދި، ހޫޘީންގެ ބާރުގެ ދަށުގައިވާ ސަރަހައްދުތަކުގެ ސިއްހީ މަސްދަރުތަކުން ބުނީ، ހޫޘީންގެ 42 ހަނގުރާމަވެރިން މަރުވެފައިވާ ކަމަށެވެ. މީގެ އިތުރުން، އައްސޭރިފަށުގެ ސިޓީއެއް ކަމަށްވާ އަލް-މައްޚާގައި ހުރި ރެސްޓޯރަންޓަކަށް ދިން ބެލިސްޓިކް މިސައިލް ހަމަލާއެއްގައި އާންމުންގެ ބަޔަކު މަރުވެ، އިތުރު ބަޔަކު ޒަޚަމްވެފައިވާ ކަމަށް ސަރުކާރުން ހިންގާ ސަބާ ޓީވީން ވަނީ ރިޕޯޓްކޮށްފަ އެވެ. އަދި އޭއެފްޕީން އެއްކުރި މައުލޫމާތުތަކަށް ބަލާއިރު، ހޫޘީންގެ މި އާ ހަމަލާތައް ފެށި ފަހުން ޔަމަނުން މަރުވި މީހުންގެ ޖުމްލަ އަދަދު މިހާރު ވަނީ 120 އަށްވުރެ މައްޗަށް އަރާފަ އެވެ.

ހޫޘީންގެ އަމާޒަކީ އައްސޭރިފަށް ކޮންޓްރޯލްކުރުން

ބައިނަލްއަގުވާމީ މުޖުތަމައުން ބަލައިގަނެފައިވާ ޔަމަނު ސަރުކާރުގެ މައި މަރުކަޒު ކަމަށްވާ އަދަންގައި ހުންނެވި އޮފިޝަލަކު ވިދާޅުވީ، ހޫޘީންގެ ބޭނުމަކީ އައްސޭރިފަށަށް ހަމަލާދިނުމުގެ ކުރިން ބާބުލް މަންދަބް ކަނޑުއޮޅިއާއި އަލް-މައްޚާ ސިޓީ ކައިރީގައި އޮތް އުސްބިންތަކަށް އަތްގަދަކުރުން ކަމަށެވެ. އަދި، ބުރާސްފަތި ދުވަހުން ފެށިގެން ހޫޘީން ވަނީ ހުޅަނގު ތާއިޒްގެ ބައެއް ސަރަހައްދުތަކާއި، އަސްކަރީ ގޮތުން މުހިންމު މަރުކަޒެއް ހިމެނޭހެން ބައެއް ތަންތަން ހިފާފައި ކަމަށް ސަރުކާރުގެ އަސްކަރީ އޮފިޝަލަކު ވިދާޅުވި އެވެ. އެހެންކަމުން، ހުޅަނގު ތާއިޒްގައި ހޫޘީން ހޯދަމުންދާ ކުރިއެރުންތައް ހުއްޓުވުމަށް ޓަކައި ސަރުކާރުގެ އިތުރު ފައުޖުތައް އެ ސަރަހައްދަށް ފޮނުވާފައިވާ ކަމަށް ސަބާ ނޫސް އޭޖެންސީން ވަނީ ރިޕޯޓްކޮށްފަ އެވެ.

ޔަމަނުގެ މަސްރަހު ދިރާސާކުރާ ފަރާތްތަކުން ބުނީ، ހޫޘީންގެ މި ހަމަލާތަކުގެ މައިގަނޑު މަގްސަދަކީ އަލް-މައްޚާ ސިޓީއާއި އެ ސިޓީގެ ބަނދަރު ސަރަހައްދަށް އަތްގަދަކޮށް، އިތުރު ބިންތައް ހިފުން ކަމަށެެވެ. ރަތް ކަނޑާއި އަދަން ކަނޑުއޮޅި ގުޅުވައިދޭ ބާބުލް މަންދަބް ކަނޑުއޮޅި ކައިރީގައި އޮތް އަލް-މައްޚާ ބަނދަރު ސިޓީއަކީ ކުރިން ހޫޘީންގެ ބާރުގެ ދަށުގައި އޮތް ތަނެކެވެ. ނަމަވެސް، 2017 ވަނަ އަހަރު ސަރުކާރުގެ ފައުޖުތަކާއި ސައުދީ އަރަބިއްޔާއިން އިސްވެ އެކުލަވާލި އަސްކަރީ އިއްތިހާދުން ވަނީ އެ ސިޓީން ހޫޘީން ބޭރުކޮށްފަ އެވެ.

ހޫޘީ ހަނގުރާމަވެރިން ވަނީ މިދިޔަ ޖުލައި މަހު ސައުދީ އަރަބިއްޔާއާ ދެކޮޅަށް ކަނޑުގެ މަގުން ހިސާރެއް އިއުލާނުކޮށް، ކަނޑު ދަތުރުފަތުރަށް ހުރަސްއަޅަން ފަށާފައެވެ. ހޫޘީން ބާބުލް މަންދަބް ހިފަން ބޭނުން ވަނީ އަސްކަރީ ގޮތުން މުހިންމު ރޭވުންތަކެއްގެ ދަށުން ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. އެއީ، ކުރިއަށް އޮތް ތަނުގައި ސައުދީ އަރަބިއްޔާއާ ދެކޮޅަށް ނުވަތަ އިސްރާއީލާ ދެކޮޅަށް ކުރާ ހަނގުރާމަތަކުގައި އެ ފަރާތަށް ބޮޑު ފައިދާއެއް ލިބޭނެ ކަމެއް ކަމަށް މާހިރުން ގަބޫލުކުރެ އެވެ.