އެމްޑީޕީގެ ކޮންގްރެސް ސެޕްޓެމްބަރު މަހުގެ 19ގައި ބޭއްވުމަށް ފާސްކޮށްފި
2 އޯގަސްޓު 2026 | އާދީއްތަ 16:40އެމްޑީޕީގެ ކޮންގްރެސް ސެޕްޓެމްބަރު 19 ވާ ހޮނިހިރު ދުވަހު ބާއްވަން ފާސްކޮށްފައި ވަނީ ޖަލްސާ އަށް ވަޑައިގެންނެވި 63 މެމްބަރުންގެ ތެރެއިން، 52 މެމްބަރުންގެ ވޯޓާ އެކު
އެންމެ ފަހުން 2022 ވަނަ އަހަރު އޮތް އެމްޑީޕީގެ ކޮންގްރެސްގައި ކުރީގެ ރައީސް ސޯލިޙު އަދި ކުރީގެ ރައީސް ނަޝީދު | ސޯޝަލް މީޑިއާ
އިދިކޮޅު މައި ޕާޓީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ކޮންގްރެސް އަންނަ ސެޕްޓެމްބަރު މަހުގެ 19 ވަނަ ދުވަހު ބާއްވަން ފާސްކޮށްފި އެވެ.
އާދީއްތަ ދުވަހުގެ ރޭ އޮތް އެމްޑީޕީގެ ޤައުމީ މަޖިލީހުގެ ބައްދަލުވުމުގައި ސެޕްޓެމްބަރު މަހުގެ 19 ވަނަ ދުވަހު ކޮންގްރެސް ބާއްވަން ހުށަހެޅުއްވީ، އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު އެވެ.
އެމްޑީޕީގެ ކޮންގްރެސް ސެޕްޓެމްބަރު 19 ވާ ހޮނިހިރު ދުވަހު ބާއްވަން ފާސްކޮށްފައި ވަނީ ޖަލްސާ އަށް ވަޑައިގެންނެވި 63 މެމްބަރުންގެ ތެރެއިން، 52 މެމްބަރުންގެ ވޯޓާ އެކު އެވެ. ކޮންގްރެސްގެ ކަންކަން ކުރިއަށް ގެންދިޔުމަށް އެމްޑީޕީގެ ތިމަރަފުށީ ދާއިރާގެ ރައީސް އަންވަރު އިބްރާހީމް ހުށަހެޅުއްވި އެވެ. ނަމަވެސް ރިޔާސަތުން ވަނީ ކޮމެޓީއެއް އެކުލަވާލުމަށް އަސާސީ ޤަވާއިދުގައި ބަޔާން ކޮށްފައި ނެތް ކަމަށް ފާހަގަ ކުރައްވައިފަ އެވެ.
އެމްޑީޕީ އިން މީގެ ކުރިން އެންމެ ފަހުން އެ ޕާޓީގެ ކޮންގްރެސް ބާއްވާފައި ވަނީ 2022 ވަނަ އަހަރު އެވެ. އޭގެ ފަހުން އެމްޑީޕީގެ ކޮންގްރެސް ބޭއްވުމަށް މަސައްކަތް ކުރުމަށް ފަހު، ފަހުން ވަނީ ކޮންގްރެސް އެހެން ތާރީޚެއްގައި ބޭއްވުމަށް ނިންމައިފަ އެވެ. އެމްޑީޕީގެ ކޮންގްރެސް އަކީ އެ ޕާޓީގެ މުސްތަޤުބަލާ ގުޅޭ މުހިންމު ކަންކަން އަދި ރިޔާސީ އިންތިޚާބާ ގުޅޭ މުހިންމު ނިންމުންތައް ނިންމާ މުހިންމު ބައްދަލުވުމެކެވެ.
