އިންފަންޓީނޯގެ އިސްތިއުފާ އަށް ގޮވާލެއްވި ޤައުމެއްގެ ފުރަތަމަ ލީޑަރަކަށް އިނގިރޭސިވިލާތުގެ ބޮޑު ވަޒީރު ބާންހަމް!
3 އޯގަސްޓު 2026 | ހޯމަ 04:35ނޫސްވެރިންނާ ވާހަކަ ދައްކަވަމުން ބޮޑު ވަޒީރު ބާންހަމް ވިދާޅުވީ، ވޯލްޑް ކަޕްގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް އިންފަންޓީނޯ ހުށަހެއްޅުވި ހުށަހެޅުމަކީ ބަލައި ގަނެވޭނެ ކަމެއް ނޫން ކަމަށް. އަދި މިފަދަ ޚިޔާލެއް ފީފާގެ ތެރެއިން އައުމަކީ ވެސް، އެ އިދާރާގެ ރައީސްގެ މަޤާމުގައި ހުންނެވުމަށް އިންފަންޓީނޯ އަކީ އެންމެ އެކަށީގެންވާ ބޭފުޅާ ނޫންކަން ހާމަވާ ކަމެއް ކަމަށް ވެސް ބޮޑު ވަޒީރު ބާންހަމް ވަނީ ވިދާޅުވެފައި
އިނގިރޭސިވިލާތުގެ ބޮޑު ވަޒީރު އެންޑީ ބާންހަމް އާއި ފީފާގެ ރައީސް ޖިއާނީ އިންފަންޓީނޯ | ސޯޝަލް މީޑިއާ
ދުނިޔޭގެ ފުޓުބޯޅައިގެ މައި އިދާާރާ ފީފާގެ ރައީސް ޖިއާނީ އިންފަންޓީނޯ އިސްތިއުފާ ދެއްވުމަށް، އިނގިރޭސިވިލާތުގެ ބޮޑު ވަޒީރު އެންޑީ ބާންހަމް ގޮވާލައްވައިފި އެވެ.
މިއީ ފީފާ ވޯލްޑް ކަޕްގެ ހިއްސާ ވިއްކާލުމަށް އިންފަންޓީނޯ ގެންގުޅުއްވި ވިސްނުމާ ދެކޮޅަށް އެތައް ބަޔަކު ނުކުމެ، އެންމެ ފަހުން އެކަން ހުއްޓާލާފައި ވަނިކޮށް އިނގިރޭސިވިލާތުގެ ބޮޑު ވަޒީރު ގޮވާލެއްވި ގޮވާލުމެކެވެ. މިއީ އިންފަންޓީނޯގެ އިސްތިއުފާ އަށް ދުނިޔޭގެ ޤައުމެއްގެ ލީޑަރުންގެ ތެރެއިން، އިންފަންޓީނޯގެ އިސްތިއުފާ އަށް ގޮވާލެއްވި ފުރަތަމަ ބޭފުޅާ އެވެ.
ނޫސްވެރިންނާ ވާހަކަ ދައްކަވަމުން ބޮޑު ވަޒީރު ބާންހަމް ވިދާޅުވީ، ވޯލްޑް ކަޕްގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް އިންފަންޓީނޯ ހުށަހެއްޅުވި ހުށަހެޅުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މިފަދަ ޚިޔާލެއް ފީފާގެ ތެރެއިން އައުމަކީ ވެސް، އެ އިދާރާގެ ރައީސްގެ މަޤާމުގައި ހުންނެވުމަށް އިންފަންޓީނޯ އަކީ އެންމެ އެކަށީގެންވާ ބޭފުޅާ ނޫންކަން ހާމަވާ ކަމެއް ކަމަށް ވެސް ބޮޑު ވަޒީރު ބާންހަމް ވަނީ ވިދާޅުވެފައި އެވެ.
ފުޓުބޯޅަ އަށް ބޮޑު ޝައުޤުވެރި ކަމެއް ހުންނަވާ، އަދި އެވަޓަން އަށް ސަޕޯޓު ކުރައްވާ ބާންހަމް ވިދާޅުވީ، ފުޓުބޯޅަ އަކީ އިންވެސްޓަރުންގެ މިލްކެއް ނޫން ކަމަށާއި، އެއީ ކޮންމެ ހަފުތާ އަކު ދަނޑަށް ވަދެ ސަޕޯޓުކުރާ އާންމު ރައްޔިތުންގެ އެއްޗެއް ކަމަށެވެ. އަދި ވޯލްޑް ކަޕް އަކީ ދުނިޔޭގެ ކުޅިވަރުގެ އެންމެ ބޮޑު މުބާރާތް ކަމަށާއި، އެއީ އެއްވެސް މީހަކަށް ވިއްކާލެވޭނެ އުފެއްދުމެއް ނޫން ކަމަށެވެ.
އިނގިރޭސިވިލާތުގެ ބޮޑު ވަޒީރު އެންޑީ ބާންހަމް ދެއްކެވި ވާހަކައިގެ ތެރެއިން
ފީފާގެ ޕްލޭންއާ ގުޅޭ ގޮތުން މީގެ ކުރިން ވެސް ބާންހަމް ވަނީ، އެކަމާ ދެކޮޅަށް ވާހަކަ ދައްކަވައި ސޯޝަލް މީޑިއާގައި ވެސް ޕޯސްޓު ކުރައްވައިފަ އެވެ. އެ ޕޯސްޓުގައި ވެސް ބާންހަމް ވަނީ ފުޓުބޯޅަ އަކީ ވިޔަފާރިވެރިންގެ އެއްޗެއް ނޫން ކަމަށް ވިދާޅުވެ، އެ ނިންމުމާ ދެކޮޅު ހައްދަވައިފަ އެވެ. މި ފަހުގެ އިންޓަވިޔުގައި ބާާންހަމް ވިދާޅުވެފައި ވަނީ، އިންފަންޓީނޯ އަކީ ފުޓުބޯޅަ ލީޑު ކުރަން އެންމެ ރަނގަޅު ބޭފުޅާގެ ގޮތުގައި ދެކިވަޑައިނުގަންނަވާ ކަަމަށެވެ.
ބާންހަމްގެ އިތުރުން، ދުނިޔޭގެ ފުޓުބޯޅައިގެ އެކި ފަރާތްތަކުން އަންނަނީ އިންފަންޓީނޯ އަށް ފާޑު ކިޔަމުންނެވެ. ޔުއެފާ އާއި ކޮންކާކަފް އިން ވެސް ބުނެފައި ވަނީ، އިންފަންޓީނޯ އަށް ކުރަމުން އައި އިތުބާރު ގެއްލިފައިވާ ކަމަށެވެ.
