ވިޔަފާރި ބަނދަރުގެ ކީ-ވޯލްގެ މަސައްކަތް ޗައިނާގެ ކުންފުންޏަކާ ހަވާލުކޮށްފި

މާލޭ ވިޔަފާރީ ބަނދަރު ތިލަފުއްޓަށް ބަދަލު ކުރުމުގެ މަޝްއޫރުގެ ދަށުން އިންޓަނޭޝަނަލް އަދި ޑޮމެސްޓިކް ކީ-ވޯލްގެ މަސައްކަތް ބަޔަކާ ހަވާލުކޮށްފި އެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފައިވާ ގޮތުގައި މި މަސައްކަތް ހަވާލުކޮށްފައި ވަނީ ޗައިނާގެ ކުންފުންޏެއް ކަމަށްވާ، ޗައިނާ ހާބާ އިންޖިނިއަރިންއާ އެވެ. މި މަސައްކަތް އެ ކުންފުންޏާ ހަވާލު ކުރުމަށް އެމްޕީއެލްގައި ބޭއްވި ރަސްމިއްޔާތުގައި އެމްޕީއެލްގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ ސީއީއޯ ޙުސެއިން ޝަފީޤު އެވެ. އަދި ޗައިނާ ހާބާ އިންޖިނިއަރިންގެ ފަރާތުން ސޮއި ކުރެއްވީ މާއޯ ބާއޯ އެވެ. 

އެމްޕީއެލް އިން އެކްސްގައި ކުރި ޕޯސްޓެއްގައި ބުނެފައި ވަނީ އެ ޗައިނާ ހާބާ އިންޖިނިއަރިންއާ ހަވާލު ކުރެވުނު އެއްބަސްވުމުގެ ދަށުން ބައިނަލްއަޤުވާމީ މުދާ އުފުލާ ކޮންޓޭނަރު ބޯޓު ފަހަރަށް ޚާއްސަ، 14.6 މީޓަރު ފުން މިނުގެ 375 މީޓަރު ދިގު ކީ-ވޯލް ހެދުމާއި، ރާއްޖޭގެ އެތެރޭގެ ދަތުރު ފަތުރުތަކުގައި ބޭނުން ކުރާ މުދާ އުފުލާ އުޅަނދު ފަހަރަށް ޚާއްސަ ފަސް މީޓަރުގެ ފުން، 820 މީޓަރުގެ ދިގު ޑޮމެސްޓިކް ކީ-ވޯލްއެއް ހެދުން ހިމެނޭ ކަމަށެވެ.

ނަމަވެސް، މި މަސައްކަތް ޗައިނާ ހާބާ އިންޖިނިއަރިންއާ ހަވާލު ކުރީ ކޮން މުއްދަތަކަށް ނިންމަން ކަމެއް، އަދި މި މަސައްކަތުގެ އަގެއް އެމްޕީއެލް އިން ހާމަކޮށްފައި ނުވެ އެވެ. އެމްޕީއެލް އިން ސޯޝަލް މީޑިއާގައި ކުރި ޕޯސްޓުގައި ވެސް އެކަމުގެ ތަފްސީލުތަކެއް ހިމަނާފައި ނުވެ އެވެ. 

އެކަމުގެ ތަފްސީލު ހޯދުމަށް "ރާއްޖެ އެމްވީ" އިން ގުޅުމުން އެމްޕީއެލްގެ އިންފޮމޭޝަން އޮފިސަރު ވިދާޅުވީ، އެ މައުލޫމާތު ހޯދުމަށް ޖެހޭނީ އާރުޓީއައި ހުށަހަޅަން ކަމަށެވެ. އަދި އާރުޓީއައި ހުށަހަޅައިގެން ނޫން ގޮތަކަށް އެ މައުލޫމާތު ނުދެވޭނެ ކަމަށް ވެސް އިންފޮމޭޝަން އޮފިސަރު ވިދާޅުވި އެވެ. 

ވިޔަފާރީ ބަނދަރު ތިލަފުއްޓަށް ބަދަލު ކުރުމުގެ މި މަޝްރޫއުގެ ބައެއް މަސައްކަތްތައް މީގެ ކުރިން ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ވެސް ހަވާލުކޮށްފައި އެވެ. އެގޮތުން މިދިޔަ ޖޫން މަހުގެ އެއް ވަނަ ދުވަހު އެމްޓީސީސީއާ ހަވާލުކޮށްފައި ވަނީ 100 މީޓަރުގެ ޑޮމެސްޓިކް ކީ-ވޯލް އަދި ތިން ހެކްޓަރުގެ ސަރަހައްދެއް ޕޭވް ކުރުމުގެ މަސައްކަތެވެ.