އެމްޑީޕީގެ ޗެއާޕާސަންގެ ނައިބުގެ މަޤާމަށް ޝިއްޕެ އައްޔަނުކޮށްފި
1 ސެޕްޓެމްބަރު 2026 | އަންގާރަ 05:05އެ ޕާޓީގެ ޗެއާޕާސަންގެ ނައިބު، މާލީގެ މަޤާމަށް ޝިއްޕެގެ ނަން ހުށަހެޅުއްވީ އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު. އެ މަގާމަށް ޝިއްޕެ އައްޔަނުކުރުމަށް ފެންނަ ކަމަށް ޤައުމީ މަޖިލީހުގެ ބައްދަލުވުމުގައި ބައިވެރިވެވަޑައިގެންނެވި 30 މެންބަރުން ވަނީ ވޯޓު ދެއްވާފައި
އެމްޑީޕީގެ ޗެއާޕާސަންގެ ނައިބު މާލީގެ މަގާމަށް އައްޔަނު ކުރި ޝިފާޒު | ސޯޝަލް މީޑިއާ
އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ޗެއާޕާސަންގެ ނައިބުގެ މަގާމަށް މުހައްމަދު ޝިފާޒު (ޝިއްޕެ) އައްޔަނުކޮށްފި އެވެ.
ހޯމަ ދުވަހުގެރޭ އޮތް އެމްޑީޕީގެ ޤައުމީ މަޖިލީހުގެ ބައްދަލުވުމުގައި އެ ޕާޓީގެ ޗެއާޕާސަންގެ ނައިބު، މާލީގެ މަޤާމަށް ޝިއްޕެގެ ނަން ހުށަހެޅުއްވީ އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު އެވެ. އެ މަގާމަށް ޝިއްޕެ އައްޔަނުކުރުމަށް ފެންނަ ކަމަށް ޤައުމީ މަޖިލީހުގެ ބައްދަލުވުމުގައި ބައިވެރިވެވަޑައިގެންނެވި 30 މެންބަރުން ވަނީ ވޯޓު ދެއްވައިފަ އެވެ.
އެމްޑީޕީގެ ޗެއާޕާސަންގެ ނައިބު މާލީގެ މަގާމުގަައި އެންމެ ފަހުން ހުންނެވީ، ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އަހުމަދު އަބްދުﷲ އެވެ. ނަމަވެސް، ދާދި ފަހުން އަހުމަދު އަބްދުﷲ ވަނީ އެ މަގާމުން އިސްތިއުފާާ ދެއްވައިފަ އެވެ. އެ މަގާމުން އޭނާ އިސްތިއުފާ ދެއްވާފައި ވަނީ، އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަމަށް އިއުލާނު ކުރައްވާފައިވާ އަބްދުﷲ ޝާހިދުގެ ކެމްޕެއިންގައި އިސްކޮށް އުޅުއްވާތީ އެވެ.
އެމްޑީޕީގެ ޗެއާޕާސަންގެ ނައިބުގެ މަގާމަށް ޝިއްޕެ އައްޔަނު ކުރައްވާފައިވާއިރު، ޝިއްޕެ ވަނީ މީގެ ކުރިން އެމްޑީޕީގެ ނައިބު ރައީސްގެ މަގާމު ވެސް އަދާކުރައްވައިފަ އެވެ. ނަމަވެސް އެމްޑީޕީގެ ތެރޭގައި އުފެދުނު ޚިޔާލު ތަފާތުވުންތަކުގެ ތެރޭގައި ޝިއްޕެ ވަނީ އެ ޕާޓީ އިން ވަކިވެވަޑައިގެން، ދަ ޑިމޮކްރެޓްސް އަށް ސޮއިކުރައްވާފަ އެވެ. ނަމަވެސް، މިދިޔަ އަހަރުގެ ޖަނަވަރީ މަހުގެ ތެރޭގައި ޝިއްޕެ ވަނީ އަލުން އެމްޑީޕީ އަށް ސޮއިކުރައްވާފަ އެވެ.
ޝިއްޕެ އަކީ ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ރައީސް އޮފީހުގެ މިނިސްޓަރުގެ މަގާމު ވެސް އަދާކުރައްވާފައިވާ ބޭފުޅެކެވެ.
