ދެކުނު ކޮރެއާ އިން އޭއައި އަށް 1 ޓްރިލިއަން ޑޮލަރު އިންވެސްޓް ކުރަނީ

ދެކުނު ކޮރެއާގެ ޗިޕް އުފެއްދުމުގެ ސިނާއަތާއި އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ކުރިއެރުވުމަށްޓަކައި، ކުރިއަށް އޮތް އަހަރުތަކުގެ ތެރޭގައި 1 ޓްރިލިއަން ޑޮލަރު (760 ބިލިއަން ޕައުންޑް) އިންވެސްޓް ކުރުމުގެ ބޮޑު މަޝްރޫއެއް އެ ގައުމުން އިއުލާނުކޮށްފި އެވެ.

މި އިންވެސްޓްމަންޓަކީ ޗިޕް އުފައްދާ އާ މަރުކަޒުތަކާއި، ޑޭޓާ ސެންޓަރުތަކުގެ އިތުރުން ރޮބޮޓިކްސް ޓެކްނޮލޮޖީ ތަރައްގީ ކުރުމަށް އެ ގައުމުން އެކުލަވާލާފައިވާ "ތްރީ މެގަ ޕްރޮޖެކްޓްސް" ނުވަތަ ތިން ބޮޑު މަޝްރޫއުގެ ބައެކެވެ.

މިދިޔަ ހޯމަ ދުވަހު ދެކުނު ކޮރެއާގެ ރައީސް ލީ ޖޭ-މިއުންގް ވިދާޅުވި ގޮތުގައި، މި މަޝްރޫއުގެ މައިގަނޑު މަގްސަދަކީ ވެރިރަށް ސޯލްގެ ބޭރުގައިވާ ސަރަހައްދުތަކުގެ އިގްތިސާދު ދިރުވައި އާލާކުރުމެވެ.

އޭއައިގެ ކުރިއެރުމާއެކު ސެމީކޮންޑަކްޓަރުތަކަށް އޮތް ޑިމާންޑް ބޮޑުވަމުންދާ ދަނޑިވަޅެއްގައި، ދެކުނު ކޮރެއާގެ ވާދަވެރި ގައުމުތައް ކަމަށްވާ ތައިވާން، ޗައިނާ އަދި ޖަޕާނުން ވެސް ދަނީ ޗިޕް ފެކްޓްރީތަކާއި އެހެނިހެން ޓެކްނޮލޮޖީތަކަށް ބޮޑެތި އިންވެސްޓްމަންޓްތަކެއް ކުރަމުންނެވެ.

"އެހެން ކޮންމެ ގައުމަކަށްވުރެ ކުރިން އޭއައިގެ މައިގަނޑު އަސާސްތައް އަޅުގަނޑުމެން ކަށަވަރުކުރަންޖެހޭ،" ރައީސް ލީ ވިދާޅުވިއެވެ. "ސެމީކޮންޑަކްޓަރުތަކާއި، ފިޒިކަލް އޭއައި އަދި އޭއައި ޑޭޓާ ސެންޓަރުތަކަކީ ބޮޑު ކުރިއެރުމަކަށްޓަކައި އޮތް ތިން މައިގަނޑު ތަނބު."

ޓީވީ މެދުވެރިކޮށް ދެއްވި ބަޔާނެއްގައި ރައީސް ލީ މި މަޝްރޫއުތައް އިއުލާނުކުރެއްވީ، އެ ގައުމުގެ އެންމެ ބޮޑު ދެ ޗިޕް އުފައްދާ ކުންފުނި ކަމަށްވާ ސެމްސަންގް އަދި އެސްކޭ ހައިނިކްސްގެ އިސްވެރިންނާއެކުގަ އެވެ.

މި ކުންފުނިތަކުން ދެކުނު ކޮރެއާގެ ހުޅަނގު ދެކުނު ސަރަހައްދުގައި ސެމީކޮންޑަކްޓަރު އުފައްދާ ބޮޑު މަރުކަޒެއް ބިނާކުރާނެ ކަމަށް ބެލެވެ އެވެ.

މީގެ އިތުރުން، މިހާރު ގިނަ ފެކްޓްރީތައް ހުރި ވެރިރަށް ސޯލްގެ ބޭރުގައި އޭއައި އިންފްރާސްޓްރަކްޗާގެ އެހެނިހެން މަރުކަޒުތައް ގާއިމުކުރުމަށް ވެސް ރައީސް ލީ ވަނީ ނިންމަވާފަ އެވެ.

މީގެ ކުރިން ރައީސް ލީ ނެރުއްވި ބަޔާނެއްގައި ވިދާޅުވެފައިވަނީ، ސޯލްއަށް ހުރިހާ ސިނާއަތްތަކެއް ޖަމާވެފައި އޮތުމުގެ ސަބަބުން ރަށްފުށުގެ ސަރަހައްދުތަކަށް ކުރިމަތިވެފައިވާ ހީނަރުކަމުން ސަލާމަތްވުމަކީ ގައުމު "ދުނިޔޭގައި އޮތުމާ" ގުޅިފައިވާ ކަމެއް ކަމަށެވެ.

"އިންސާފާއި ހަމަހަމަކަމަށްޓަކައި އެކަނި ނޫން، ދެމެހެއްޓެނިވި އަދި އެންމެން ބައިވެރިވާ ކުރިއެރުމެއް ކަށަވަރުކުރުމަށްޓަކައި ވެސް، ގިނަ ދުވަސްތަކެއް ވަންދެން އޮތް މި ތަފާތުކުރުންތަކާއި އެކަހެރިކުރުމުގެ ސިލްސިލާ އަޅުގަނޑުމެން މިއަދު މެދުކަނޑާލަންޖެހޭ،" އޭނާ ލިޔުއްވާފައިވެ އެވެ.

އޭއައި ޗިޕް އުފައްދާ މަޝްހޫރު އެންވީޑިއާ ފަދަ ކުންފުނިތަކަށް މުދާ ފޯރުކޮށްދޭ ސެމްސަންގް އަދި އެސްކޭ ގްރޫޕަކީ، އޭއައި އިންފްރާސްޓްރަކްޗާއަށް ކުރާ ހޭދަ އިތުރުވުމުގެ ސަބަބުން އެންމެ ބޮޑު ފައިދާއެއް ލިބުނު ކުންފުނިތަކެވެ.

އެމެރިކާގެ ޓެކްނޮލޮޖީގެ ބޮޑެތި ކުންފުނިތައް ކަމަށްވާ ގޫގުލް، އެމެޒޯން އަދި މެޓާ އިން ވަނީ މިއަހަރުގެ ތެރޭގައި މި ޓެކްނޮލޮޖީއަށް 650 ބިލިއަން ޑޮލަރު ހޭދަކުރާނެ ކަމަށް ބުނެފަ އެވެ.

އޭއައި ޑޭޓާ ސެންޓަރުތަކަށް އޮތް ޑިމާންޑް ބޮޑުވުމާ ގުޅިގެން، މިދިޔަ މެއި މަހު އެސްކޭ ހައިނިކްސްގެ މާކެޓް ވެލިއު ނުވަތަ ކުންފުނީގެ އަގު ވަނީ 1 ޓްރިލިއަން ޑޮލަރަށްވުރެ މައްޗަށް އަރާފަ އެވެ.

އޭއައި އަށް ބޭނުންވާ ޗިޕްތަކަށް އޮތް ޑިމާންޑް ބޮޑުވުމުގެ ސަބަބުން ދުނިޔޭގެ ބާޒާރުގައި ސެމީކޮންޑަކްޓަރު ލިބުން ދަތިވެ، އޭގެ އަގުތައް ވަނީ އުފުލިފަ އެވެ.

މިދިޔަ ހަފުތާގައި އެޕަލް އަދި މައިކްރޯސޮފްޓުން ވަނީ، އުފެއްދުންތަކަށް ބޭނުންވާ ސާމާނުގެ އަގު ބޮޑުވުމުގެ ސަބަބުން އެ ކުންފުނިތަކުގެ ބައެއް އާލާތްތަކުގެ އަގު ބޮޑުކޮށްފަ އެވެ.

ނަމަވެސް، އޭއައި އަށް މިހާ ބޮޑު ހޭދައެއް ކުރަމުންދާތީ ބައެއް އިންވެސްޓަރުން ދަނީ ކަންބޮޑުވުން ފާޅުކުރަމުންނެވެ. މީގެ ސަބަބުން ފާއިތުވި ދުވަސްތަކުގައި ބައެއް ކުންފުނިތަކުގެ ހިއްސާގެ އަގު ވަނީ ދަށަށް ގޮސްފަ އެވެ.