ހުރްމުޒް ކަނޑުއޮޅި ހުޅުވާާލުމަށް އޮސްޓްރޭލިއާ އިން ގޮވާލައިފި

ހުރްމުޒް ކަނޑުއޮޅި އަލުން ހުޅުވާލުމަށް ގޮވާލައްވައި، އެ މުހިންމު ކަނޑުއޮޅިން ދަތުރުކުރާ ބޯޓުތަކަށް އީރާން އިން ހުރަސްއަޅަމުންދާ ކަމަށް އޮސްޓްރޭލިއާގެ ނައިބު ބޮޑު ވަޒީރު އަދި ޑިފެންސް މިނިސްޓަރު ރިޗަޑް މާލްސް ތުހުމަތު ކުރައްވައިފި އެވެ.

އެމެރިކާގެ ވޮޝިންޓަން ޑީސީ އިން އޭބީސީ ނިއުސް އަށް މައުލޫމާތު ދެއްވަމުން މާލްސް ވިދާޅުވީ، ހުރްމުޒް ކަނޑުއޮޅި ހުޅުވާލުން ފެންނަން ބޭނުންވާ ކަމަށާއި، އީރާން އިން ކުރަމުންދާ ކަންކަމަކީ އދ.ގެ ކަނޑުގެ ޤާނޫނާއި، ދަތުރުފަތުރުގެ މިނިވަންކަމުގެ އުސޫލާ މުޅިން ޚިލާފަށް ކުރަމުންދާ ކަންކަން ކަމަށެވެ. 

މެދުއިރުމަތީގައި މިހާރު ހިނގަމުންދާ ޙާލަތު ބަދަލުވެ، ހަމަޖެހުން ބޭނުންވާ ކަމަށް ވިދާޅުވެ، އޭނާ ވިދާޅުވީ، ހުރްމުޒް ކަނޑުއޮޅި ހުޅުވާލައި، ދުނިޔޭގެ ތެޔޮ ފޯރުކޮށްދިނުމުގެ ނިޒާމު އަބަދަށް ރަނގަޅުވާ މަންޒަރު ފެންނަން ވެސް ބޭނުންވާ ކަމަށެވެ. މާލްސް އިތުރަށް ވިދާޅުވީ، އީރާން އިން މިހާރު ހުރްމުޒް ކަނޑުއޮޅިން ދަތުރުކުރާ ބޯޓު ތަކަށް ހުރަސްއަޅަމުންދާ ކަމަށާއި، އެއީ ޤަބޫލު ކުރެވޭނެ ކަމެއް ނޫން ކަމަށެވެ.

ހުރްމުޒް ކަނޑުއޮޅި އަކީ ދުނިޔޭގެ ތެލުގެ ވިޔަފާރީގައި ވަރަށް މުހިންމު ދައުރެއް އަދާކުރާ ކަނޑުއޮޅިއެކެވެ. މި ކަނޑުއޮޅި ބަންދުވުމުން ދުނިޔޭގެ ތެޔޮ ފޯރުކޮށްދިނުމުގެ ނިޒާމަށް ބޮޑެތި ހުރަސްތަކެއް ކުރިމަތިވެ، ދުނިޔޭގެ ބާޒާރުގައި ތެލުގެ އަގު އުފުލިފައިވެ އެވެ. 

މެދުއިރުމަތީގެ ހާލަތު އިތުރަށް ގޯސްވަމުންދާތީ، ބައިނަލްއަޤުވާމީ މުޖުތަމައުން ކަންބޮޑުވުން ފާޅުކުރަމުންދާއިރު، އޮސްޓްރޭލިއާގެ ޑިފެންސް މިނިސްޓަރުގެ މި ބަޔާނަކީ އެ ސަރަހައްދުގެ ހާލަތާ ގުޅިގެން ބައިނަލްއަޤުވާމީ ފެންވަރުގައި ކަންބޮޑުވުން އިތުރުވަމުންދާކަން ދައްކުވައިދޭ ބަޔާނެކެވެ.

ކަނޑުގެ ދަތުރުފަތުރުގެ މިނިވަންކަން ކަށަވަރު ކުރުމަކީ ބައިނަލްއަޤުވާމީ ޤާނޫނުގައި ބަޔާން ކޮށްފައިވާ މުހިންމު އުސޫލެކެވެ. އެހެންކަމުން، ހުރްމުޒް ކަނޑުއޮޅި ހުޅުވާލުމަކީ ދުނިޔޭގެ އިޤްތިސާދަށް ވެސް މުހިންމު ކަމެކެވެ. އީރާން އިން ބުނަމުން އަންނަނީ ހުރްމުޒް ކަނޑު އޮޅީގެ ކަންކަން ކުރިއަށް ގެންދެވޭނީ އެ ޤައުމުގެ ބެލުމުގެ ދަށުން ކަމަށެވެ.