އެމްޕީއެލްގައި މަސައްކަތު މީހުންގެ ގޮތުގައި ތިބި އަންހެނުން ތިލަފުއްޓަށް ކައްކަން ގެންދާކަމަށް އެމްޕީއެލްއިން އެއްބަސްވެއްޖެ
24 އޯގަސްޓު 2026 | ހޯމަ 12:21ތިލަފުށީގައި ކުރިއަށްދާ މަސައްކަތްތަކާ ގުޅިގެން އެމްޕީއެލްގެ އެޑްމިން ސެކްޝަނުގެ މަސައްކަތު އަންހެން މުވައްޒަފުން ކައްކަން ފޮނުވަނީ ވަގުތީ އިންތިޒާމެއްގެ ދަށުން ކަމަށް އެ ކުންފުނިން ބުނެފި. މުވައްޒަފުންނަށް މަޖުބޫރުކޮށްގެން މި މަސައްކަތް ނުކުރުވާ ކަމަށް އެމްޕީއެލްއިން ބުނި ނަމަވެސް، މާލޭގައި މަސައްކަތް ކުރަން ނަގާފައިވާ މުވައްޒަފުން ރަށުން ބޭރަށް ފޮނުވާތީ އެކަމުގެ ކަންބޮޑުވުން ވަނީ އިތުރުވެފައި
"ފަށާއިރު" ޕްރޮގްރާމްގެ ތެރެއިން | ރާއްޖެ އެމްވީ
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މަސައްކަތު މީހުންގެ ގޮތުގައި ތިބި އަންހެން މުވައްޒަފުން ތިލަފުއްޓަށް ކައްކަން ގެންދާކަމަށް އެމްޕީއެލްއިން އެއްބަސްވެއްޖެ އެވެ.
ރާއްޖެޓީވީގެ "ފަށާއިރު" ޕްރޮގްރާމްގެ ތެރެއިން އެމްޕީއެލްއަށް ގުޅުމުން ބުނެފައިވަނީ، ތިލަފުށީގައި އެމްޕީއެލްއިން ބައެއް މަސައްކަތްތައް ކުރިއަށް ގެންދާތީ، ވަގުތީ ގޮތުން އެމްޕީއެލްގެ އެޑްމިން ޑިޕާޓްމަންޓުގައި މަސައްކަތް ކުރާ މަސައްކަތު މުވައްޒަފުން ތިލަފުށްޓައް ކައްކަން ގެންދާ ކަމަށެވެ.
އެގޮތުން، ތިލަފުށްޓަށް ކައްކަން ދާން ޖެހެނީ ވަކި ޝެޑިއުލްއެއްގެ ތެރެއިން ހަފްތާއަކު އެއް ދުވަހު ކަމަށް އެމްޕީއެލްއިން މައުލޫމާތު ދިނެވެ. އަދި ތިލަފުށްޓަށް ކައްކަން ގެންދަނީ މަޖުބޫރުން ކަމަށް ބައެއް މުވައްޒަފުން ބުނެފައިވީ ނަމަވެސް އެމްޕިއެލްއިން ބުނީ އެއްވެސް މުވައްޒަފަކަށް މަޖުބޫރު ކޮށްފައި ނުވާނެ ކަމަށެވެ.
އެމީހުންނާ މަޝްވަރާ ކޮށްފައި، އަނެއްކާ ކޮންމެ ދުވަހަކު ކޮންމެ މީހަކު ދާން ޖެހެނީ ކީ ނޫން، ވަކި ގޮތަކަށް ބަހާލައިގެން ހަފްތާއަކު އެއް ދުވަހު ކަހަލަ ގޮތަކަށް ކޮންމެ މީހަކު ދާން ޖެހެނީ، މިބުނީ އެއްވެސް ވަރަކަށް ތިދަންނަވާހެން މަޖުބޫރު ކޮށްގެން، ވަޒީފާ ބިރު ދައްކައިގެން އެކަހަލަ ގޮތަކަށް ނޫންއެމްޕީއެލް މީޑިއާ އޮފިޝަލް
އެމްޕީއެލް އިން ބުނީ މިވަގުތު މަސައްކަތު މުވައްޒަފުން ފޮނުވަން ޖެހުނީ އެތަނުގައި އެމްޕީއެލްގެ މަސައްކަތް ކުރިއަށް ދާތީ، ކޮންމެވެސް ގޮތެއް ހޯދަން މަޖުބޫރުވުމުން ކަމަށެވެ.
ނަމަވެސް މާލެގައި ވަޒީފާ އަދާކުރާ މުވައްޒަފުން ރަށުން ބޭރަށް ދާން ޖެހެމުން ގިނަ ދަތިތަކަކާއި ކުރިމަތި ލާން ޖެހޭތީ އެކަމުގެ ކަންބޮޑުވުން އެމްޕީއެލްގެ އެ މުވައްޒަފުން ދަނީ ފާޅުކުރަމުންނެވެ.
