ޔޫކްރެއިންގެ ހަމަލާތަކުން ރަޝިއާގެ ތެލާއި އަސްކަރީ މަރުކަޒުތަކަށް ގެއްލުންދީފި
15 އޯގަސްޓު 2026 | ހޮނިހިރު 13:04ރަޝިއާގެ ސަމާރާގައި ހުންނަ ރޮކެޓާއި ފަޒާގެ ދިރާސާތައް ކުރާ މަރުކަޒަކަށް ޔޫކްރެއިންގެ އަސްކަރިއްޔާއިން ވަރުގަދަ ހަމަލާތަކެއް ދީފި. މީގެ އިތުރުން ރަޝިއާގެ ހަނގުރާމަމަތީ ބޯޓުތައް ބޭނުންކުރާ ސަވަސްލޭކާ އަސްކަރީ ވައިގެ ބަނދަރަށް ވެސް ހަމަލާދީފައިވާ ކަމަށް ރައީސް ޒެލެންސްކީ ވަނީ ހާމަކުރައްވާފައި
ރަޝިޔާ އާއި ޔޫކްރެއިންއާ ދެމެދު ހިނގަމުންދާ ހަނގުރާމައިގެ ތެރެއިން، 2026 ޖޫން 18 ގައި ރަޝިޔާގެ މޮސްކޯގައި ހުންނަ ތެޔޮ ސާފުކުރާ ކާރުޚާނާއަކަށް ޔޫކްރެއިންއިން ޑްރޯން ހަމަލާއެއް ވަނީ ދީފަ. މި ހަމަލާއާ ގުޅިގެން އެ ސަރަހައްދުން ދަނީ ބޯ ދުން އަރަމުން (ފައިލް) | ރޮއިޓާސް
ޔޫކްރެއިންގެ އަސްކަރިއްޔާއިން ރަޝިއާގެ އުސްތު-ލޫގާގައި ހުންނަ ތެޔޮ ރައްކާކުރާ މަރުކަޒަކަށް ހަމަލާދީފައިވާ ކަމަށް އެ ގައުމުގެ ރައީސް ވޮލޮޑިމިއަރ ޒެލެންސްކީ ހޮނިހިރު ދުވަހު ވިދާޅުވެއްޖެ އެވެ.
ރަޝިޔާގެ ރޮކެޓް އުފައްދާ މަރުކަޒަކަށް ޔޫކްރެއިނުން ދިން ހަމަލާ
ޓެލެގްރާމް މެދުވެރިކޮށް ދެއްވި ބަޔާނުގައި، އެއީ ސީދާ ކޮން މަރުކަޒެއްކަން ޒެލެންސްކީ ހާމަކުރައްވާފައެއް ނުވެ އެވެ. ނަމަވެސް، ޔޫކްރެއިންގެ މި ހަމަލާގެ ސަބަބުން އެ ތަނަށް ބޮޑެތި ގެއްލުންތަކެއް ލިބިފައިވާ ކަމަށް އޭނާ ވިދާޅުވި އެވެ.
މީގެ އިތުރުން، ރަޝިއާގެ ސަމާރާގައި ހުންނަ ރޮކެޓާއި ފަޒާގެ ދިރާސާތައް ކުރާ މަރުކަޒަކަށް ވެސް ޔޫކްރެއިންގެ އަސްކަރިއްޔާއިން ހަމަލާދީފައިވާ ކަމަށް ރައީސް ޒެލެންސްކީ އިތުރަށް ވިދާޅުވި އެވެ.
ރަޝިއާގެ ހަނގުރާމަމަތީ ބޯޓުތައް ބޭނުންކުރާ ސަވަސްލޭކާ އަސްކަރީ ވައިގެ ބަނދަރަށް ވެސް ޔޫކްރެއިންގެ ސިފައިން ހަމަލާދީފައިވާ ކަމަށް ރިޕޯޓުތައް ބުނާ ކަމަށް ޒެލެންސްކީ ވިދާޅުވި އެވެ.
