އީރާނުން ހަމަލާދީ ކުވައިތުގެ އަލީ އަލް-ސާލިމް އެއާ ބޭސްގައި ހުރި އެމެރިކާގެ ކޮމާންޑަރުންގެ ކޮމްޕައުންޑް ސުންނާފަތި ކޮށްލައިފި
2 ސެޕްޓެމްބަރު 2026 | ބުދަ 09:58އީރާނުގެ އާންމުންނަށް އަމާޒުކޮށް އެމެރިކާއިން ދިން ހަމަލާތަކުގެ ބަދަލުހިފުމުގެ ގޮތުން، ކުވައިތާއި އުރުދުން އަދި ބަހްރައިންގައި ހުރި އެމެރިކާގެ އަސްކަރީ މަރުކަޒުތަކަށް އައި.އާރު.ޖީ.ސީ އިން ވަރުގަދަ ހަމަލާތަކެއް ދީފި. މި ހަމަލާތަކުގައި އެމެރިކާގެ އަސްކަރީ މަރުކަޒުތަކަށް ބޮޑެތި ގެއްލުންތަކެއް ލިބިފައިވާއިރު، ދެ ގައުމުގެ ދެމެދުގައި އުފެދިފައިވާ އަސްކަރީ ނުތަނަވަސްކަން ވަނީ އިތުރަށް ބޮޑުވެފައި
އެމެރިކާގެ އަސްކަރީ މަރުކަޒުތަކަށް އަމާޒުކޮށް، ބަދަލުހިފުމުގެ ގޮތުން އީރާނުން ވަރުގަދަ މިސައިލް ހަމަލާތަކެއް ދީފި | ޕްރެސްޓީވީ
ކުވައިތުގައި ހުންނަ އަލީ އަލް-ސާލިމް އެއާ ބޭސްގައި ހުރި އެމެރިކާގެ ކޮމާންޑަރުގެ ކޮމްޕައުންޑާއި، ދިރިއުޅޭ ސަރަހައްދުގެ އިތުރުން ޑްރޯން ހޭންގަރުތަކަކަށް ހަމަލާދީ ބޮޑެތި ގެއްލުންތަކެއް ދީފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނެފި އެވެ. މި ހަމަލާގައި ޑްރޯންތައް ބަހައްޓާ ހޭންގަރެއްގައާއި ޑްރޯން ފޮނުވާލުމަށް ބޭނުންކުރާ ރޭމްޕުގައި އަލިފާން ރޯވެ، ގިނަ އަދަދެއްގެ ޑްރޯންތައް ސުންނާފަތިވެފައިވާ ކަމަށް އެ އިދާރާއިން މައުލޫމާތުދެ އެވެ.
އައި.އާރު.ޖީ.ސީގެ ޕަބްލިކް ރިލޭޝަންސް ޑިޕާޓްމަންޓުން ބުދަ ދުވަހު ނެރުނު ބަޔާނެއްގައި ބުނެފައިވަނީ، މި އޮޕަރޭޝަނަކީ އީރާނުގެ އާންމު ރައްޔިތުންނަށް އަމާޒުކޮށް އެމެރިކާއިން ދިން ހަމަލާތަކުގެ ބަދަލުހިފުމުގެ ގޮތުން ހިންގި އޮޕަރޭޝަނެއް ކަމަށެވެ.
އެމެރިކާގެ އަސްކަރިއްޔާއިން އީރާނުގެ ދެކުނުގެ ސިރިކް ސަރަހައްދުގައި ހުރި އާންމުން ދިރިއުޅޭ ގެއަކަށް ބޮން އެޅުމުގެ ސަބަބުން، އެތަނުގައި ކުރިއަށްދިޔަ ސުންނީ ޒުވާން ދެމަފިރިއެއްގެ ކައިވެނީގެ ހަފުލާ ހިތާމަވެރި މާޔޫސްކަމަކަށް ބަދަލުވެގެންދިޔަ ކަމަށް އެ ބަޔާނުގައި ފާހަގަކޮށްފައިވެ އެވެ.
އެމެރިކާގެ އެ ހަމަލާގައި 70 އެއްހާ އާންމުންނަށް އަސަރުކޮށްފައިވާއިރު، ކުޑަކުއްޖަކު ހިމެނޭހެން ފަސް މީހަކު ވަނީ މަރުވެފަ އެވެ.
"މި ޖަރީމާގެ ބަދަލުހިފުމުގެ ގޮތުން، މިއަދު ފަތިހުގެ ވަގުތެއްގައި އައި.އާރު.ޖީ.ސީގެ ގްރައުންޑް ފޯސްގެ ހިތްވަރުގަދަ މުޖާހިދުން ވަނީ އުރުދުން، ބަހްރައިން އަދި އީރްބީލްގައި ހުރި އެމެރިކާގެ އަސްކަރީ މަރުކަޒުތަކަށް ދިން ހަމަލާތަކާ އެކުއެކީގައި، އަލީ އަލް-ސާލިމް ބޭސްގައި ހުރި އެމެރިކާގެ ކޮމާންޑަރުގެ ކޮމާންޑް ސެންޓަރަށާއި ދިރިއުޅޭ ތަނަށް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފައި،" އައި.އާރު.ޖީ.ސީގެ ބަޔާނުގައިވެ އެވެ.
އައި.އާރު.ޖީ.ސީން އިތުރަށް ބުނި ގޮތުގައި، މި ހަމަލާގައި އެމެރިކާގެ އަސްކަރިއްޔާގެ ބައެއް މީހުން ވަނީ މަރުވެފަ އެވެ. އަދި ކޮމާންޑް ސެންޓަރަށް ދިން ހަމަލާއަށްފަހު، އީރާނަށް ހަމަލާދިނުމަށް ބޭނުންކުރާ ޑްރޯންތައް ބަހައްޓާ ހޭންގަރަށާއި އެ ތަކެތި އުދުއްސާލަން ބޭނުންކުރާ ރޭމްޕަށް ހަމަލާދީފައިވާ ކަމަށާއި، އޭގެ ސަބަބުން ގިނަ އަދަދެއްގެ ޑްރޯންތައް ހަލާކުވެ ހޭންގަރުގައި ބޮޑު އަލިފާންގަނޑެއް ރޯވި ކަމަށްވެސް ބުނެފައިވެ އެވެ.
ކުވައިތުގެ ރައްޔިތުންނާ މުހާތަބުކޮށް އައި.އާރު.ޖީ.ސީން ބުނީ، "ތިޔަބައިމީހުންނާ މެދު އަހަރެމެންގެ ހިތްތަކުގައި އޮތް ލޯތްބާއި ގާތްކަން ތިޔަބައިމީހުންނަށް ރަނގަޅަށް އެނގޭނެ. އަހަރެމެންނަށް ލިބޭ އެންމެ ބޮޑު ހިތާމައަކީ އަދި ކަންބޮޑުވުމަކީ، ކުޑަކުދިން މަރާ ޓެރަރިސްޓް އެމެރިކާގެ އަސްކަރިއްޔާއިން އިސްލާމީ ބިންތައް އިސްތިއުމާރުކޮށްގެން ތިބުން،" ކަމަށެވެ.
މި ހަމަލާތަކުގެ މަގުސަދަކީ ކުވައިތުގެ މާތް ބިމާއި ދީލަތި ވަޒަން، އެމެރިކާގެ "ކާފަރުންގެ" ކިބައިން ސާފުކުރުން ކަމަށްވެސް އެ ބަޔާނުގައި ބުނެފައިވެ އެވެ.
އައި.އާރު.ޖީ.ސީން ވަނީ އެމެރިކާގެ ނުފޫޒާއި ޒަޔަނިސްޓް ރެޖީމް ނެތިގޮސް، އިސްތިއުމާރުކުރާ އަނިޔާވެރިންގެ ކިބައިން ކުވައިތުގެ މާތް ރައްޔިތުންނަށް މިނިވަންކަމާއި މުސްތަގިއްލުކަން ލިބޭނެ ކަމަށް އުންމީދުކުރާ ކަމަށް ބުނެފަ އެވެ.
އައި.އާރު.ޖީ.ސީން މި ބަދަލުހިފުމުގެ ހަމަލާތައް ދީފައިވަނީ، އެމެރިކާއިން އީރާނުގެ ސިސްތާން އަދި ބަލޫޗިސްތާން ޕްރޮވިންސްގެ ޗަބަހާރާއި ކޮނަރަކް ހިމެނޭހެން އެކި ސަރަހައްދުތަކަށް ދިން އުދުވާނީ ހަމަލާތަކަކާ ގުޅިގެންނެވެ.
އެމެރިކާގެ ޓެރަރިސްޓް ސެންޓްރަލް ކޮމާންޑް (ސެންޓްކޮމް) އިން ނެރުނު ބަޔާނެއްގައި ބުނެފައިވަނީ، އެ ގައުމުން ވައިގެ ހަމަލާތައް ދިނީ ހުރްމުޒް ކަނޑުއޮޅީގައި ކަނޑު އަޑީގެ މައިން ވަޅުލުމަށް އީރާނުގެ އައި.އާރު.ޖީ.ސީން ކުރި މަސައްކަތްތަކާއި، އުރުދުންގައި ހުންނަ އެމެރިކާގެ އަސްކަރީ މަރުކަޒަކަށް ދިން މިސައިލް ހަމަލާތަކުގެ ބަދަލުހިފުމުގެ ގޮތުން ކަމަށެވެ. ނަމަވެސް އީރާނުގެ އަސްކަރީ މަސްދަރުތަކުން ވަނީ އެމެރިކާގެ މި ތުހުމަތުތައް ދޮގުކޮށްފަ އެވެ.
މި ކުރިމަތިލުންތައް ވަރުގަދަވެފައި މިވަނީ، ހުރްމުޒް ކަނޑުއޮޅީގައި އޮންނަ އީރާނުގެ ލަރަކް ރަށަށް އެމެރިކާއިން ހަމަލާދިންތާ މަދު ދުވަސްކޮޅެއްގެ ތެރޭގަ އެވެ. ވޮޝިންގްޓަނުން ބުނާ ގޮތުގައި އެ ހަމަލާއަކީ އީރާނުން ކަނޑުގައި މައިން ވަޅުލުން ހުއްޓުވުމަށް ދިން ހަމަލާއެކެވެ.
އެކަމުގެ ރައްދުގައި އީރާނުން ވަނީ އުރުދުންއާއި ޔުނައިޓެޑް އަރަބް އެމިރޭޓްސް (ޔޫ.އޭ.އީ) ގައި ތިބި އެމެރިކާގެ ސިފައިންނަށް އަމާޒުކޮށް މިސައިލާއި ޑްރޯން ހަމަލާތަކެއް ދީފަ އެވެ.
އީރާނުގެ ދެކުނުގެ ޕްރޮވިންސްތަކުގައި ހުރި އަސްކަރީ މަރުކަޒުތަކަށް އެމެރިކާއިން ދެމުންދާ ވައިގެ ހަމަލާތަކާ ގުޅިގެން، އެމެރިކާއަށް "ފުނޑުފުނޑުކޮށްލަނިވި" ވަރުގަދަ ހަމަލާތަކެއް ދޭނެ ކަމަށް އީރާނުގެ ހަތިޔާރު އެޅި ސިފައިން ވަނީ ވައުދުވެފަ އެވެ.
