ކޯޓުތަކުގެ އިދާރީ އެންމެ އިސްވެރިޔާގެ މަޤާމަށް ނޫމަޑި މައްސަލައިގައި މުއިއްޒުގެ ވަކީލަކަށް ހުންނެވި ޝަމީމް!
16 އޯގަސްޓު 2026 | އާދީއްތަ 07:46ޗީފް ޖުޑީޝަލް އެޑްމިނިސްޓްރޭޓަރުގެ މަޤާމަށް 10 ބޭފުޅަކު ކުރިމަތިލެއްވިއިރު، މި މަޤާމަކީ ކޯޓުތަކުގެ އިދާރީ އޮނިގަނޑު އެކުލަވާލުމާއި ރަޖިސްޓްރާއިން އައްޔަންކުރުން ފަދަ މުހިންމު ޒިންމާތަކެއް މަތިކޮށްފައިވާ މަޤާމެއް. މުސާރަ އާއި އިނާޔަތްތަކާއެކު މަހަކު 59،000 އަށްވުރެ ގިނަ ރުފިޔާ ލިބޭ މި މަޤާމަކީ ޝަރުއީ ދާއިރާގެ އިދާރީ އެންމެ އިސް މަޤާމު
ޕީއެންސީގެ ވަކީލުގެ ގޮތުގައި މަސައްކަތް ކުރެއްވި އާދަމް ޝަމީމް | ސަން
ރާއްޖޭގެ ކޯޓުތަކުގެ އިދާރީ އެންމެ އިސް މަޤާމު ކަމަށްވާ ޗީފް ޖުޑީޝަލް އެޑްމިނިސްޓްރޭޓަރުގެ މަޤާމަށް ޕީއެންސީގެ ވަކީލުގެ ގޮތުގައި މަސައްކަތް ކުރެއްވި އަދި ނޫމަޑި މައްސަލައިގައި ޑރ. މުހައްމަދު މުއިއްޒުގެ ދިފާއީ ވަކީލަކަށް ހުންނެވި އާދަމް ޝަމީމް އައްޔަނުކޮށްފި އެވެ.
މި މަޤާމަށް ކުރިމަތިލުމުގެ ސުންގަޑި 19 ޖުލައިގައި ހަމަވީއިރު، 10 ފަރާތަކުން ކުރިމަތިލި އެވެ.
ސުންގަޑި ހަމަވިއިރު މި މަޤާމަށް ކުރިމަތިލާފާއިވާ ފަރާތްތަކަކީ، ހޫދު މުހައްމަދު / ވަލުގެ، ގދ.މަޑަވެލި، އަހްމަދު ރިފްއަތު / ސީފިޔާގެ، ރ.މަޑުއްވަރީ، އާދަމް ޝަމީމު / މަލާޒް، ދ.މާއެނބޫދޫ، އާމިނަތު ނަޝްމީ ފަޟީލް / މ.ޒޭވަރު، މާލެ، އާއިޝަތު ހިކްމާ / އަސްރަފީވިލާ، ސ.ހިތަދޫ، އިސްމާއީލް ސާޖިދު / މއ.ވިލާރޮދި، މާލެ، މުހައްމަދު ނިޔާޒް / ނައިޓްރޯސް، މ.ރަތްމަންދޫ، މަރްޔަމް ޝަހާނާ / މ.މެދުރިޔާ، މާލެ، މަރްޔަމް ނިހާޔަތު / މ.ތާޖް، މާލެ އަދި ޝަފީޤާ ނައީމް / ބީޗްސައިޑް، ފ.ނިލަންދޫ އެވެ.
އޭގެ ތެރެއިން ޝަމީމް އެ މަޤާމަށް އައްޔަނު ކޮށްފައިވާކަން އެ އިދާރާގެ އޮފިޝަލަކު ވަނީ ޔަޤީން ކޮށްދީފަ އެވެ. ޝަމީމް ވަނީ ޕީއެންސީގެ ވަކީލެއްގެ ގޮތުގައި މަސައްކަތް ކުރައްވާފަ އެވެ. މީގެ ކުރިން އޭނާ ވަނީ ކުރީގެ ރައީސް އަބްދުﷲ ޔާމީނުގެ ޤާނޫނީ ޓީމުގައި ވެސް މަސައްކަތް ކުރައްވާފަ އެވެ.
މި މަޤާމުގެ އަސާސީ މުސާރައަކީ 30،000 ރުފިޔާއެވެ. މީގެ އިތުރުން އެގްޒެކެޓިވް އެލަވަންސްގެ ގޮތުގައި 27،235 ރުފިޔާ އަދި ފޯނު އެލަވަންސްގެ ގޮތުގައި 2000 ރުފިޔާ ލިބޭނެ އެވެ.
ޗީފް ޖުޑީޝަލް އެޑްމިނިސްޓްރޭޓަރަކީ އަދުލުއިންސާފު ޤާއިމު ކުރުމުގެ ބާރުގެ ދަށުގައި ހިމެނޭ ހުރިހާ ކޯޓުތަކުގެ އިދާރީ އެންމެ އިސް ފަރާތެވެ.
މި މަޤާމުގެ މަސްއޫލިއްޔަތުތަކުގެ ތެރޭގައި ކޯޓުތަކުގެ އިދާރީ އޮނިގަނޑު އެކުލަވާލުމާއި، އިދާރީ ފިޔަވަޅު އެޅުމާއި ވަކި ކުރުމުގެ ކަންކަން ބެލެހެއްޓުން ހިމެނެ އެވެ. މީގެ އިތުރުން، ކޯޓުތަކުގެ ރަޖިސްޓްރާއިން އައްޔަނުކޮށް ވަކި ކުރުމުގެ ބާރުވެސް މި މަޤާމުގައި ހުންނަ ފަރާތަކަށް ލިބިގެންވެ އެވެ.
މީގެ އިތުރުން، ޖޭއެސްސީގެ ލަފަޔާއެކު ރާއްޖޭގެ ކޯޓުތަކުގެ ފަނޑިޔާރުންގެ އަދަދު ކަނޑައެޅުންވެސް މި މަޤާމުގެ ޒިންމާތަކުގެ ތެރޭގައި ހިމެނެއެވެ. މިއީ ރާއްޖޭގެ އަދުލު އިންސާފު ޤާއިމުކުރުމުގެ ނިޒާމުގައި ވަރަށް މުހިންމު ދައުރެއް އަދާކުރާ މަޤާމެކެވެ.
