އެމްޑީޕީއަކީ އިސްރާއީލަށް ތާއީދުކުރާނެ ޕާޓީއެއް ނޫން، އަބަދުވެސް ތެދުވެ ތިބޭނީ މިނިވަންކަމަށްޓަކައި މަސައްކަތް ކުރަމުންދާ ފަލަސްތީނުގެ ރައްޔިތުންނާއެކު: ނަޝީދު

ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަކީ އިސްރާއީލް އަށް ތާއީދުކުރާނެ ޕާޓީއެއް ނޫން ކަމަށާއި އެ ޕާޓީން އަބަދު ވެސް ތެދުވެ ތިބޭނީ މިނިވަން ކަމަށްޓަކައި މަސައްކަތް ކުރަމުންދާ ފަލަސްތީނުގެ ރައްޔިތުންނާއެކުގައި ކަމަށް ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވިދާޅުވެއްޖެ އެވެ.

ބުދަ ދުވަހުގެ ރޭ އެމްޑީޕީން ބޭއްވި ހަރުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ، ފަލަސްތީނުގެ ކުށެއް ނެތް ރައްޔިތުންނާ ދެކޮޅަށް އިސްރާއީލުން ހިންގަމުންގެންދާ ލާއިންސާނީ އަމަލުތަކަކީ ޓީވީތަކުން އަބަދުހެން ފެންނަ މަންޒަރުތަކެއް ކަމުން، އިސްރާއީލުން ހިންގަމުންދާ ލާއިންސާލީ އަމަލުތަކަށް ދިވެހި އެއްވެސް ރައްޔިތަކު ތާއީދު ނުކުރާނެ ކަމަށެވެ. އެމްޑީޕީން އަބަދު ވެސް ތިބޭނީ ފަލަސްތީނުގެ ރައްޔިތުންނާއެކުގައި ކަމަށް ވެސް އެމަނިކުފާނު ވަނީ ވިދާޅުވެފަ އެވެ.

ރައީސް ނަޝީދު މި މޭރުމުން ވިދާޅުވީ، މިދިޔަ އާދިއްތަ ދުވަހު ބޭއްވި މިނިވަން ދުވަހުގެ ރަސްމީ ޖަލްސާގައި ރައީސް މުއިއްޒު ދެއްކެވި ވާހަކަތަކަށް ރައްދު ދެއްވަމުންނެވެ. އެމްޑީޕީގެ ވެރިކަންތަކުގައި ގެންގުޅެފައިވަނީ އިސްލާމީ ގައުމުތަކާ ދުރު އަދި ޕްރޯ އިސްރާއީލު ސިޔާސަތެއް ކަމަށް ވިދާޅުވެ ރައީސް މުއިއްޒު ވަނީ ވަރަށް ސީރިއަސް ތުހުމަތުތަކެއް އެމްޑީޕީއަށް ކުރައްވައިފަ އެވެ. ރައީސް މުއިއްޒު ދެއްކެވި ވާހަކަފުޅުތަކަށް ފާޑުވިދާޅުވަމުން ރައީސް ނަޝީދު ވިދާޅުވީ، ގައުމުގެ މިނިވަން ދުވަހުގެ މުނާސަބަތުގައި ޕޯޑިއަމަކަށް އަރާވަޑައިގެން އެމްޑީޕީއަށް ފާޑުވިދާޅުވިއިރު މި ހުންނެވުނީ ދައުލަތުގެ ނިޝާން ޖަހާފައިވާ ޕޯޑިއަމެއްގައިކަން ރައީސް މުއިއްޒުގެ ހަނދުމަފުޅުގައި ނެތް ކަމަށެވެ. ރައީސް މުއިއްޒު އެފަދަ މޭރުމަކުން އެމްޑީޕީއަށް ނިސްބަތްކޮށް ވާހަކަފުޅުދެއްކެވިއިރު، ކުރިފުޅުމަތީގައި ތިއްބެވި ފުލުހުންނާއި ސިފައިންގެ އިސްވެރިނާއި ދައުލަތުގެ އިސްވެރިން ތިއްބެވިކަން ވެސް ހަނދުމަފުޅުގައި ނެތް ކަަމަށް ރައީސް ނަޝީދު ވިދާޅުވި އެވެ.

ރާއްޖެއާ ގާތް ގުޅުމެއް ބާއްވަމުން އަންނަ އިސްލާމީ އަދި ގަލްފްގެ ގައުމުތަކަށް އަމާޒުކޮށް، އީރާނުން ހަމަލާދިނުމަށް ހިތްވަރު ލިބޭ ފަދަ މޭރުމަކުން ރައީސް މުއިއްޒު ދެއްކެވި ވާހަކަފުޅުތަކަށް ފާޑުވިދާޅުވަމުން ރައީސް ނަޝީދު ވަނީ އެކަމުގެ ސަބަބުން ގައުމަށް ލިބިދާނެ ގެއްލުމަކާ މެދު ކަންބޮޑުވުން ފާޅުކުރައްވައިފަ އެވެ. ސައުދީ އަރަބިއްޔާ، ގަތަރު، ޔޫއޭއީ، ކުވެއިތު އަދި ބަހްރައިން ފަދަ ރާއްޖޭގެ ތަރައްގީގެ މުހިންމު ބައިވެރިންނަށް ގެއްލުންދިނުމަށް ހިތްވަރު ލިބޭ ފަދަ މޭރުރަމުން ރައީސް މުއިއްޒު ވާހަކަފުޅު ދެއްކެވުމަކީ ދިވެހި ދައުލަތަށާއި ދިވެހި ރައްޔިތުންނަށް ލިބޭ ވަރަށް ބޮޑު ނިކަމެތި ކަމެއް ކަމަށް ރައީސް ނަޝީދު ވިދާޅުވި އެވެ.

ރައީސް ޑރ. މުއިއްޒު ވިދާޅުވެއްޖެ، މި އަހަރު މާޗު މަހު އިރާނަށް އިޝާރާތްކޮށް، ވިދާޅުވެއްޖެ ރަނގަޅަށް ބޮން އަޅާށޭ. ރަނގަޅަށް ހަލާކުވަންދެން ބޮން އަޅާށޭ. އަޅަން މި ވިދާޅުވަނީ ކޮންތަނަކަށްތޯ؟ އަޅުގަނޑުމެންގެ އެކުވެރި އިސްލާމީ ގައުމުތަކަށް. ސައުދީއަށް، ގަތަރަށް، ބަހުރެއިންނަށް ކުވެއިތައް، ޔޫއޭއީއަށް، ގަލްފުގެ ގައުމުތަކަށް

މުހައްމަދު ނަޝީދު

ރާއްޖޭގެ ތަރައްގީގެ މަސައްކަތްތަކުގައި ސައުދީ އަރަބިއްޔާއާއި ގަލްފުގެ ގައުމުތަކުން އެހީތެރިވެދޭ މިންވަރަށް މަދު ގައުމަކުން މެނުވީ އެހީތެރިކަން ފޯރުކޮށްދީފައިނުވާ ކަމަށާއި، އެ ގައުމުތަކަށް ބޮން އަޅައި ސުންނާފަތިކުރަން ރައީސް މުއިއްޒު ގޮވާލެއްވީމާ ރާއްޖެއަށް ލިބޭ ގެއްލުން މާ ބޮޑުވާނެ ކަމަށް ރައީސް ނަޝީދު ވިދާޅުވި އެވެ. އަދި ރައީސް މުއިއްޒު މިކަން ކުރެއްވީ އެމެރިކާއިން އޭޝިއާއަށް ކަނޑައަޅަޅުއްވާފައި ހުންނަވާ ހާއްސަ މަންދޫބު ރާއްޖޭގައި ހުންނަވަނިކޮށް ކަމަށާއި އެ ބޭފުޅާއާއި ބައްދަލުކުރެއްވުމުގެ ބަދަލުގައި ބައްދަލުވުން ކެންސަލްކުރެއްވުމަށް ފަހު، ދައުލަތުގެ ނިޝާން ޖަހާފައިވާ ރައީސް އޮފީހުގެ ޕޯޑިއަމް ބޭނުންކުރައްވައިގެން އެފަދަ މޭރުމަކުން ވާހަކަފުޅު ދެއްކެވުމުން ރައީސް ނަޝީދު ވަނީ ރައީސް މުއިއްޒަށް ވަރަށް ބޮޑަށް ފާޑުވިދާޅުވެފަ އެވެ.