ޔޫއޭއީ އަށް އީރާން އިން މިސައިލް ހަމަލާތަކެއް ދިން ކަމަށް ކުރާ ތުހުމަތު ދޮގުކޮށްފި

އީރާން އިން ޔުނައިޓެޑް އަރަބް އެމިރޭޓްސް (ޔޫއޭއީ) އަށް ދެ ބެލިސްޓިކް މައިސިލް ހަމަލާ ދީފައިވާ ކަމަށް ކޮށްފައިވާ ތުހުމަތަކީ އެއްވެސް އަސާސެއް ނެތް، ދޮގު ވާހަކަތަކެއް ކަމަށް އީރާން އިން ބުނެފި އެވެ. 

އީރާންގެ ފޮރިން މިނިސްޓްރީގެ ޓެލެގްރާމް ޗެނަލްގައި ނެރުނު ބަޔާނެއްގައި އެ މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، އީރާން އަށް ތުހުމަތު ކުރުމަކީ ރަނގަޅު ޤައުމީ ގުޅުމުގެ އުސޫލުތަކާ ފުށުއަރާ ކަމެއް ކަމަށާއި، އެ ސަރަހައްދުގެ ޤައުމުތަކާ ދެމެދު އިތުބާރު ބިނާ ކުރުމުގެ މަސައްކަތްތަކަށް ހުރަސްއަޅާ ކަމެއް ކަމަށެވެ.

އެ ބަޔާނުގައި ބަޣާއީ ވަނީ، އެއްވެސް އަސާސެއް ނެތް ދޮގު ތުހުމަތުތަކެއް އީރާންގެ މައްޗަށް ނުކުރުމަށް ގޮވާލައްވައިފަ އެވެ. އަދި އެފަދަ ތުހުމަތު ކުރުން ހުއްޓާލުމަށް ވެސް އޭނާ ވަނީ އެދިވަޑައިގެންފައި އެވެ. 

ފޮރިން މިނިސްޓްރީގެ ތަރުޖަމާން ވިދާޅުވީ، މި ހާލަތާ ބެހޭ ގޮތުން ފެންނަންހުރި ހެކިތަކަށް ބަލާއިރު އެމެރިކާ އާއި އިސްރާއީލް އިން ސަރަހައްދީ ސުލްހަ އާއި ސަލާމަތާ ދެކޮޅަށް ކުރަމުންދާ ނުބައި އަމަލުތައް ފެންނަން ހުރި ކަމަށެވެ. އޭނާ ވިދާޅުވީ އެ ސަރަހައްދުގައި ދޮގު ހަމަލާތައް ދިނުމުގެ ތާރީޚެއް އެބަ އޮތް ކަމަށެވެ.

އީރާން އިން މި ބަޔާން ނެރެފައި ވަނީ، ޔޫއޭއީ އިން އީރާން އަށް ތުހުމަތުކޮށްފައި ވަނިކޮށެވެ. އެގޮތުން ޔޫއޭއީ އިން ބުނެފައި ވަނީ، އީރާން އިން އެ ޤައުމަށް އަމާޒުކޮށް ދެ ބެލިސްޓިކް މިސައިލް ހަމަލާ ދީފައިވާ ކަމަށެވެ. އީރާން އިނ މި ތުހުމަތު ދޮގު ކޮށްފައިވާއިރު، މިކަމުގެ ސަބަބުން ދެ ޤައުމުގެ ދެ މެދުގައި އޮތް ގުޅުމަށް އިތުރު ހީނަރު ކަމެއް އަތުވެދާނެ ކަމަށް ބެލެވެ އެވެ. 

އީރާން އިން ބުނެފައި ވަނީ އެ ޤައުމުގެ ސިޔާާސަތަކީ ސަރަހައްދީ ޤައުމުތަކާ އެކު ރަނގަޅު ގުޅުމެއް ބިނާ ކުރުން ކަމަށާއި، އެހެން ޤައުމުތަކުގެ އަމިއްލަ ކަންކަމުގައި އީރާން އިން ބައިވެރި ނުވާނެ ކަމަށެވެ. އެހެން ނަމަވެސް، ސަރަހައްދީ ބައެއް ޤައުމުތަކުން އަންނަނީ އީރާންއާ ދެކޮޅަށް އެކި އެކި ތުހުމަތު ކުރަމުންނެވެ.