ރާއްޖޭގެ ރީތި ރަށްތައް ގޮނޑުތަކަކަށް ހެއްދުމަށް ރައީސް މުއިއްޒުގެ ސަރުކާރުން ދަނީ މަސައްކަތް ކުރަމުން: ނަޝީދު
30 ޖުލައި 2026 | ބުރާސްފަތި 06:44ތިލަފުށީގައި ކުނި މެނޭޖްކުރުމުގެ ނިޒާމު ފެއިލްވެ، މާލެ ސަރަހައްދުގެ ކުނި ރާއްޖޭގެ އެހެން ރަށްތަކަށް އުކާލަން އުޅޭ ކަމަށް ބުނެ ކުރީގެ ރައީސް ނަޝީދު ވަނީ ކަންބޮޑުވުން ފާޅުކުރައްވާފައި. ޚާއްސަކޮށް ތިލަފުށީގެ ކުނިތައް ހދ. ކުނބުރުދޫއަށް ގެންދަން ނިންމި ނިންމުމާ ގުޅިގެން، އެ ސަރަހައްދުގެ ތިމާވެއްޓަށާއި ރައްޔިތުންގެ ސިއްހަތަށް ނުރައްކާވެދާނެ ކަމަށް ގިނަ ބަޔަކު ދަނީ ބުނަމުން
ގދ.ފިޔޯރީ އަށް ކުރީގެ ރައީސް މުހައްމަދު ނަޝީދު ވަޑައިގެންނެވުމުން އެރަށުގެ ރައްޔިތުން ވަނީ އެމަނިކުފާނަށް ހޫނު މަރުހަބާއެއް ދަންނަވާފައި | އެމްޑީޕީ
ކުނި ނައްތާލުމުގެ ނިޒާމު ފެއިލްވެފައިވާ ކަމަށާއި، ރާއްޖޭގެ ރީތި ރަށްތައް ގޮނޑުތަކަކަށް ހެއްދުމަށް ރައީސް ޑރ.މުހައްމަދު މުއިއްޒުގެ ސަރުކާރުން މަސައްކަތް ކުރަމުންދާ ކަމަށް ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވިދާޅުވެއްޖެ އެވެ.
ބުދަ ދުވަހުގެރޭ އެމްޑީޕީން ބޭއްވި ހަރުގެ ޖަލްސާގައި ނަޝީދު ވިދާޅުވީ، ތިލަފުށީގައި އަނެއްކާވެސް ކުނި އަންދަން ފަށާފައިވާ ކަމަށާއި، މާލޭގައި ކުނި ގިނަވެ ތިލަފުށްޓަށް ކުނި ނުގެންދެވޭ ހާލަތަށް ކަންކަން ގޮސްފައިވާ ކަމަށެވެ. އަދި މާލެ ސަރަހައްދަށް ރާއްޖޭގެ އާބާދީގެ 40 އިންސައްތަ ޖަމާކުރުމަށްފަހު، އެ ސަރަހައްދުގެ ކުނި އުކާލާ ތަންތަނުގެ ގޮތުގައި ރާއްޖޭގެ އެހެން ރަށްތައް ހެދުމަށް މަސައްކަތް ކުރަމުންދާ ކަމަށް އެމަނިކުފާނު ތުހުމަތު ކުރެއްވި އެވެ.
ސަރުކާރުން ކުނި އުކާލުމުގެ ކަންކަން ތިލަދުންމައްޗަށް ބަދަލުކުރަން އުޅޭކަމަށް އިޝާރާތް ކުރައްވައި ނަޝީދު ވިދާޅުވީ، އެއީ ކުނި އަޅަން އޮތް ރަށްތަކެއް ނޫން ކަމަށާއި، ކުނި އަޅާ ގޮނޑުތަކަކަށް ހަދައިގެން ނުވާނެ ކަމަށެވެ.
މި ތަނުގައި ކުނި އަޅާން އޮތް ތަނެއް ނޫން، ރާއްޖޭގެ ރަށްތަކަކީ. އެއީ ރައްޔިތުން ދިރިއުޅޭ ތަންތަން. އެއީ ގޮނޑެއް ނޫން. ތިލަދުންމައްޗަކު ނެތް ގޮނޑެއްމުހައްމަދު ނަޝީދު
މީގެ އިތުރުން، ތިލަފުށީގައި މިހާރު ހުރި ކުނި މެނޭޖްކުރާ މެޝިނަރީތައް ހަލާކުވެފައިވާ ކަމަށާއި، އެ ތަކެތި މަރާމާތު ކުރުމަށް ބޭނުންވާ ފައިސާ ސަރުކާރުގައި ނެތް ކަމަށް ވެސް ނަޝީދު ވިދާޅުވި އެވެ.
ކުނީގެ މައްސަލައިގައި ނަޝީދު ކަންބޮޑުވުންފާޅު ކުރެއްވިއިރު، ހުޅުމާލެ ރައްޔިތުން މިއަދު ތިބީ ކުނި ބޭރުކުރެވޭނެ އެއްވެސް ގޮތެއް ނެތި، ކޮޓަރިތަކުގައި ކުނި ޖަމާކޮށްގެން ކަމަށް ރައްޔިތުންގެ މަޖިލިސް މެންބަރުން ވިދާޅުވެފައިވެ އެވެ. އަދި ތިލަފުށިން އެނދި ކުނިތައް ކުނބުރުދޫ އަށް ގެންދިއުމަށް ވެމްކޯ އިން ވަނީ ނިންމާފަ އެވެ. މި ނިންމުމާ ގިނަ ބަޔަކު ދެކޮޅު ހެދި ނަމަވެސް މިމައްސަލައާ ގުޅިގެން ކަންބޮޑުވުން ފާޅުކޮށް ބުދަ ދުވަހު ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ވެސް މަޖިލީހުން ވަނީ ބޭރު ކޮށްލާފަ އެވެ.
މި މައްސަލައިގައި ބުނެފައިވަނީ އެނދި ކުނިތައް ހދ. ކުނބުރުދޫ އަށް ގެންގޮސްފިނަމަ، އެ އަތޮޅުގެ ރައްޔިތުންގެ ސިއްހަތަށާއި ތިމާވެއްޓަށާއި އަދި މުޅި ސަރަހައްދުގެ ގުދުރަތީ ނިޒާމަށް އިޔާދަނުކުރެވޭނެ ފަދަ ބޮޑެތި ގެއްލުންތަކެއް ލިބިދާނެ ކަމަށެވެ. އަދި ކުނބުރުދޫ އަކީ މިފަދަ ނުރައްކާތެރި ކުނި މެނޭޖްކުރެވޭނެ ފަދަ އުމްރާނީ ވަސީލަތްތައް ހުރި ރަށަކަށް ނުވާއިރު، މި ނިންމުން ބަދަލު ކުރުމަށް ރައްޔިތުންގެ މަޖިލީހުގައި މިނިވަންކަމާއެކު މަސައްކަތް ކުރާ މެންބަރުން ގޮވާލާފައިވެ އެވެ.
