ސަރުކާރު ހިއްސާވާ ކުންފުނިތަކުގައި 40،000 އަށް ވުރެ ގިނަ މުވައްޒަފުން، މިނިސްޓަރު ވިދާޅުވީ ވަކިކުރަނީ ވަކި ކުލައަކަށް ބަލައިގެން ނޫން ކަމަށް
18 އޯގަސްޓު 2026 | އަންގާރަ 04:53މިނިސްޓަރު ވިދާޅުވެފައި ވަނީ މި ސަރުކާރު އައި ފަހުން ސަރުކާރުގެ ކުންފުނިތަކަށް ވައްދާފައި ވަނީ، 4938 މުވައްޒަފުން ކަމަށް. މިދިޔަ މަހާ ހަމައަށް އައިއިރު ސަރުކާރު ހިއްސާވާ ކުންފުނިތަކުގައި ތިބި މުވައްޒަފުންގެ އަދަދަކީ 41،767 ކަމަށް މިނިސްޓަރު ވަނީ ވިދާޅުވެފައި
ރައީސް މުއިއްޒު އަދި ފިނޭންސް މިނިސްޓަރު ހަސަން ޒަރީރު | ރައީސް އޮފީސް
އިދިކޮޅު އެމްޑީޕީ އަށް ނިސްބަތްވާ އެތައް މުވައްޒަފުންތަކެއް ވަޒީފާ އިން ވަކި ކުރަމުން އަންނައިރު ވެސް، ވަޒީފާ އިން މުވައްޒަފުން ވަކި ކުރަނީ ވަކި ޕާޓީއަކަށް ނުވަތަ ވަކި ފިކުރަކަށް ބަލައިގެން ނޫން ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.
ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ކުރެއްވި ސުވާލަކަށް ޖަވާބު ދެއްވަމުން، އަންގާރަ ދުވަހުގެ ޖަލްސާގައި މިނިސްޓަރު ޒަރީރު ވިދާޅުވީ، ސަރުކާރު ހިއްސާާވާ ކުންފުނިތަކުގައި މަސައްކަތް ކުރާ މުވައްޒަފުން ނިސްބަތްވާ ސިޔާސީ ޕާޓީ އަށް ބަލައިގެން، އެ މުވައްޒަފަކު ފާޅު ކުރާ ޝުއޫރަށް ބަލައިގެން ވަޒީފާ އިން ވަކި ކުރުމަކީ މި ސަރުކާރުން ޤަބޫލު ކުރާ ކަމެއް ނޫން ކަމަށެވެ. އަދި އެފަދަ އެންގެމެއް ވެސް އަންގާފައި ނުވާނެ ކަމަށް މިނިސްޓަރު ވިދާޅުވި އެވެ.
އެހެން ނަމަވެސް، ސަރުކާރުގެ ކުންފުނިތަކުގެ މާލީ ޙާލަތު ރަނގަޅު ކުރުމާއި، ހިންގުން ހަރުދަނާ ކުރުމަށް އަންގަން ޖެހޭ އެންގުންތައް އަންގަމުންދާ ކަމަށް މިނިސްޓަރު ވިދާޅުވި އެވެ. އެފަދަ ޕޮލިސީ ޑައިރެކްޓަޝަން ފިޔަވައި، މުވައްޒަފުން ވަކި ކުރުމާާއި، މަދުކުރުން އަދި އެފަދަ އެ ނޫން ވެސް ދުވަހުން ދުވަހަށް ކުރަން ޖެހޭ ކަންކަމުގައި އެއްވެސް ކަމެއް ވަކި ގޮތަކަށް ކުރުމަށް އަންގާފައި ނުވާނެ ކަމަށް މިނިސްޓަރު ޒަރީރު ވަނީ ވިދާޅުވެފައި އެވެ.
އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވެފައި ވަނީ މި ސަރުކާރު އައި ފަހުން ސަރުކާރުގެ ކުންފުނިތަކަށް ވައްދާފައި ވަނީ، 4938 މުވައްޒަފުން ކަމަށެވެ. މިދިޔަ މަހާ ހަމައަށް އައިއިރު ސަރުކާރު ހިއްސާވާ ކުންފުނިތަކުގައި ތިބި މުވައްޒަފުންގެ އަދަދަކީ 41،767 ކަމަށް މިނިސްޓަރު ވަނީ ވިދާޅުވެފައި އެވެ. އެއާ އެކު މިނިސްޓަރު ވިދާޅުވީ 2018 ވަނަ އަހަރު ސަރުކާރުގެ ކުންފުނިތަކުގައި ތިބީ 18،776 މުވައްޒަފުން ކަމަށެވެ. އަދި 2018 ވަނަ އަހަރުން ފެށިގެން، 2023 ވަނަ އަހަރާ ހަމައަށް އައިއިރު، އެ އަދަދު ހުރީ 36،729 ގައި ކަމަށް ވެސް މިނިސްޓަރު ވަނީ ވިދާޅުވެފައި އެވެ.
މީގެ އިތުރުން މިނިސްޓަރު ޒަރީރު ވިދާޅުވީ ސަރުކާރުގެ ކުންފުނިތައް ރައިޓް ސައިޒް ކުރާއިރު، އެއީ ދިވެހި ރައްޔިތެއްކަން ވިސްނަން ޖެހޭ ކަމަށާއި، ކުލަ އަކަށް ބެލުމެއް ނެތި ދިވެހި ރައްޔިތުން ރައްކާތެރިކޮށްދޭން ޖެހޭ ކަމަށެވެ. ރައިޓް ސައިޒް ކުރުމުގެ މަސައްކަތް ކުރިއަށް ގެންދާއިރު، ރިޑަންޑެންސީ ޕެކޭޖު ދިނުން ފަދަ ކަންކަން ހިމަނާފައި ވާނެ ކަމަށް މިނިސްޓަރު ފާހަގަ ކުރެއްވި އެވެ. އަދި ވަޒީފާ އިން ވަކި ކުރެވޭ މީހުންނަށް އަމިއްލަ މަސައްކަތް ކުރުމުގެ ފުރުސަތު އޮތް ކަމަށް ވެސް މިނިސްޓަރު ވަނީ ވިދާޅުވެފައި އެވެ.
އަދި ރައިޓް ސައިޒް ކުރާއިރު އަޅުގަނޑުމެން ވިސްނަން ޖެހޭ މިއިން ކޮންމެ ބޭފުޅަކީ ވެސް ދިވެހި ރައްޔިތެއްކަން، ދިވެހި މަންމައެއްކަން، ދިވެހި ބައްޕައެއްކަން، ދިވެހި ދަރިއެއްކަން. އެހެންވީމާ ކުލަ އަކަށް ބެލުމެއް ނެތި އަޅުގަނޑުމެންގެ ފުރަތަމަ ކަމަކަށް ވާން ޖެހޭނީ ދިވެހި ރައްޔިތުން ޕްރޮޓެކްޓު ކުރުންހަސަން ޒަރީރު
ފިނޭންސް މިނިސްޓަރު ޒަރީރު މިހެން ވިދާޅުވެފައި ވީ ނަމަވެސް، ސަަރުކާރު ހިއްސާވާ ކުންފުނިތަކުގައި މަސައްކަތް ކުރާ އިދިކޮޅު ޕާޓީ އަށް ނިސްބަތްވާ، ނުވަތަ ސަރުކާާރަށް ތާއީދު ނުކުރާ ގިނަ މުވައްޒަފުންތަކެއް އަންނަނީ ވަޒީފާ އިން ވަކި ކުރަމުންނެވެ. އަދި އިިދިކޮޅު ޕާޓީގެ ހަރަކާާތްތަކުގައި ބައިވެރިވާާ މުވައްޒަފުން ވެސް ވަނީ ވަޒީފާ އިން ވަކިކޮށްފައި އެވެ. އެކަމާ ގުޅިގެން ސަރުކާރަށް ގިނަ ބައެއްގެ ފާޑު ކިޔުން އަމާޒުވެފައިވެ އެވެ.
