ނޭޕާލުގެ ފެންބޮޑުވުމުގައި މަރުވި މީހުންގެ އަދަދު 1،287ށް އަރައިފި، ފަސްހާހަށް ވުރެ ގިނަ މީހުން އަދިވެސް ގެއްލިފައި

ނޭޕާލަށް ކުރިމަތިވި ނުރައްކާތެރި ފެންބޮޑުވުމުގެ ހާދިސާތަކުގައި، އެ ގައުމުން މަދުވެގެން 1،287 މީހުން މަރުވެފައިވާ ކަމަށް އެ ގައުމުގެ ކާރިސާތަކާ ބެހޭ އިދާރާއިން ހުކުރު ދުވަހު ހާމަކޮށްފި އެވެ. މީގެ އިތުރުން، ގެއްލިގެން ހޯދަމުންދާ މީހުންގެ އަދަދު މިހާރު 5،083 އަށް އަރާފައިވާ ކަމަށްވެސް އެ އިދާރާއިން ބުނެ އެވެ.

ޗައިނާ-ނޭޕާލް ބޯޑަރު ސަރަހައްދުގައި ހިނގި މި ނުރާއްކާތެރި ހާދިސާގައި، ޗައިނާގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ޓިބެޓުން 21 މީހަކު މަރުވެ، 541 މީހަކު ވަނީ ގެއްލިފަ އެވެ. މިއާއެކު، އޮގަސްޓް މަހުގެ 26 ވަނަ ދުވަހު ގަނޑުފެންގަނޑުތަކާއި ހިލައާއި ކިސަޑު ފޭބުމުގެ ސަބަބުން މަރުވި މީހުންގެ ޖުމްލަ އަދަދު މިހާރު ވަނީ 1،308 އަށް އަރާފަ އެވެ. އަދި މިހާތަނަށް ޖުމްލަ 5،624 މީހަކު ގެއްލިފައިވާ ކަމަށް ރިޕޯޓްތައް ބުނެ އެވެ.

މި ހާދިސާގައި ގެއްލުނު މީހުންގެ ތެރޭގައި 800 އަށްވުރެ ގިނަ ބޭރު ގައުމުތަކުގެ މީހުން ހިމެނެ އެވެ. މީގެ ތެރޭގައި ހިމަލަޔާ ފަރުބަދަތަކަށް އެރި ޓްރެކަރުންނާއި، ހިންދޫންނާއި ބުދިސްޓުންގެ ދީނީ ބިމެއް ކަމަށްވާ ޓިބެޓްގެ ކައިލާޝް ފަރުބަދައަށް ޒިޔާރަތްކުރި މީހުން ހިމެނޭ ކަމަށް ކަމާބެހޭ ފަރާތްތަކުން މައުލޫމާތުދެ އެވެ.

އިންޑިއާގެ ކޯރުތަކުންވެސް މިހާތަނަށް މަދުވެގެން 17 މީހެއްގެ ހަށިގަނޑު ފެނިފައިވާއިރު، އޮފިޝަލުން ލަފާކުރާ ގޮތުގައި މިއީ ނޭޕާލުން އޮޔާދިޔަ މީހުންގެ ހަށިގަނޑުތަކެވެ. ނަމަވެސް، މި މީހުންނަކީ ކާރިސާގައި މަރުވި މީހުންގެ ރަސްމީ އަދަދުތަކުގެ ތެރޭގައި އަދި ހިމަނާފައިވާ ބައެއް ނޫނެވެ.