އިސްލާމްދީނާ ޚިލާފު ގާނޫނެއް އުފަން ނުކުރެވޭނެ ފަދަ ނިޒާމެއް ގާއިމުކުރަން މަޖިލީހަށް ހުށަހަޅުއްވާނެ ކަމަށް ރައީސް މުއިއްޒު ވިދާޅުވިއިރު، މިހުރިހާ ދުވަހު މިގައުމުގައި އޮތީ ކޮން ނިޒާމެއްތޯ؟

ރާއްޖޭގައި އިސްލާމްދީނާ ޚިލާފު އެއްވެސް ގާނޫނެއް އުފަން ނުކުރެވޭނެ ފަދަ ނިޒާމެއް ގާއިމުކުރުމަށްޓަކައި ރައްޔިތުންގެ މަޖިލީހަށް ހުށަހަޅުއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ގައުމީ ދުވަހުގެ ރަސްމީ ޖަލްސާގައި ރައީސް ދެއްކެވި މި ވާހަކަފުޅާއެކު، ސިޔާސީ މަސްރަހުގައާއި އާންމުންގެ މެދުގައި ބޮޑެތި ސުވާލުތަކެއް އުފެދޭނެ ކަމާމެދު ޝައްކަތް ނެތެވެ. ދިވެހިރާއްޖޭގެ ގާނޫނުއަސާސީއާއި ތާރީޚަށް ބަލާއިރު އިސްލާމީ އުސޫލުތައް ހިމާޔަތްކުރެވިފައިވާ މިންވަރަށް ބަލައި، މިފަދަ ވާހަކަފުޅެއް މި ދަނޑިވަޅުގައި ދެއްކެވުމުގެ އަސްލު މަގުސަދާމެދު ވެސް ގިނަ ބަޔަކު ސުވާލުު އުފައްދާނެއްނޫންތޯ އެވެ.

ރާއްޖެއަކީ ސައްތައިން ސައްތަ އިސްލާމީ ގައުމަކަށްވާއިރު، ރާއްޖެ އިސްލާމްވި ހިޖުރައިން 548 ވަނަ އަހަރުން ފެށިގެން މިއަދާ ހަމައަށް ވެސް ދިވެހިންގެ ގައުމިއްޔަތާއި ދީން ވަނީ ގުޅިލާމެހިފަ އެވެ. 2008 ވަނަ އަހަރު އަމަލުކުރަން ފެހި ގާނޫނުއަސާސީގައި ސަރީހަކޮށް އިސްލާމްދީން ދީނާ ޚިލާފު އެއްވެސް ގާނޫނެއް ރާއްޖޭގައި ނުހެދޭނެ ކަމަށް ބަޔާންކޮށްފައިވެ އެވެ. މީގެ އިތުރުން ރައްޔިތުންގެ މަޖިލީހުން ވެސް އިސްލާމް ދީނަށް ފުށޫއަރާ ގޮތަށް އެއްވެސް ކަމެއް ކޮށްފައިނުވެ އެވެ. އަދި އެފަދަ ކަމެއް ކުރުމުގެ ފުރުސަތު ދިވެހި ރައްޔިތުން ނުދޭނެކަމީ ވެސް ޔަގީން ކަމެކެވެ. 

އަދި މިހާރުގެ ހާލަތަށް ބަލާއިރު، 20 ވަނަ ރައްޔިތުންގެ މަޖިލީހުގެ ސުޕަރ މެޖޯރިޓީ އޮތީ ސަރުކާރު ހިންގާ ޕީއެންސީގެ އަތުގަ އެވެ. މަޖިލީހުގެ ބާރުތައް ބޭނުންކޮށްގެން ގާނޫނުއަސާސީއަށާއި ގާނޫނުތަކަށް ސަރުކާރުން ބޭނުންވާ ބަދަލުތައް ދަނީ ގެންނަމުންނެވެ.

އެގޮތުން ޑޮލަރު މާރުކުރުމުގެ ސިޔާސަތަށް ގެނައި ބަދަލުތަކާއި، ސިނގިރޭޓުގެ އަގަށް ގެނައި ބަދަލުތަކުގެ އިތުރުން، މިނިވަން މުއައްސަސާތަށް ރައީސް ބޭނުންފުޅުވާ ބޭފުޅަކު އައްޔަން ކުރެވޭނެ ގޮތަށް ގެނެވުނު އިސްލާހުތައް ފާހަގަކޮށްލެވެ އެވެ. އަދި ލާމަރުކަޒީ ގާނޫނުން ރައްޔިތުންގެ ބާރު ހަނިވާ ގޮތަށް ގެންނަ ބަދަލުތައް ފާހަގަކުރެވޭނޫންތޯ އެވެ.

ގައުމުގެ މަސްލަހަތު އެއްކިބާ ކުރުމަށްފަހު، ރައްޔިތުން ނުރުހޭ ގޮތަށް މިފަދަ ބޮޑެތި ބަދަލުތައް ގާނޫނަށް ގެނައުމަކީ ރައީސް މުއިއްޒުގެ މަގުބޫލުކަން ރައްޔިތުންގެ ކުރިމަތީގައި ދަށްވަމުންދާ މައިގަނޑު އެއް ސަބަބެވެ. 

ސިޔާސީ ބޭފުޅުން ވިދާޅުވާ ގޮތުގައި، ސަރުކާރުގެ ބައެއް ނިންމުންތަކުގެ ސަބަބުން ރައްޔިތުންގެ މެދުގައި މަގުބޫލުކަން ކުޑަވަމުންދާ ދަނޑިވަޅެއްގައި އިސްލާމްދީނާ ގުޅުވައިގެން މިފަދަ ވާހަކަފުޅުތައް ދެއްކެވުމަކީ ސިޔާސީ އުކުޅެކެވެ. މަޖިލީހުގެ ފުރިހަމަ ކޮންޓްރޯލް ސަރުކާރަށް އޮތްއިރު، މިފަދަ ނިޒާމެއް ގާއިމުކުރަން މިހާތަނަށް މަސައްކަތް ނުކުރައްވައި، ކުއްލިއަކަށް ގައުމީ ދުވަހު މިފަދަ ވާހަކަފުޅެއް ދެއްކެވުމުން ސަރުކާރުގެ ނިޔަތާމެދު ސުވާލު އުފެދޭނޫންތޯ އެވެ. 

ރާއްޖޭގައި އިސްލާމްދީން ހިމާޔަތްކުރުމަކީ ކޮންމެ ދިވެހި ރައްޔިތެއްގެ އެންމެ ބޮޑު އެދުމަށްވާއިރު، އިސްލާމް ދީނާ ގުޅުވައި، ދީނީ ކާޑު ކުޅުއްވި ނަމަވެސް މިއަދު އެކަން ރައްޔިތުން ބަލައިނުގަންނާނެ އެވެ. އޭގެ ޖަޒުބާތުގައި ޖެހުނު ދުވަސްތައް މިއަދު ފާއިތުވެ ވަނީ ނިމި ގޮސްފަ އެވެ. މިހާރުވެސް ގާނޫނުއަސާސީން އިސްލާމްދީނަށް ފުރިހަމަ ހިމާޔަތް ލިބިދީފައިވަނިކޮށް، އިސްލާމްދީނުގެ ނަމުގައި ސިޔާސީ މަންފާ ހޯދުމަށް މަސައްކަތްކުރުމަކުން، ރަނގަޅު ނަތީޖާއެއް ނުނިކުންނާނެ އެވެ. 

އެހެންކަމުން ރައްޔިތުންގެ ލޯތްބާއި ތާއީދު ބޭނުންނަމަ، ރައްޔިތުންގެ މަސްލަހަތާއި ގައުމީ މަންފާއަށް އިސްކަންދީގެން މަސައްކަތް ކުރުން މުހިންމެވެ. ހަގީގީ އިސްލާހީ ބަދަލުތައް ގެނެވޭނީ ރައްޔިތުންގެ އަޑު އަހައި، ރައްޔިތުންނަށް ފައިދާވާ ގޮތަށް ގައުމުގެ މަސްލަހަތު އިސްކޮށްގެންނެވެ. މިގޮތަށް މަސައްކަތް ކުރާ ވެރީންނަށް މަގުބޫލުކަން އިތުރުވެ، ރައްޔިތުންގެ ލޯބި ވެސް ލިބޭނެކަމީ ޝައްކަތް އޮތް ކަމެއް ނޫނެވެ.