ހުރްމުޒް ކަނޑުއޮޅިން ދަތުރުކުރި ޔޫއޭއީގެ ދެ ތެޔޮ ބޯޓަކަށް އީރާނުން ދިން މިސައިލް ހަމަލާތަކެއްގައި އިންޑިއާ މީހަކު މަރުވެއްޖެ

ހުރްމުޒް ކަނޑުއޮޅިން ދަތުރުކުރި ޔުނައިޓެޑް އެރަބް އެމިރޭޓްސް (ޔޫއޭއީ) ގެ ތެޔޮ އުފުލާ ދެ ބޯޓަކަށް އީރާނުގެ ކްރޫޒް މިސައިލްތަކަކުން ހަމަލާދިނުމާ ގުޅިގެން، އިންޑިއާގެ ފަޅުވެރިއަކު މަރުވެ އިތުރު އަށް މީހަކު ޒަޚަމްވެފައިވާ ކަމަށް ޔޫއޭއީގެ މިނިސްޓްރީ އޮފް ޑިފެންސްއިން އަންގާރަ ދުވަހު ބުނެފިއެވެ.

މިއީ އިސްތިރާތީޖީ ގޮތުން މުހިންމު މި ކަނޑުއޮޅީގައި މަސްރަހު އިތުރަށް ގޯސްވެގެން ދިޔަ ދަނޑިވަޅެއްގައި ހިނގި ހާދިސާއެކެވެ.

މިނިސްޓްރީން ހާމަކުރި ގޮތުގައި، "މޮމްބާސާ" އަދި "އަލް ބަހިއްޔާ" ނަމަކަށް ކިޔާ މި ދެ ޓޭންކަރަށް ހަމަލާދީފައިވަނީ އޮމާންގެ ކަނޑުގެ ސަރަހައްދުން، ކަނޑުއޮޅީގެ ދެކުނު ލޭނުން ދަތުރުކުރަމުން ދަނިކޮށެވެ. މަރުވި ފަޅުވެރިޔާއަކީ މޮމްބާސާ ބޯޓުގައި މަސައްކަތް ކުރަމުންދިޔަ މީހެއް ކަމަށްވެސް އެ މިނިސްޓްރީން ބުނެފައިވެ އެވެ.

ޒަޚަމްވި އަށް މީހުންގެ ތެރެއިން ހަތަރު މީހެއްގެ ހާލު ސީރިއަސް ކަމަށް މިނިސްޓްރީން މައުލޫމާތުދެ އެވެ. މީގެ ތެރޭގައި ހިމެނެނީ އިންޑިއާގެ ހަ ރައްޔިތަކާއި ޔޫކްރެއިންގެ ދެ ރައްޔިތުންނެވެ.

މި ހަމަލާތަކުގެ ސަބަބުން ދެ ބޯޓުގައިވެސް އަލިފާން ރޯވެ، ބޮޑެތި ގެއްލުންތަކެއް ވަނީ ލިބިފަ އެވެ. ނަމަވެސް މިހާރު އަލިފާންގަނޑު ކޮންޓްރޯލް ކުރެވިފައިވާ ކަމަށް ޔޫއޭއީގެ ޑިފެންސް މިނިސްޓްރީން ބުނެ އެވެ.

ޔޫއޭއީން ވަނީ މިއީ "ފާޅުކަން ބޮޑު ހަމަލާއެއް" ކަމަށް ސިފަކޮށް އެކަން ކުށްވެރިކޮށްފަ އެވެ. އަދި މި ހަމަލާއާ ގުޅިގެން އަޅަންޖެހޭ ފިޔަވަޅުތައް އެޅުމުގެ ފުރިހަމަ ހައްގު ޔޫއޭއީއަށް ލިބިގެންވާ ކަމަށްވެސް އެ ގައުމުން ބުނެފައިވެ އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އަންގާރަ ދުވަހު ބުނި ގޮތުގައި، ތަކުރާރުކޮށް ދިން އިންޒާރުތަކަށް ނުކިޔަމަންތެރިވެ، ނެވިގޭޝަން ސިސްޓަމްތައް ނިއްވާލައި، މައިން އަޅާފައިވާ ސަރަހައްދަކުން ދަތުރުކުރަން އުޅުނު "ގަވާއިދާ ޚިލާފުވި" ދެ ސުޕަޓޭންކަރަކަށް ހަމަލާދީ ވަނީ ހުއްޓުވާފަ އެވެ.

އައިއާރުޖީސީގެ ބަޔާނުގައި އެއީ ކޮން ބޯޓުތަކެއްކަން ހާމަކޮށްފައެއް ނުވެ އެވެ. އެހެންކަމުން އެއީ ޔޫއޭއީގެ ޑިފެންސް މިނިސްޓްރީން ބުނާ ދެ ބޯޓު ކަމެއް ސާފެއް ނުވެ އެވެ.

އައިއާރުޖީސީގެ ބަޔާނުގައި އެމެރިކާއިން ބޯޓުފަހަރަށް "ގަވާއިދާ ޚިލާފު މަގުތަކުން ދަތުރުކުރުމަށް ހިތްވަރުދޭ" ކަމަށް ތުހުމަތުކޮށްފައިވެ އެވެ. އަދި "އިސްތިއުމާރީ ދުޝްމަނުންނާ" އެކު އެއްބާރުލުން ދިނުމުގެ ނަތީޖާއަކީ ގެއްލުންތަކާ ކުރިމަތިވުމާއި، ހުރްމުޒް ކަނޑުއޮޅި އަލުން ހުޅުވުން ލަސްވުމާއި، ދުނިޔޭގެ ހަކަތައިގެ ބާޒާރަށް ބޮޑު ނުތަނަވަސްކަމެއް ކުރިމަތިވުން ކަމަށްވެސް ބުނެފައިވެ އެވެ.

މީގެ އިތުރުން، ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން އަންގާރަ ދުވަހު ބުނީ، އޮމާންގެ ގަލްހާތުގެ އިރުއުތުރުން 40 ނޯޓިކަލް މޭލު ބޭރުން ދަތުރުކުރި ޓޭންކަރަކަށް ކޮންމެވެސް އެއްޗަކުން ހަމަލާދީފައިވާ ކަމަށެވެ.

ޔޫކޭއެމްޓީއޯއިން ބުނި ގޮތުގައި، އެ ބޯޓުގެ ކެޕްޓަން ރިޕޯޓުކޮށްފައިވަނީ ބޯޓުގެ ކަނާތްފަރާތު އިންޖީނު ރޫމަށް ހަމަލާއެއް އަރާފައިވާ ކަމަށާއި، ނަމަވެސް ހުރިހާ ފަޅުވެރިންގެ ހާލު ރަނގަޅު ކަމަށެވެ.

ރޮއިޓާސް ނިއުސް އެޖެންސީން ބުނެފައިވަނީ ޔޫކޭއެމްޓީއޯއިން ރިޕޯޓުކުރި ހާދިސާއާއި ޔޫއޭއީގެ ޑިފެންސް މިނިސްޓްރީން ރިޕޯޓުކުރި ހާދިސާއަކީ އެއް ހާދިސާއެއްކަން އަދި ކަށަވަރު ނުކުރެވޭ ކަމަށެވެ.

މި ހާދިސާތައް ހިނގާފައިވަނީ ފެބްރުއަރީ 28 ވަނަ ދުވަހު އެމެރިކާއާއި އިސްރާއީލުން އީރާނަށް ހަމަލާދޭން ފެށުމާ ގުޅިގެން އުފެދުނު ހަނގުރާމައިގެ ސަބަބުން މަސްރަހު ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ.

އެމެރިކާގެ ރައީސް ޑޮނަލްޑް ޓްރަމްޕް، އީރާނުގެ އުޅަނދުފަހަރު ދަތުރުކުރުން މަނާކޮށް ބްލޮކޭޑެއް އިއުލާނުކުރައްވައި، ހުރްމުޒް ކަނޑުއޮޅި ބެލެހެއްޓުމަށް 20 އިންސައްތައިގެ ފީއެއް ނަގަން ހުށަހެޅުއްވުމާ ގުޅިގެން، އެމެރިކާ ސިފައިން ވަނީ ހޯމަ ދުވަހުގެ ރޭ ޖެހިޖެހިގެން ތިންވަނަ ރެއަށް އީރާނަށް ހަމަލާތައް ދީފަ އެވެ.

ހުރްމުޒް ކަނޑުއޮޅީގެ ކޮންޓްރޯލް ހޯދުމަށް އީރާނާއި އެމެރިކާއާ ދެމެދު ހަމަލާތައް ބަދަލުކުރަމުންދާ ދަނޑިވަޅެއްގައި، އޮމާންގެ އައްސޭރިފަށުން ދަތުރުކުރި ޓޭންކަރަކަށް މިސައިލް ހަމަލާއެއް އަރާފައިވާ ކަމަށް ޔޫކޭއެމްޓީއޯއިން އަންގާރަ ދުވަހު ވަނީ ބުނެފަ އެވެ.

"ޔޫކޭއެމްޓީއޯއަށް ވަނީ އޮމާންގެ ލީމާގެ އިރުދެކުނުން 13 ނޯޓިކަލް މޭލު ބޭރުގައި ހިނގި ހާދިސާއެއްގެ ރިޕޯޓު ލިބިފައި. ދެކުނު މަގުން ބޭރަށް ދަތުރުކުރި ޓޭންކަރަކަށް މިސައިލް ހަމަލާއެއް އަރާފައިވާ ކަމަށް ވަނީ ރިޕޯޓުކޮށްފައި. ކަމާބެހޭ ފަރާތްތަކުން ދަނީ މިކަން ތަހުގީގު ކުރަމުން،" އިނގިރޭސިވިލާތުގެ އިދާރާއިން ނެރުނު ބަޔާނުގައިވެ އެވެ.

އީރާނުގެ އަސްކަރީ ކޮމާންޑުން ބުނެފައިވަނީ މި ކަނޑުއޮޅީގެ މުސްތަގުބަލު ކަނޑައެޅުމުގައި އެމެރިކާގެ އެއްވެސް ދައުރެއް ނެތް ކަމަށާއި، އެކަމުގެ ތެރެއަށް ވަނުމުގެ ފުރުސަތު އެމެރިކާއަށް ނުދޭނެ ކަމަށެވެ.

މި ހަނގުރާމައިގެ ސަބަބުން ގަލްފް ސަރަހައްދުގެ ހަމަޖެހުން ގެއްލި، މުޅި ސަރަހައްދަށް ވަނީ އޭގެ އަސަރު ފޯރާފަ އެވެ. އީރާނުން ދަނީ އެކި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދެމުންނެވެ. މީގެ އިތުރުން، ކަނޑުއޮޅި ހުޅުވުމަށާއި ހަމަލާތައް ހުއްޓާލުމަށް މިދިޔަ މަހު އެމެރިކާއާއި އީރާނާ ދެމެދު ވެވުނު ވަގުތީ އެއްބަސްވުމަށްވެސް މިހާރު ވަނީ ސުވާލު އުފެދިފަ އެވެ.

ފެބްރުއަރީ މަހު ހަނގުރާމަ ފެށުމުގެ ކުރިން، ދުނިޔޭގެ ތެލާއި ގޭހުގެ ވިޔަފާރީގެ ފަސްބައިކުޅަ އެއްބައި ދަތުރުކުރަނީ ހުރްމުޒް ކަނޑުއޮޅި މެދުވެރިކޮށެވެ. އެއީ ދުވާލަކު 15 މިލިއަނަށްވުރެ ގިނަ ފީފާ ތެޔޮ ކަމަށްވާއިރު، އޭގެ އަގު މަދުވެގެން 1.2 ބިލިއަން އެމެރިކާ ޑޮލަރަށް އަރައެވެ.