ރަސްމާލެ މަޝްރޫޢުގެ ޚަރަދުތައް ހާމަކުރުމަށާއި، އިޤްތިޞާދީ މައްސަލަތަކަށް ޙައްލު ހޯދުމަށް ރައްޔިތުންގެ މަޖިލީހުގެ ކުރީގެ މެންބަރު އިލްޔާސް ލަބީބް ގޮވާލައްވައިފި
3 ސެޕްޓެމްބަރު 2026 | ބުރާސްފަތި 07:15ރާއްޖޭގެ އިޤްތިޞާދުގައި ދިވެހި ފައިސާ އިތުރުވެ ޑޮލަރަށް އޮތް ތަށިކަން ބޮޑުވުމުގެ ސަބަބުން، ޑޮލަރުގެ އަގު 30 ރުފިޔާއަށް އުފުލިދާނެ ކަމުގެ އިންޒާރު ކުރީގެ މެންބަރު އިލްޔާސް ލަބީބް ދެއްވައިފިއެވެ. މި ޙާލަތުން އަރައިގަތުމަށް ބޭރުގެ ދަރަނިތައް ރީސްޓްރަކްޗާކޮށް ދަޢުލަތުގެ އިސްރާފުތައް ކުޑަކުރަންޖެހޭ ކަމަށާއި، އިޤްތިޞާދީ ގޮންޖެހުންތަކަށް ދާއިމީ ޙައްލެއް ހޯދުމަށް ސަރުކާރުން ހަރުދަނާ ފިޔަވަޅުތަކެއް އަޅަންޖެހޭ ކަމަށް އޭނާ ވިދާޅުވިއެވެ.
އެމްޑީޕީގެ ހަރުގޭގައި ބޭއްވި ޖަލްސާއެއްގައި ފައިސަލް ނަސީމް ވާހަކަފުޅު ދައްކަވަނީ | ރާއްޖެ އެމްވީ
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ޙަވާލުކޮށްގެން ސަރުކާރުން ކުރިއަށްގެންދާ ރަސްމާލެ މަޝްރޫޢުގެ ތަފުސީލާއި، އެ ސަރަޙައްދު ގުޅާލުމަށް އަޅާ ބްރިޖަށް ހިނގާނެ ޚަރަދުތައް ރައްޔިތުންނަށް ސާފުކޮށްދިނުމަށް އިލަޔާސް ގޮވާލައްވައިފިއެވެ.
އިދިކޮޅު ޕާޓީ، އެމްޑީޕީގެ ހަރުގޭގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ކުރީގެ މެންބަރު އިލްޔާސް ލަބީބް ވިދާޅުވީ، ދަޢުލަތުގެ ކުންފުނިތައް މެދުވެރިކޮށް ހިންގާ މިފަދަ ބޮޑެތި މަޝްރޫޢުތަކުގެ ހާމަކަން ބޮޑުކުރަން ޖެހޭ ކަމަށާއި، މި ކަންކަން ހިނގަމުންދާ ގޮތް ރައްޔިތުންނަށް އެނގެންޖެހޭ ކަމަށެވެ. އަދި އިރާދަކުރެއްވިއްޔާ 2028 ވަނަ އަހަރު މި ކަންކަން ތަޙުޤީޤުކޮށް ބަލައި، ޒިންމާވާންޖެހޭ ފަރާތްތައް ޖަވާބުދާރީ ކުރުވައި ޤާނޫނީ ފިޔަވަޅު އަޅުއްވާނެ ކަމަށްވެސް އެމަނިކުފާނު ވިދާޅުވިއެވެ.
ރާއްޖޭގެ މިހާރުގެ އިޤްތިޞާދީ ޙާލަތާ ގުޅޭގޮތުން ވާހަކަފުޅު ދައްކަވަމުން އިލްޔާސް ލަބީބް ފާހަގަކުރެއްވީ، އިޤްތިޞާދަށް ކުރިމަތިވެފައިވާ އެންމެ ބޮޑު ގޮންޖެހުމަކީ މާކެޓުގައި ދިވެހި ފައިސާ މާބޮޑަށް އިތުރުވެފައިވުމެވެ. އެގޮތުން ރާއްޖޭގައި ހުރި ޑޮލަރު ރުފިޔާއަށް ބަދަލުކުރުމަށްފަހު، އިޤްތިޞާދުގައި އިތުރަށް 80 ބިލިއަން ދިވެހި ރުފިޔާ (ބްރޯޑް މަނީ) ދައުރުވަމުންދާ ކަމަށާއި، މިއީ ގާތްގަނޑަކަށް 5.02 ބިލިއަން ޑޮލަރުގެ ދަތިކަމެއް އިޤްތިޞާދުގައި އުފެދިފައިވާކަން ދައްކުވައިދޭ ކަމެއް ކަމަށް ވިދާޅުވިއެވެ.
މީގެއިތުރުން، މި ފައިސާ އިޤްތިޞާދުގެ ތެރެއަށް ނުކުމެފައިވަނީ އެމްއެމްއޭ އަދި ޕެންޝަން އޮފީސް މެދުވެރިކޮށް ފައިސާ ޗާޕުކުރުމުގެ ސަބަބުންނާއި، ބޭންކް އޮފް މޯލްޑިވްސް ހިމެނޭހެން އެހެނިހެން ބޭންކުތަކުން އާންމު ފަރާތްތަކަށް ލޯނު ދޫކުރުމަށް ހުރި ފައިސާ ސަރުކާރުގެ ބޭނުންތަކަށް ނެގުމުން ކަމަށް އެމަނިކުފާނު ތުހުމަތު ކުރެއްވިއެވެ. މިކަމުގެ ނަތީޖާއެއްގެ ގޮތުން ޑޮލަރުގެ އަގު އިންތިހާއަށް އުފުލި، އާންމު ރައްޔިތުންނަށް އޭގެ ދަތިކަން ފޯރަމުންދާ ކަމަށް ވިދާޅުވިއެވެ.
ސަރުކާރު ހިއްސާވާ ކުންފުނިތައް ކަމަށްވާ އެމްއޭސީއެލް، އެޗްޑީސީ އަދި އެސްޓީއޯ ފަދަ ކުންފުނިތަކަށްވެސް ލޯނުތައް އަދާކުރާނެ ޑޮލަރު ނުލިބި ތާށިވެފައިވާކަން ފާހަގަކުރައްވަމުން، މި ޙާލަތަށް އަވަސް ޙައްލެއް ނުގެނެވިއްޖެނަމަ ކުރިއަށް އޮތް ތަނުގައި ޑޮލަރެއްގެ އަގު 30 ރުފިޔާއަށް އަރައިގެން ހިނގައިދާނެ ކަމުގެ އިންޒާރުވެސް ދެއްވިއެވެ.
ޑޮލަރުގެ މައްސަލައިގައި އަޑުއުފުލާ ފަރާތްތަކަށް ބިރުދެއްކުމާއި، ބޭންކް އެކައުންޓްތައް ފްރީޒްކުރުމަކީ މިކަމަށް އޮތް ދާއިމީ ޙައްލެއް ނޫން ކަމަށް ވިދާޅުވަމުން އިލްޔާސް ލަބީބް ވިދާޅުވީ، އިޤްތިޞާދު ހަމަމަގަށް އެޅުވުމަށްޓަކައި ބޭރުގެ ދަރަނިތައް ރީސްޓްރަކްޗަރ ކުރަންޖެހޭ ކަމަށެވެ. އަދި ދަޢުލަތުގެ ބޮޑެތި ޚަރަދުތަކާއި އިސްރާފު ކުޑަކޮށް، ކަމާބެހޭ ފަރާތްތަކާއެކު މަޝްވަރާކޮށްގެން ހަރުދަނާ ފިޔަވަޅުތަކެއް އެޅުމަށް ސަރުކާރަށް އަދިވެސް ފުރުޞަތު އެބައޮތް ކަމަށް އެމަނިކުފާނު ވިދާޅުވިއެވެ.
