ނޭޕާލުގެ މަހުޖަނު ވަރުން ޗައުދަރީއަށް ރާއްޖޭގައި ދިމާވި ނުރައްކާތެރި ހާދިސާ އަކުން ސަލާމަތްވީ އަދާނީގެ ސަބަބުން ކަމަށް ބުނެފި
28 އޯގަސްޓު 2026 | ހުކުރު 10:14ނޭޕާލްގެ މަޝްހޫރު "ވައި ވައި" ބްރޭންޑްގެ ވެރިޔާ ވަރުން ޗައުދަރީ، އިންޑިއާގެ މަހުޖަނު ގޯތަމް އަދާނީއަކީ އޭނާގެ ފުރާނަ ސަލާމަތްކޮށްދިން މުހިންމު ފަރާތެއްގެ ގޮތުގައި ސިފަކޮށްފިއެވެ. އަދާނީއަކީ އޭނާގެ ވިޔަފާރީގެ މެންޓާއެއްގެ ގޮތުގައި ފާހަގަކުރަމުން، "ވައި ވައި" ބްރޭންޑް މިއަދު ދުނިޔޭގެ 100 އެއްހާ ގައުމަށް ފެތުރި، އެކި ދާއިރާތަކުން ވިޔަފާރި ފުޅާވެފައިވާކަން އޭނާ ބަޔާންކުރިއެވެ.
ސީޖީ ކޯޕް ގްލޯބަލްގެ މެނޭޖިންގ ޑިރެކްޓަރު ވަރުން ޗައުދަރީ | އެންޑީޓީވީ
ނޭޕާލްގެ މަޝްހޫރު ނޫޑްލްސް ބްރޭންޑް "ވައި ވައި" އުފައްދާ ސީޖީ ކޯޕް ގްލޯބަލްގެ މެނޭޖިންގ ޑިރެކްޓަރު ވަރުން ޗައުދަރީ، ދިވެހިރާއްޖޭގައި އޭނާއަށް ދިމާވި ނުރައްކާތެރި ހާދިސާއަކުން ފުރާނަ ސަލާމަތްވީ އިންޑިއާގެ މަހުޖަނު ގޯތަމް އަދާނީގެ އެހީތެރިކަމާ އެކު ކަމަށް ބުނެފި އެވެ. ޗައުދަރީ ބުނި ގޮތުގައި ރާއްޖޭގައި އޭނާއަށް ދިމާވި "ބޮޑު އެކްސިޑެންޓަކާ" ގުޅިގެން، އޭނާ ރާއްޖެއިން ބޭރަށް ގެންދިއުމަށްޓަކައި ޑޮކްޓަރުންނާއެކު ޕްރައިވެޓް ޖެޓެއް ފޮނުވައިދިނީ އަދާނީ އެވެ.
އެންޑީޓީވީ ވޯލްޑް އަންވިކްޝާ ސަމިޓުގައި ވާހަކަދައްކަމުން ޗައުދަރީ ބުނީ، ގޯތަމް އަދާނީއަކީ ހަމައެކަނި ވިޔަފާރީގެ ދާއިރާއިން އޭނާ ނަމޫނާއެއްގެ ގޮތުގައި ބަލާ ފަރާތެއް ނޫން ކަމަށާއި، އޭނާގެ ފުރާނަ ސަލާމަތްވުމުގެ ޝުކުރުވެސް ހައްގުވަނީ އަދާނީއަށް ކަމަށެވެ.
"އަޅުގަނޑު ބުނާނީ ގޯތަމް އަދާނީއަކީ އަޅުގަނޑުގެ މެންޓާއެއް (އިރުޝާދުދޭ ފަރާތެއް) ކަމަށް. އަދި އަޅުގަނޑު މިއަދު ދުނިޔޭގައި މިހުރީވެސް އޭނާގެ ސަބަބުން، އެދުވަހު ދިމާވި ހާދިސާއަށްފަހު،" ޗައުދަރީ ބުންޏެވެ. "ދިވެހިރާއްޖޭގައި އަޅުގަނޑަށް ވަރަށް ނުރައްކާތެރި އެކްސިޑެންޓެއް ދިމާވި. އެ ދުވަހު އަޅުގަނޑު އެ ގައުމުން ބޭރަށް ގެންދިއުމަށްޓަކައި ޑޮކްޓަރުންނާއެކު އޭނާ ޕްރައިވެޓް ޖެޓެއް ނުފޮނުވި ނަމަ، މިއަދު އަޅުގަނޑަށް ވާނެ ގޮތެއްވެސް ނޭނގޭ."
އަދާނީ އަށް ތައުރީފް ކުރަމުން ޗައުދަރީ ބުނީ އަދާނީއަކީ ވަރަށް އާދައިގެ ދިރިއުޅުމެއް އުޅުއްވާ ބޭފުޅެއް ކަމަށާއި، އޭނާއާ ބައްދަލުވާ ކޮންމެ ފަހަރަކީވެސް ވަރަށް އުފާވެރި އަދި ހިތްވަރު ލިބޭ ވަގުތުކޮޅެއް ކަމަށެވެ. އަދި އަދާނީ ކުރައްވާ ވިޔަފާރިއަކީ ތަސައްވަރުވެސް ނުކުރެވޭހާ ބޮޑު ވިޔަފާރިއަކަށް ވާއިރު، އެފަދަ ބޭފުޅެއްގެ އިރުޝާދު ލިބުމަކީ ކުރިއަށް ދިއުމަށް އޮތް ވަރަށް ބޮޑު ފުރުސަތެއްކަން އޭނާ ފާހަގަކުރި އެވެ.
ނަމަވެސް، ރާއްޖޭގައި މި އެކްސިޑެންޓް ހިނގީ ކޮން ތާރީޚެއްގައި ކަމެއް، އެކްސިޑެންޓް ދިމާވި ސަބަބެއް ނުވަތަ އޭނާއަށް ލިބުނު އަނިޔާތަކުގެ ތަފްސީލެއް ޗައުދަރީ ހާމައެއް ނުކުރެ އެވެ.
"ވައި ވައި" ބްރޭންޑް އުފައްދާ އާއިލީ ވިޔަފާރީގެ ޑިރެކްޓަރެއްގެ ގޮތުގައި ހުރި ޗައުދަރީ ސިފަކުރި ގޮތުގައި، އެ ކުންފުންޏަކީ ނޭޕާލްގެ އުފެއްދުމެއް ބައިނަލްއަގުވާމީ ފެންވަރުގައި ކާމިޔާބު ހޯދި އެންމެ ފާހަގަކޮށްލެވޭ އެއް މިސާލެވެ. އޭނާ ބުނީ "ވައި ވައި" އަކީ ނޭޕާލަށް އުފަންވެ، އެއްވެސް ޕާސްޕޯޓަކާ ނުލައި މުޅި ދުނިޔެއަށް ދަތުރުކުރި ބްރޭންޑެއް ކަމަށެވެ. އަދި އޭނާއާއި އޭނާގެ ބޭބެ އުމުރުން ހަ އަހަރުގައި ބޯޑިންގ ސްކޫލަށް ކިޔަވަން ދިޔައިރު، ނޭޕާލުން އިންޑިއާއަށާއި ދުނިޔޭގެ އެކި ކަންކޮޅުތަކަށް ކިޔަވަން ދިޔަ ކުދިންގެ ފަރާތުން މި ބްރޭންޑް ދުނިޔޭގެ އެކި ހިސާބުތަކަށް ފެތުރިގެން ދިޔަކަން އޭނާ ފާހަގަކުރިއެވެ.
ޗައުދަރީ ބުނި ގޮތުގައި އިންޑިއާއަކީ އެ ކުންފުންޏަށް ވަރަށް މުހިންމު މާކެޓެކެވެ. "ވައި ވައި" މިހާރު ދުނިޔޭގެ 100 އެއްހާ ގައުމުގައި ވިއްކަމުންދާއިރު، މިއީ އެ ކުންފުނީގެ ވިޔަފާރި އެހެން ދާއިރާތަކަށް ފުޅާކުރުމަށް ލިބުނު ވަރަށް ބޮޑު ބާރެއް ކަމަށް އޭނާ ބުންޏެވެ.
"ވައި ވައި ނޫޑްލްސްއަށް ލިބުނު ކާމިޔާބީގެ ސަބަބުން، މިއަދު އަޅުގަނޑުމެންގެ ގްރޫޕުން ދުނިޔޭގެ ފެންވަރުގައި ތަފާތު 15 ދާއިރާއަކުން ވިޔަފާރި ކުރަމުންދޭ،" ޗައުދަރީ ބުންޏެވެ.
