ޔޫއޭއީގައި ހުރި އެމެރިކާގެ އަސްކަރީ މަރުކަޒުތަކަށް އީރާން އިން ޑްރޯން ހަމަލާ ދީފި

ޔުނައިޓެޑް އަރަބް އެމިރޭޓްސް (ޔޫއޭއީ) ގައި ގާއިމުކޮށްފައިވާ އެމެރިކާގެ އަސްކަރީ ދެ މަރުކަޒަކަށް އަމާޒުކޮށް ޑްރޯން ހަމަލާތަކެއް ދީފައިވާނެ ކަމަށް އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ.

އީރާންގެ ދައުލަތުގެ މީޑިއާތަކުން ރިޕޯޓުކޮށްފައިވާ ގޮތުގައި މި ހަމަލާތައް ދީފައި ވަނީ ޔޫއޭއީގައި ހުންނަ އަލް ދާފްރާ އެއަރބޭސް އާއި، އަލް މިންހަދު އެއަރބޭސް އަށެވެ.

އައިއާރުޖީސީ އިން ނެރުނު ބަޔާނެއްގައި ބުނެފައި ވަނީ، ބުދަ ދުވަހުގެ ފަތިހުން ފެށިގެން އެމެރިކާގެ ސިފައިން އާންމުންނަށް އަމާޒުކޮށް ދެމުންދާ ހަމަލާތަކުގެ ބަދަލު ހިފުމުގެ ގޮތުން، އެމެރިކާގެ އަސްކަރީ މަރުކަޒުތަކުގެ ރޭޑާ ސިސްޓަމްތަކާއި ސިފައިން ތިބޭ ތަންތަނަށް އަމާޒުކޮށް ގިނަ އަދަދެއްގެ "ކަމިކާޒޭ" ޑްރޯން ބޭނުން ކޮށްގެން ހަމަލާ ދީފައިވާ ކަމަށެވެ. ނަމަވެސް މި ހަމަލާތަކާ ގުޅޭ ގޮތުން ޔޫއޭއީގެ ސަރުކާރުން މިހާތަނަށް އެއްވެސް އެއްޗެއް ބުނެފައި ނުވެ އެވެ.

އީރާންގެ އަސްކަރިއްޔާ އިން ސިފަކުރި ގޮތުގައި އަލް ދާފްރާ އެއާ ބޭސް އަކީ މި ސަރަހައްދުގައި އެމެރިކާ އިން ހިންގާ ޖަރީމާތަކުގެ މައި މަރުކަޒެވެ. އަދި އެ ތަނަކީ ވައިގެ މަގުން ދޭ ހަމަލާތަކާއި ޖާސޫސީ މައުލޫމާތު އެއްކުރުމާއި މޮނިޓަރިންގެ އިތުރުން އެމެރިކާގެ އަސްކަރީ އޮޕަރޭޝަންތަކަށް އެހީތެރިކަން ފޯރުކޮށްދިނުމަށް ބޭނުންކުރާ މުހިންމު މަރުކަޒެއް ކަމަށް ވެސް އައިއާރުޖީސީ އިން ބުނެފައިވެ އެވެ.

މި ހަމަލާތައް ދޭން ޖެހުނު ސަބަބެއް ކަމަށް އީރާން އިން ބުނެފައި ވަނީ، އީރާންގެ މީހުން ދިރިއުޅޭ ސަރަހައްދުތަކަށް އެމެރިކާ އިން ދިން ހަމަލާތަކާއި ކައިވެނި ހަފްލާ އަކަށް އަމާޒުކޮށް އެމެރިކާ ސިފައިން ދިން ހަމަލާގެ ބަދަލު ހިފުމުގެ ގޮތުން ކަމަށެވެ. މި ހާދިސާއާ ގުޅިގެން މެދުއިރުމަތީގެ މަސްރަހު އިތުރަށް ނުތަނަވަސްވެފައިވާއިރު، އެމެރިކާގެ އަސްކަރިއްޔާ އިން ވެސް މިކަމާ ގުޅޭ ގޮތުން އަދި ރަސްމީ ބަހެއް ބުނެފައި ނުވެ އެވެ.