ތަރައްގީގެ މަޝްރޫއުތައް މަޑުޖެހިފައިވާކަމަށް ރައްޔިތުން ބުނަމުން ދަނިކޮށް 2027 ވަނަ އަހަރަކީ ތަރައްގީގެ އެންމެ ގިނަ މަޝްރޫއުތައް ނިންމާލެވޭނެ އަހަރު ކަމަށް ރައީސް މުއިއްޒު ވިދާޅުވެއްޖެ
14 އޯގަސްޓު 2026 | ހުކުރު 12:43އިޤްތިޞާދީ ގޮންޖެހުންތަކާ ހުރެ ބައެއް މަޝްރޫޢުތަކުގެ ދުވެލި މަޑުޖެހިފައިވީ ނަމަވެސް، 2027 ވަނަ އަހަރަކީ ރާއްޖޭގައި އެންމެ ގިނަ ތަރައްޤީގެ މަޝްރޫޢުތައް ނިމިގެންދާނެ އަހަރު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ. މިގޮތުން ތިލަމާލެ ބްރިޖާއި، ތިލަފުށީ ޕޯޓް އަދި ކައުންސިލް އިދާރާތައް ބިނާކުރުން ފަދަ މުހިންމު މަސައްކަތްތައް ކުރިއަށް އޮތް ދެ އަހަރުގެ ތެރޭގައި ނިންމަވާނެ ކަމުގެ ޔަޤީންކަން އެމަނިކުފާނު ދެއްވި
2027 ވަނަ އަހަރަކީ ތަރައްޤީގެ އެންމެ ގިނަ މަޝްރޫޢުތައް ނިންމާލެވޭނެ އަހަރަށް ވާނެކަމުގައި ރައީސް މުއިއްޒު ވިދާޅުވި | ރައީސް އޮފީސް
ކުރީ ސަރުކާރުން ރާއްޖޭގެ ރަށްރަށުގައި ފަށާފައިވާ ތަރައްގީގެ މަޝްރޫއުތައް މަޑުޖެހިފައިވާކަމަށް ރައްޔިތުން ތަކުރާރުކޮށް ބުނަމުން ދަނިކޮށް, 2027 ވަނަ އަހަރަކީ ތަރައްގީގެ އެންމެ ގިނަ މަޝްރޫއުތައް ނިންމާލެވޭނެ އަހަރު ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު ވިދާޅުވީ، ދިވެހިރާއްޖޭގެ އުތުރުން ފެށިގެން ދެކުނުގައި ތަރައްގީގެ މަޝްރޫއުތައް ކުރިއަށްދާކަމަށާ، މީގެ ތެރެއިން ބައެއް މަޝްރޫއުގެ މަސައްކަތްތައް މި އަހަރުގެތެރޭގައި ނިންމާލެވޭއިރު، ކުރިއަށް އޮތް 2027 ވަނަ އަހަރަކީ ތަރައްގީގެ އެންމެ ގިނަ މަޝްރޫއުތައް ނިންމާލެވޭނެ އަހަރަށް ވާނެކަމުގަ އެވެ.
ރައީސް އޮފީހުން ތައްޔާރު ކުރާ ސިލްސިލާ ޕޮޑްކާސްޓް "ދަ ޕަލްސް"ގެ 6 ވަނަ އެޕިސޯޑްގައި ރާއްޖޭގެ އެކިކަންކޮޅުތަކުގައި ހިނގަމުންދާ އުމްރާނީ ތަރައްގީގެ މަޝްރޫއުތަކާ ބެހޭ ގޮތުން ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، "2027 އަކީ ޖުމްލަކޮށް ބަލަންޏާ އެންމެ ގިނަ މަޝްރޫއުތައް ނިމޭ އަހަރަށް ވާނެ،" ކަމުގަ އެވެ.
ސިއްހީ ދާއިރާއިންނާއި، ކުނިމެނޭޖުކުރުމުގެ ދާއިރާ އާއި ކުޅިވަރުގެ ދާއިރާ އާއި ތައުލީމީ ދާއިރާ އާއި ބޭންކިންގ އާއި ވިޔަފާރީގެ ދާއިރާ އިން ކޮންމެ ރަށެއްގައި ކޮންމެހެން ހުންނަން ޖެހޭނެ ކަންތައްތަކެއް ރައީސް މުއިއްޒު ފާހަގަ ކުރެއްވި އެވެ.
"އައުޓްޑޯ ޖިމްތައް ވޭސްޓް މެނޭޖްމަންޓް ސެންޓަރުތައް، ޕޮލިސް ސްޓޭޝަންތައް، ނުވަތަ ޕޮލިސް ޕޯސްޓްތައް ދެން މިހެން ގޮސް ކުޑަކުދިންގެ ޕާކުތަކާއި، މިހެން ގޮސް އެކި ޒާތްޒާތުގެ ކޮންމެހެން ހުންނަން ޖެހޭނެ ކަމަށް އަޅުގަނޑު ގަބޫލުކުރާ ކަންތައްތައް،" މި ދައުރުގެ ތެރޭގައި، ހާސިލުކޮށްދެއްވާނެ ކަމަށް މުއިއްޒު ވިދާޅުވި އެވެ.
އޭގެ އިތުރުން ވަކި ރަށްތަކެއް އިސްކުރެވިގެން ހިންގޭ އެހެން ގިނަ ބައިވަރު މަޝްރޫއުތައް ހުންނާނެ ކަމަށް ރައީސް ވިދާޅުވި އެވެ. އެއީ ތަރައްގީގެ އެންމެ މަތީ ފަންތީގެ ކަންތައްތަކެއް ފޯރުކޮށްދިނުމުގެ ގޮތުން ހިންގާ މަސައްކަތްތަކެއް ކަަން މުއިއްޒު ފާހަގަ ކުރެއްވި އެވެ.
1،150 ހެކްޓަރުގެ ބިން ހިއްކައިގެން ހަދާ ރަސްމާލޭގައި 350،000 މީހުން ވަޒަންވެރިކުރުވުމުގެ ވާހަކަ ވެސް ދައްކަވާ މުއިއްޒު ވިދާޅުވީ، މާލެ އަށް މީހުން އަންނަން ޖެހެނީ ޒަމާންތަކެއް ވަންދެން އޮތް ސިޔާސަތެއްގެ ސަބަބުން މަޖުބޫރުވެގެން ކަމުގަ އެވެ.
އެ ގޮތުން ރަށްރަށުން ވެސް ރަނގަޅު ޚިދުމަތް ލިބޭނަމަ މާލެ އަށް އޮތް ތޮއްޖެހުމުގެ މައްސަލަ ކުޑަވެގެންދާނެ ކަން ރައީސް ފާހަގަ ކުރެއްވި އެވެ.
އާންމުންގެ ބައެއްގެ ވީޑިިއޯތަކެއް މި ޕްރޮގްރާމުގައި ހިމަނާފައިވާ އިރު، މި އެޕިސޯޑުގައި ވާހަކަ ދެއްކި އެކަކު ބުނީ ރަށުގައި ކުރަން ހުރި ކަންކަން ގިނަ ކަމަށާއި، އެހެން ނަމަވެސް އައު ކަންކަން ކުރުމުގެ ކުރިން އެންމެ އިސްކަމެއް ދޭންވީ ފަށާފައި ހުރި މަޝްރޫއުތައް ނިންމުމަށް ކަމުގަ އެވެ. އެ ގޮތުން ބަނދަރާ މަގު ހެދުމުގެ މަޝްރޫއު ފަދަ މަސައްކަތްތައް ނުނިމި ވަރަށް ގިނަ ދުވަސްވާތީ އެކަމުގެ ކަންބޮޑުވުން ވަނީ ފާޅުކޮށްފަ އެވެ. އޭނާ ފާހަގަ ކުރި ގޮތުގައި މަސައްކަތްތައް ނުނިމި ގިނަ ދުވަސްވާތީ ވަރަށް ބައިވަރު ގެއްލުންތައްވާ ކަަމަށެވެ.
ރައީސް މުއިއްޒުގެ ސަރުކާރަށް ތިން އަހަރު ފުރެންދާއިރު، ކުރީގެ ސަރުކާރުން ހަލުއިކަމާ އެކު ކުރިއަށް ގެންދިޔަ ކިތަންމެ މަޝްރޫއެއް މަޑު ޖެހި ބައެއް ކަންކަން މުޅިން ހުއްޓިފައިވާ ކަން އާންމުން އަންނަނީ ފާހަގަ ކުރަމުންނެވެ.
މުއިއްޒުގެ ވާހަކަފުޅުގައި ބައެއް މަޝްރޫއުތައް އެކަށީގެންވާ ހަލުވި ސްޕީޑުގައި ކުރިއަށް ނުދާކަމަށް ވަނީ އެއްބަސްވެ ވަޑައިގެންފަ އެވެ. އެކަމުގައި ސަބަބުތަކެއް ހުރިކަމަށާއި އޭގެ ތެރޭގައި އިގްތިސާދީ ދަތިތައް އެމަނިކުފާނު ފާހަގަ ކުރެއްވި އެވެ.
އެހެން މުއިއްޒު ވިދާޅުވި ނަމަވެސް ވެރިކަމަށް ވަޑައިގަތީ ހާސްވާން ޖެހޭނެ އެއްވެސް ކަމެއް ނެތް ކަމަށާއި، އިގްތިސާދީ ގޮތުން ވިޔަސް މަޝްރޫއުތައް ހިންގުމުގެ ގޮތުން ވިޔަސް ބޭނުންވާ އެހީ ލިބޭނެ ގޮތް ހަމަޖެހިފައި އޮތް ކަމުގެ ޔަގީންކަން ރައްޔިތުންނަށް ދެއްވުމަށްފަހު އެވެ.
"ދަ ޕަލްސް" ޕޮޑްކާސްޓުގެ 6 ވަނަ އެޕިސޯޑްގައި ރައީސް މުއިއްޒު ވަނީ ޒަމާނީ ފެންވަރުގެ ކައުންސިލް އިދާރާތައް ބިނާކުރުމަށް މިހާރު ކުރިއަށްގެންދާ މަޝްރޫއުގެ މަސައްކަތްތައް ނިންމާ، 2027 ވަނަ އަހަރުގެ މެދަކާ ހިސާބުގައި މި އިދާރާތަކުގެ ބޭނުން ހިފޭނެކަމުގެ އުންމީދު އޮތްކަން ހާމަކުރައްވާފަ އެވެ. މީގެ އިތުރުންވެސް ކައުންސިލް އިދާރާތަކުގެ ތަރައްގީއަށް ގިނަ މަޝްރޫއުތަކެއް ހިނގާކަމަށާ، ކުރިއަށް އޮތް 2 އަހަރެއްހާ ދުވަހުގެ ތެރޭގައި، 100 ވަރަކަށް ރަށުގައި، ކައުންސިލް އިދާރާތައް ހިނގަމުންދާނީ އައު އިމާރާތްތަކެއްގައި ކަމަށް ޤަބޫލުފުޅުކުރައްވާކަމުގައި ރައީސް ވިދާޅުވި އެވެ.
އިންޑިއާ ސަރުކާރުގެ އެހީގައި އިންޑިއާގެ ކުންފުންޏަކުން މާލޭ ސަރަޙައްދުގައި ތަރައްގީ ކުރަމުންދާ ތިލަމާލޭ ބްރިޖުގެ މަޝްރޫއާ ބެހޭ ގޮތުން ރައީސް ވިދާޅުވީ، ހަލުވި ދުވެލީގައި މިމަޝްރޫއު މިހާރު ކުރިއަށް އެބަދާކަމަށާ، މާ ލަސްތަކެއްނުވެ، ބުރިޖުގެ މަޝްރޫއު ނިމޭނެކަމަށް ޤަބޫލުފުޅުކުރައްވާ ކަމަށެވެ.
"ދަ ޕަލްސް"ގެ 6 ވަނަ އެޕިސޯޑުގައި، ރައީސް މުއިއްޒު ވިދާޅުވީ ސަރުކާރުން ކުރިއަށްގެންދާ އެންމެ ބޮޑު މަޝްރޫޢަކަށް ވާނީ، މާލެއިން ތިލަފުށްޓަށް ޕޯޓް ބަދަލުކުރުމުގެ މަޝްރޫއު ކަމަށާއި، ކުރިއަށް އޮތް 2027 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހަށް މިކަން ފުރިހަމަވެގެންދާނެކަމުގެ ޔަޤީންކަމުގެ ދެއްވާ ކަމުގަ އެވެ.
ރައީސް މުއިއްޒު އެކި މުނާސަބަތުތަކުގައި އެކިކަންކަމުގެ ޔަގީންކަން ދެއްވާ ކަމަށް ވިދާޅުވި ނަމަވެސް އެކަންކަން އެ ވިދާޅުވާ ގޮތަށް ނުވެ ދިއުމަކީ ދިވެހި ރައްޔިތުންނަށް މިހާރު އައު ކަމެއް ނޫންކަން ފާހަގަ ކުރެވެ އެވެ.
އެ ގޮތުން އެންމެ ފާހަގަކޮށްލެވޭ އެއް ކަމަކީ މި ސަަރުކާރުން ހިންގާ އެންމެ ބޮޑު ބޯހިޔާވަހިކަމުގެ މަޝްރޫއު ކަމުގައިވާ ރަސްމާލެ ހިއްކުމުގެ މަސައްކަތް 2025 ގެތެރޭ ނިންމާލައި، 2026 ވަނަ އަހަރުގައި އަސާސީ ޚިދުމަތްތައް ޤާއިމްކުރުމާއި މަގު ހެދުމާއި ބޯހިޔާވަހިކަމުގެ މަޝްރޫއުތަކުގެ ޢަމަލީ މަސައްކަތް ފެށޭނެ ކަމަށް ހުސްވި އަހަރުގެ ފެބްރުއަރީ މަހު ރައްޔިތުންގެ މަޖިލީހުގެ ޖަލްސާ ފެއްޓެވުމަށްޓަކައި ރިޔާސީ ބަޔާން އިއްވަވަމުން ވަނީ ވިދާޅުވެފަ އެވެ.
