ނުގަވާއިދުން ހިޖުރަކުރާ މީހުން ހުއްޓުވަން ބަރނަމްއާއި މެކްރޮން މަޝްވަރާކުރައްވައިފި

އިނގިރޭސިވިލާތުގެ ބޮޑުވަޒީރު އެންޑީ ބަރނަމްއާއި ފަރަންސޭސިވިލާތުގެ ރައީސް އެމަނުއަލް މެކްރޮން ލަންޑަނުގައި ބޭއްވި ރަސްމީ ބައްދަލުވުމެއްގައި، އެ ޤައުމުތަކަށް ނުގަވާއިދުން ހިޖުރަކުރުމުގެ މައްސަލަތަކާއި، ޔޫކްރެއިން ހަނގުރާމަ އަދި ވިޔަފާރީގެ ދާއިރާއިން ގުޅުން ބަދަހިކުރުމާ ގުޅޭގޮތުން މަޝްވަރާ ކުރައްވައިފި އެވެ. ބަރނަމްގެ އޮފީސް ހުންނަ ޑައުނިންގް ސްޓްރީޓްގައި ބުރާސްފަތި ދުވަހު ބޭއްވި މި ބައްދަލުވުމަކީ، ޖުލައި މަހުގެ 20 ވަނަ ދުވަހު ލޭބަރ ޕާޓީގެ ކުރީގެ ލީޑަރު ކީރް ސްޓާމަރއަށްފަހު ވެރިކަމާ ހަވާލުވެވަޑައިގަތުމަށްފަހު، އޭނާ ވިލާތުގެ ގައުމެއްގެ ލީޑަރަކަށް މަރުހަބާ ވިދާޅުވި ފުރަތަމަ ފަހަރެވެ.

އިނގިރޭސިވިލާތުގެ ސަރުކާރުން ނެރުނު ނޫސްބަޔާނެއްގައިވާ ގޮތުން، ބަރނަމްއާއި މެކްރޮން ވަނީ ދެ ގައުމަށް ކުރިމަތިވެފައިވާ ގޮންޖެހުންތަކާ ގުޅޭގޮތުން ވާހަކަފުޅު ދައްކަވާފަ އެވެ. މީގެ ތެރޭގައި ކުދި ބޯޓުފަހަރުގައި އެ ދެ ގައުމަށް ނުގަވާއިދުން ހިޖުރަކުރާ މައްސަލައާއި، ލިޔެކިޔުން ނެތް ހިޖުރަވެރިންނާއި، ހިމާޔަތަށް އެދޭ މީހުން އިނގިރޭސިވިލާތުގެ ދެކުނު އައްސޭރިއަށް އުފުލުމަށް ބޭނުންކުރާ "މެގަ ޑިންގީ" ތަކުގެ މައްސަލަ ހިމެނެ އެވެ.

ޑައުނިންގް ސްޓްރީޓުން ބުނި ގޮތުގައި 2020 ވަނަ އަހަރަށްފަހު ކުދި ބޯޓުފަހަރުގައި އިނގިރޭސިވިލާތަށް އެތެރެވި މީހުންގެ އަދަދު އެންމެ ބޮޑަށް މަދުވެފައިވަނީ މިއަހަރެވެ. ނަމަވެސް، ނުރައްކާތެރި ދަތުރުތައް ކުރުވުމަށް މަގުފަހިކޮށްދޭ ކުށްކުރާ ގްރޫޕްތަކާ ދެކޮޅަށް ސަރުކާރުން ކުރާ މަސައްކަތްތައް ހުއްޓާނުލާނެ ކަމަށް އެ ބަޔާނުގައި ބުނެފައިވެ އެވެ.

މި ކަމަށް އިޖާބަދިނުމުގެ ގޮތުން، 'އިންގްލިޝް ޗެނަލް' ނުވަތަ އިނގިރޭސި ކަނޑުއޮޅި ހުރަސްކޮށް ހުއްދަނެތި ކުރާ ދަތުރުތައް ހުއްޓުވުމަށް އޭޕްރީލް މަހު ސޮއިކުރި އެއްބަސްވުމުގެ ދަށުން، ކުރިއަށް އޮތް ހަފުތާތަކުގައި ފަރަންސޭސިވިލާތުގެ ހުޅަނގު އައްސޭރީގެ ގޮނޑުދޮށްތަކަށް 45 އޮފިސަރުންގެ "ސާޖް ޓީމެއް" ފޮނުވާނެ ކަމަށް ފަރަންސޭސި ސަރުކާރުން ވަނީ ބުނެފަ އެވެ.

މި ބައްދަލުވުމުގައި ބަރނަމް ވިދާޅުވީ، މި ހޫނު މޫސުމުގައި ފެނިގެންދިޔަ ކުރިއެރުންތަކުން ހާމަވަނީ އިނގިރޭސިވިލާތާއި ފަރަންސޭސިވިލާތް ގުޅިގެން މަސައްކަތް ކުރުމުން ހާސިލުކުރެވޭނެ ކާމިޔާބީތައް ކަމަށެވެ. އިނގިރޭސިވިލާތުގެ ބޮޑުވަޒީރު ގެންދަވަނީ ބްރެކްސިޓަށްފަހު މަޑުޖެހިފައިވާ ގައުމުގެ އިގްތިސާދީ ކުރިއެރުން ހަލުވިކުރުމަށް ޓަކައި، ވިލާތުގެ ގައުމުތަކާއެކު ގާތް ގުޅުމެއް ބޭއްވުމަށް މަސައްކަތް ކުރައްވަމުންނެވެ.

އޭނާ ވިދާޅުވި ގޮތުގައި ވިލާތުގެ އިއްތިހާދާ (އީޔޫ) ގާތްވުމުގައި އިނގިރޭސިވިލާތުން މިއަށްވުރެ "ކެރޭ" ސިޔާސަތެއް ގެންގުޅެންޖެހެ އެވެ. ނަމަވެސް، އީޔޫގެ ސިންގަލް މާކެޓް ނުވަތަ ކަސްޓަމްސް ޔޫނިއަންއާ އަލުން ގުޅުމަށާއި، އެތެރޭގެ މިނިވަން ދަތުރުފަތުރުގެ އުސޫލުތަކަށް ރުޖޫއަވުމަށް އޭނާގެ ކުރިން ހުންނެވި ބޮޑުވަޒީރު ދެކޮޅު ހެއްދެވި ހެއްދެވުން ބަދަލުކުރަން ބަރނަލް ވަނީ އިންކާރު ކުރައްވާފަ އެވެ.

މިކަންކަން އިތުރަށް ގޯސްވަނީ، 27 ގައުމު ހިމެނޭ އީޔޫގެ ސްޓީލް ނުވަތަ ދަގަނޑުގެ ސިނާއަތް ހިމާޔަތްކުރުމަށް އެކުލަވާލާފައިވާ "މޭޑް އިން ޔޫރަޕް" އެޖެންޑާގެ ސަބަބުން، އިނގިރޭސިވިލާތުގެ ދަގަނޑުގެ ސިނާއަތަށް ގެއްލުންވެދާނެ ކަމުގެ ބިރު އޮތުމުންނެވެ. އިނގިރޭސިވިލާތުގެ ސަރުކާރުގެ ތަރުޖަމާނަކު ވިދާޅުވީ، "މޭޑް އިން ޔޫރަޕް" އެޖެންޑާގެ ސަބަބުން އިނގިރޭސިވިލާތުގެ ސިނާއަތްތަކަށް ބޮޑެތި ގޮންޖެހުންތަކެއް ކުރިމަތިވެދާނެ ގޮތްތައް ބޮޑުވަޒީރު ބަރނަމް ވަނީ މެކްރޮންއަށް ތަފްސީލުކޮށްދެއްވާފައި ކަމަށެވެ.

މެކްރޮން ވިދާޅުވީ މިއީ ދެ ގައުމުގެ ގުޅުމަށް "ވަރަށް މުހިންމު ވަގުތެއް" ކަމަށާއި، އޭނާ ލަންޑަނަށް ވަޑައިގަތީ ދެ ގައުމުގެ ގުޅުން އިތުރަށް ބަދަހިކުރުމުގެ އަޒުމާއި އިޚްލާޞްތެރިކަމާއެކު ކަމަށެވެ. ދިފާއީ ދާއިރާއާ ގުޅޭގޮތުން ޑައުނިންގް ސްޓްރީޓުން ބުނީ، އިނގިރޭސިވިލާތުގެ ޓެކްނޮލޮޖީ ބޭނުންކޮށްގެން އުފައްދާ ދުރު ރާސްތާގެ 'ސްކެލްޕް' މަރުކާގެ މިސައިލް ޔޫކްރެއިންގައި އުފެއްދުމަށް ކާރުޚާނާތަކެއް ގާއިމުކުރުމާ ގުޅޭގޮތުން ދެ އިސްވާރުން މަޝްވަރާ ކުރެއްވި ކަމަށެވެ. އަދި، މިދިޔަ ހަފުތާގައި ކީވްގައި ބޭއްވި 'ކޯލިޝަން އޮފް ދަ ވިލިންގް' ބައްދަލުވުމުގެ ކާމިޔާބީއާ މެދުވެސް ދެ ބޭފުޅުން ވާހަކަފުޅު ދެއްކެވި އެވެ.