އެމްޑީޕީގެ ނައިބު ރައީސްކަމުން ހިސާން އިސްތިއުފާ ދެއްވައިފި
27 އޯގަސްޓު 2026 | ބުރާސްފަތި 10:11ޑިމޮކްރަސީގެ ރިވެތި އުސޫލުތަކާއި ހަމަތަކަށް ރިއާޔަތް ކުރެއްވުމަށް ފަހު، އައު މެންޑޭޓެއް ނެތި ނައިބު ރައީސްގެ މަގާމުގައި އޭނާ ހުންނެވުމަކީ ޑިމޮކްރަސީގެ އަސާސްތަކާ އެކަށީގެންވާ ކަމެއް ނޫން ކަމަށް ހިސާން ވަނީ ފާހަގަކުރައްވާފައި
އެމްޑީޕީގެ ނައިބު ރައީސްގެ މަގާމުން އިސްތިއުފާ ދެއްވި ހިސާން ހުސެއިން | އެމްޑީޕީ
އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ނައިބު ރައީސްގެ މަގާމުގައި ހުންނެވި، ތުޅާދޫ ދާއިރާގެ ކުރީގެ މެންބަރު ހިސާން ހުސެއިން އެ މަގާމުން އިސްތިއުފާ ދެއްވައިފި އެވެ.
އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު އަށް އެޑްރެސް ކުރައްވައި ބުރާސްފަތި ދުވަހު ހިސާން ފޮނުއްވި ސިޓީގައި ވިދާޅުވީ، އެމްޑީޕީގެ އަސާސީ ޤަވާއިދު މިހާރު އޮތް ގޮތުން އެ ޕާޓީގެ ނައިބު ރައީސްގެ މަގާމަކީ އާންމު މެންބަރުންގެ ސީދާ ވޯޓަކުން އިންތިޚާބު ކުރާ މަގާމެއް ނޫން ކަމަށެވެ. އަދި އެއީ ޕާޓީގެ ރައީސްގެ ހުށަހެޅުއްވުމަށް، ޤައުމީ މަޖިލީހުގެ ރުހުމާ އެކު އައްޔަނު ކުރެވޭ މަގާމެއް ކަމަށް ހިސާން ފާހަގަ ކުރައްވާފައިވެ އެވެ.
ހިސާން ވިދާޅުވީ އެ މަގާމަށް އޭނާގެ ނަން ހުށަހަޅުއްވީ އޭރު ޕާޓީގެ ރައީސްއަކަށް ހުންނެވި ބޭފުޅާ ކަމަށެވެ. އެހެންވެ އޭނާގެ މަގާމުގެ ހައިސިއްޔަތާއި މެންޑޭޓް ގުޅިފައި ވަނީ އޭނާގެ ނަން ހުށަހަޅުއްވި ޕާޓީގެ ރައީސްގެ މެންޑޭޓާ ކަމުން، ޕާޓީގެ ރައީސް މަގާމުން އިސްތިއުފާ ދެއްވާ ކަމަށެވެ. އަދި ޑިމޮކްރަސީގެ ރިވެތި އުސޫލުތަކާއި ހަމަތަކަށް ރިއާޔަތް ކުރެއްވުމަށް ފަހު، އައު މެންޑޭޓެއް ނެތި ނައިބު ރައީސްގެ މަގާމުގައި އޭނާ ހުންނެވުމަކީ ޑިމޮކްރަސީގެ އަސާސްތަކާ އެކަށީގެންވާ ކަމެއް ނޫން ކަމަށް ހިސާން ވަނީ ފާހަގަ ކުރައްވައިފަ އެވެ.
އެހެންވެ ބުރާސްފަތި ދުވަހުން ފެށިގެން އެމްޑީޕީގެ ނައިބު ރައީސްގެ މަގާމުން އިސްތިއުފާ ދެއްވާ ކަމަށް ސިޓީގައި ހިސާން ވިދާޅުވެފައިވެ އެވެ. މަގާމުން އިސްތިއުފާ ދެއްވި ނަމަވެސް، އެމްޑީޕީގެ މެންބަރެއްގެ ގޮތުގައި ހުންނަވައި، ޕާޓީގެ ކުރިއެރުމަށް މަސައްކަތް ކުރައްވާނެ ކަމަށް ހިސާން ވަނީ ވިދާޅުވެފައި އެވެ.
އެމްޑީޕީގެ ނައިބު ރައީސްގެ މަގާމަށް ހިސާންގެ ނަން ހުށަހަޅުއްވީ އެ ޕާޓީގެ ކުރީގެ ރައީސް އަބްދުﷲ ޝާހިދު އެވެ. ނަމަވެސް، އެމްޑީޕީގެ ރިޔާސީ ޕްރައިމަރީގައި ބައިވެރިވެ ވަޑައިގެންނެވުމަށް ޝާހިދު ވަނީ އެ ޕާޓީގެ ރައީސްކަމުން އިސްތިއުފާ ދެއްވައިފަ އެވެ. ހިސާން އަކީ ޝާހިދުގެ ކެމްޕެއިންގައި އިސްކޮށް ހަރަކާތްތެރިވެވަޑައިގަންނަވާ ބޭފުޅެކެވެ.
