އިންފަންޓީނޯ އަށް ދީފައިވާ ތާއީދު އަޔަލެންޑުން ވެސް އަނބުރާ ގެނެސްފި

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ އަށް ދެމުން އައި ތާއީދު އަޔަލެންޑުން އަނބުރާ ގެނެސްފި އެވެ.

މިކަން ހާމަކޮށްފައި ވަނީ އަޔަލެންޑުގެ ފުޓުބޯޅަ އެސޯސިއޭޝަން އިންނެވެ. އިންފަންޓީނޯ އަށް ދީފައިވާ ތާއީދު އަނބުރާ ގެނައުމަށް ފަހު، އަޔަލެންޑުން ވަނީ ޔުއެފާގެ ނިންމުމަށް ތާއީދު ކުރަން ނިންމައިފަ އެވެ. 

މިދިޔަ ހޯމަ ދުވަހު ޔުއެފާ އާއި، އޭއެފްސީ އަދި ކޮންކާކަފް އިން ވަނީ ހުޅުވާލެވިފައިވާ ސިޓީއެއް އާންމުކޮށްފައި އެވެ. ތިން ފެޑެރޭޝަންގެ ރައީސުންގެ އިތުރުން، ޖެނެރަލް ސެކްރެޓަރީ އިން ސޮއިކޮށްފައިވާ އެ ސިޓީގައި ބުނެފައި ވަނީ، އިންފަންޓީނޯ އަށް ކުރަމުން އައި އިތުބާރު ގެއްލިފައިވާ ކަމަށެވެ. 

އަޔަލެންޑުގެ ފުޓުބޯޅަ އެސޯސިއޭޝަން އިން ފީފާ އަށް ފޮނުވާފައިވާ ސިޓީއެއްގައި ބުނެފައި ވަނީ، އިންފަންޓީނޯ އަށް ދެމުން އައި ތާއީދު އަނބުރާ ގެނެސްފައިވާ ކަމަށެވެ. އަދި ވޯލްޑް ކަޕްގެ ފަހުން ފެންމަތިވި މައްސަލަތަކުގެ ކުރިން، އަޔަލެންޑުން އިންފަންޓީނޯ އަށް ފުރިހަމަ އަށް ތާއީދުކުރަމުން އައި ކަަމަށް ވެސް ބުނެފައިވެ އެވެ. 

އަޔަލެންޑުން މިއަހަރުގެ ކުރީ ކޮޅު ވަނީ، އިންފަންޓީނޯ އަށް ތާއީދު ކުރާ ކަމަށް ބުނެ، ފީފާ އަށް ސިޓީ ފޮނުވައިފަ އެވެ. ނަމަވެސް، އެ ތާއީދު އަނބުރާ ގެންނަން ނިންމީ، އަޔަލެންޑުގެ ފުޓުބޯޅަ އެސޯސިއޭޝަން އިން ބޭއްވި ކުއްލި ބައްދަލުވުމަކަށް ފަހު އެވެ. ފީފާ އަށް އެކަން ސިޓީއަކުން އަންގާފައި ވަނީ، އެ އެސޯސިއޭޝަންގެ ނިންމުން ސާފުކޮށްދިނުމުގެ ބޭނުމުގައި އެވެ. 

މީގެ ކުރިން ވޭލްސް އާއި އިންގްލެންޑުން ވެސް ވަނީ އިންފަންޓީނޯ އަށް ދެމުން އައި ތާއީދު އަނބުރާ ގެންނަން ނިންމައިފ އެވެ. ނަމަވެސް، އާޖެންޓީނާ އާއި މެކްސިކޯގެ އިތުރުން، ކޮންމެބޯލް އިން ވަނީ އިންފަންޓީނޯ އަށް ތާއީދު ކުރާކަން ހާމަކޮށްފައި އެވެ. 

ފީފާ އަށް ފޮނުވި ސިޓީގައި އަޔަލެންޑުގެ ފުޓުބޯޅަ އެސޯސިއޭޝަން އިން ވަނީ، އެ އިދާރާ އިން ދެމުން އަންނަ އެހީތެރިކަމާއި، އެއްބާރުލުމަށް ޝުކުރު އަދާކޮށްފައި އެވެ. ނަމަވެސް، މި ފަހުން ހިނގައި ދިޔަ ކަންތައްތަކުގެ ސަބަބުން، ވެރިކަން ހިންގުމާއި އަދި މާނަހުރި މަޝްވަރާތަކަށް ޖާގަ ނެތްކަން ވަރަށް ބޮޑަށް ފާހަގަވި ކަމަށް ވެސް ބުނެފައިވެ އެވެ.