ދެކުނު ކޮރެއާގެ ގައުމީ ޓީމުގެ ކޯޗަކީ "ގާބިލުކަމެއް ނެތް" މީހެއް ކަމަށް އެ ގައުމުގެ ރައީސް ވިދާޅުވެ، ގައުމީ ޓީމު ކެޓި ސަބަބު ތަހުގީގު ކުރަން އަމުރު ކުރައްވައިފި

ދެކުނު ކޮރެއާގެ ގައުމީ ފުޓްބޯޅަ ޓީމުގެ ކޯޗަކީ "ގާބިލުކަމެއް ނެތް" މީހެއްގެ ގޮތުގައި އެ ގައުމުގެ ރައީސް ލީ ޖޭ-މިއުންގް ސިފަކުރައްވައި، ގައުމީ ޓީމުގެ މުޅި ޕްރޮގްރާމް އަލުން މުރާޖައާ ކުރުމަށް އަމުރުކުރައްވައިފި އެވެ.

އުމުރުން 57 އަހަރުގެ ކޯޗު ހޮންގް މިއުންގް-ބޯ އަށް އަމާޒުކޮށް އަމިއްލަ ގައުމުން ބޮޑެތި ފާޑުކިޔުންތަކެއް އަންނަނީ އަމާޒުވަމުންނެވެ. 

މިކަމާ ގުޅިގެން ރައީސް ވިދާޅުވީ، ކުރީގެ އޮނަރަރީ ޕްރޮފެޝަނަލް ފުޓްބޯޅަ ކްލަބެއްގެ ޗެއާމަނެއްގެ ހައިސިއްޔަތުންނާއި، ގައުމީ ޓީމުގެ ސަޕޯޓަރުންގެ ގްރޫޕް ކަމަށްވާ "ރެޑް ޑެވިލްސް" ގެ މެންބަރެއްގެ ހައިސިއްޔަތުން، މި ހީނުކުރާ ނަތީޖާގެ ސަބަބުން ހައިރާންކަމާއި ބޮޑު ކަންބޮޑުވުމެއް ލިބިވަޑައިގެންފައިވާ ކަމަށެވެ.

ރައީސް އިތުރަށް ވިދާޅުވީ، ކަންކަން ހިންގުމަށް އިސްކުރާ މީހުންގެ ސަބަބުން ހުރިހާ ކަމެއް ބަދަލުވެގެންދާކަން އަނެއްކާވެސް ސާބިތުވެފައިވާ ކަމަށެވެ. އަދި ގާބިލުކަމުގެ ބަދަލުގައި ވަކި ފަރާތަކަށް ކަމެއްކޮށްދިނުމުގެ ގޮތުން ކަންކަން ކުރުމާއި އަމިއްލަ އެދުން އިސްކޮށް، ގާބިލުކަމެއް ނެތް މީހަކު ލީޑަރަކަށް އައްޔަންކޮށްފިނަމަ، އޭގެ ނަތީޖާ އަކީ އަލިފާން ފަދައިން ފެންނަން އޮތް ސާފު ކަމެއް ކަމަށްވެސް އެމަނިކުފާނު ވިދާޅުވިއެވެ.

މި މައްސަލައިގައި ފިޔަވަޅު އެޅުމަށް އެ ގައުމުގެ މިނިސްޓްރީ އޮފް ކަލްޗަރ، ސްޕޯޓްސް އެންޑް ޓޫރިޒަމަށް ރައީސް ލީ ވަނީ ގޮވާލައްވާފަ އެވެ. އަދި މި ދިމާވި ހިތާމަވެރި ހާލަތުގެ ސަބަބުން ރައްޔިތުންނަށް ލިބުނު މާޔޫސްކަމަށްޓަކައި އިޚްލާޞްތެރިކަމާއެކު މާފަށް އެދިވަޑައިގަންނަވާ ކަމަށާއި، މިފަދަ ކަމެއް ތަކުރާރު ނުވާނެހެން ކުޅިވަރުގެ އިދާރީ އޮނިގަނޑު އިސްލާހު ކުރުމުގެ މަސައްކަތް އަވަސް ކުރައްވާނެ ކަމަށްވެސް ވިދާޅުވި އެވެ.

ދެކުނު ކޮރެއާގެ ބްރޯޑްކާސްޓަރު ކޭ.ބީ.އެސް އިން، މުބާރާތުން އެ ގައުމު އަވަހަށް ވަކިވާން ޖެހުނު ޚަބަރު ރިޕޯޓްކުރިއިރު، ކޯޗު ހޮންގް އަކީ ކުށްވެރިއެއްގެ ގޮތުގައި ސިފަވާ ގޮތައް އޭނާގެ މޫނު ވަނީ ފުސްކޮށްފަ އެވެ.

މެކްސިކޯގައި ހުރި ޓީމުގެ ބޭސް ކޭމްޕުން އާދީއްތަ ދުވަހު ފުރުމުގެ ކުރިން، ކޯޗު ހޮންގް ވަނީ ސަޕޯޓަރުންގެ ކިބައިން މާފަށް އެދި މަގާމުން އިސްތިއުފާ ދިންކަން އިއުލާންކޮށްފަ އެވެ. ދެކުނު ކޮރެއާ އިން ވަނީ ގްރޫޕް ސްޓޭޖުގެ ތިން މެޗުވެސް މެކްސިކޯގައި ކުޅެފަ އެވެ.

އިސްތިއުފާ އިއުލާން ކުރަމުން ހޮންގް ބުނީ، ގައުމީ ޓީމަށް ލޯތްބާއި ތާއީދު ދިން ހުރިހާ ރައްޔިތުންގެ ކިބައިން އިޚްލާޞްތެރިކަމާއެކު މާފަށް އެދޭ ކަމަށާއި، މިއަދުން ފެށިގެން ގައުމީ ޓީމުގެ ހެޑް ކޯޗުގެ މަގާމުން ވަކިވާން ނިންމާފައިވާ ކަމަށެވެ.

އޭނާ އިތުރަށް ބުނީ، ހެޑް ކޯޗުގެ ހައިސިއްޔަތުން ދެއްކޭނެ އެއްވެސް އުޒުރެއް ނެތް ކަމަށާއި ރައްޔިތުން އުންމީދުކުރި ފަދަ ނަތީޖާއެއް ހޯދައިނުދެވުނު ކަމަށާއި، އެހެންކަމުން ހުރިހާ ޒިންމާއެއް އުފުލަނީ އޭނާ އަމިއްލައަށް ކަމަށެވެ.

"މިއަދު އަޅުގަނޑު ގައުމީ ޓީމުގެ ހެޑް ކޯޗުގެ މަގާމުން މި ވަކިވަނީ. އެހެންނަމަވެސް، ކޮރެއާގެ ފުޓްބޯޅައަށް އަޅުގަނޑުގެ ހިތުގައި އޮތް ލޯތްބަކަށް ބަދަލެއް ނާންނާނެ. ރައްޔިތުންގެ އިތުބާރާއި ލޯބި އަލުން ހޯދުމަށް ދެކުނު ކޮރެއާގެ ގައުމީ ޓީމަށް އަޅުގަނޑު އަބަދުވެސް ސަޕޯޓް ކުރާނަން،" ހޮންގް ބުނެފައިވެ އެވެ.

މިއީ ހޮންގް ގައުމީ ޓީމާ ހަވާލުވި ދެވަނަ ފަހަރެވެ. މީގެ ކުރިން 2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕްގައިވެސް އޭނާގެ އިރުޝާދުގެ ދަށުން ކުޅުނު ދެކުނު ކޮރެއާ ޓީމު ވަނީ ގްރޫޕް ސްޓޭޖުން ކަޓާފަ އެވެ.

ދެކުނު ކޮރެއާއަކީ ޖެހިޖެހިގެން 11 ފަހަރު ވޯލްޑް ކަޕްގައި ވާދަކޮށްފައިވާ، މުބާރާތުގެ ގަވާއިދުން ފެންނަ ޓީމެކެވެ. އަދި 2002 ވަނަ އަހަރު އަމިއްލަ ގައުމުގައި ބޭއްވި މުބާރާތުގައި އެ ޓީމުން ވަނީ ސެމީ ފައިނަލާ ހަމައަށް ދަތުރުކޮށް ތާރީޚީ ކާމިޔާބީއެއް ހޯދާފަ އެވެ.

މިފަހަރުގެ މުބާރާތުން ދެކުނު ކޮރެއާ ކަޓައިގެން ދިޔައީ ފުރަތަމަ މެޗުގައި ޗެކް ރިޕަބްލިކް އަތުން ފަހަތުން އަރައި މޮޅުވި ނަމަވެސް، އެ ކާމިޔާބީ ދަމަހައްޓާލެވޭ ގޮތް ނުވުމުންނެވެ. ގްރޫޕް އޭ ގައި ދެން ކުޅުނު ދެ މެޗުން އެ ޓީމު ވަނީ ދެކުނު އެފްރިކާ އަދި މެކްސިކޯ އަތުން ބަލިވެފަ އެވެ.

މި އަހަރުގެ މުބާރާތް ފުޅާކޮށްފައިވާތީ، ގްރޫޕްތަކުގެ ތިންވަނަ ހޯދާ އެންމެ މޮޅު އަށް ޓީމުގެ ތެރޭގައި ހިމެނިގެން ގަދަ 16 އަށް ދެވޭނެ ކަމުގެ އުންމީދު އެ ގައުމުން ކުރި އެވެ. ނަމަވެސް ހޮނިހިރު ދުވަހު ކުޅުނު މެޗުން ޑީ.އާރު ކޮންގޯ އަތުން އުޒްބެކިސްތާން 3-1 އިން ބަލިވުމާއެކު، ދެކުނު ކޮރެއާގެ އެ އުންމީދު ވަނީ ފެނަށް ވެފައެވެ.