ސިއްރު ލޯބިވެރިޔާ އަށް ޔޫރަޕްގެ ފުޓްބޯޅަ ޖަމްއިއްޔާ އިން ޚަރަދު ކުރިކަމަށް ދެކެވޭ ވާހަކަތައް އިންފަންޓީނޯ ދޮގުކުރައްވައިފި

ޔޫރަޕްގެ ފުޓްބޯޅައިގެ މައި ޖަމްއިއްޔާ ޔޫއެފްއާގެ ޖެނެރަލް ސެކްރެޓަރީގެ މަގާމުގައި ޖިއާނީ އިންފަންޓީނޯ ހުންނެވި ދުވަސްވަރު، އޭނާއާ ސިއްރު ލޯބީގެ ގުޅުމެއް އޮތް ކަމަށް ބުނާ އަންހެނަކަށް ވަޒީފާއިން ވަކިވުމުގެ ބަދަލުގެ ގޮތުގައި އެ އިދާރާއިން ފައިސާ ދީފައިވާ ކަމަށް "ޑެއިލީ ޓެލެގްރާފް" ނޫހުން ކުރި ތުހުމަތުތައް އިންފަންޓީނޯ ދޮގުކުރައްވައިފި އެވެ.

މިހާރު ފީފާގެ ރައީސްގެ މަގާމުގައި ހުންނެވި އިންފަންޓީނޯގެ ތަރުޖަމާނަކު އެ ނޫހަށް މައުލޫމާތު ދެމުން ބުނެފައިވަނީ، އިންފަންޓީނޯއާ ގުޅުވައިގެން ދައްކަނީ އެއްވެސް ހަގީގަތެއް ނެތް ވާހަކަތަކެއް ކަމަށާއި، އެ ތުހުމަތުތައް އޭނާ ހަރުކަށި އިބާރާތުން ދޮގުކުރައްވާ ކަމަށެވެ.

އިންފަންޓީނޯ 2009 އިން 2016 އަށް ޖެނެރަލް ސެކްރެޓަރީގެ މަގާމު ފުރުއްވި ޔޫއެފްއާއިން ނެރުނު ބަޔާނެއްގައި، އެ ބުނާ އަންހެން މީހާ ވަޒީފާއިން ވަކިވުމާ ގުޅިގެން ފައިސާގެ ފޭމަންޓެއް ދީފައިވާކަން ވަނީ ކަށަވަރުކޮށްދީފަ އެވެ.

މި ތުހުމަތުތައް ފެންމަތިވެފައި މިވަނީ، ވޯލްޑް ކަޕްގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް އިންފަންޓީނޯ ރޭވި ރޭވުންތައް ނާކާމިޔާބުވެ، ފީފާގެ ރައީސްކަމުގެ މަގާމު ދިފާއުކުރެއްވުމަށް އޭނާ ގިނަ މަސައްކަތްތަކެއް ކުރައްވަމުން ގެންދަވާ ދަނޑިވަޅެއްގަ އެވެ.

ޓެލެގްރާފުން ރިޕޯޓްކޮށްފައިވާ ގޮތުގައި، ޔޫރަޕްގެ ފުޓްބޯޅައިގެ މައި އިދާރާގައި އިންފަންޓީނޯ މަސައްކަތް ކުރެއްވި ދުވަސްވަރު، ކައިވެނި ބައްލަވައިގެން އުޅުއްވާ އިންފަންޓީނޯއާ ސިއްރު ގުޅުމެއް ބޭއްވި ކަމަށް ބުނާ އަންހެން މީހާއަށް ޔޫއެފްއާއިން ވަނީ ފައިސާގެ ބޮޑު އަދަދެއް ދީފަ އެވެ.

ފީފާގެ ތަރުޖަމާނަކު ޓެލެގްރާފަށް މައުލޫމާތު ދެމުން ބުނީ، ފީފާގެ ރައީސް ޖިއާނީ އިންފަންޓީނޯ މި ތުހުމަތުތައް ހަރުކަށި އިބާރާތުން ދޮގުކުރައްވާ ކަމަށާއި، މިއީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ. އަދި އިންފަންޓީނޯގެ އަޚުލާގީ މިންގަނޑާ މެދު ނުވަތަ ގަވާއިދުތަކާ ޚިލާފުވުމާ ގުޅޭގޮތުން ދައްކާ ކޮންމެ ވާހަކައަކީ އޭނާގެ އަބުރަށް އަރައިގަތުން ކަމަށްވެސް ތަރުޖަމާނު ބުންޏެވެ.

މީގެ އިތުރުން، އިންފަންޓީނޯގެ އަމަލުތަކާ ގުޅޭގޮތުން ޔޫއެފްއާ ނުވަތަ ފީފާގެ އެއްވެސް މުވައްޒަފަކު މިހާތަނަށް ޝަކުވާއެއް ހުށަހަޅާފައި ނުވާ ކަމަށާއި، އެފަދަ އެއްވެސް ހާދިސާއެއް ހިނގާފައި ނުވާ ކަމަށްވެސް ފީފާއިން ބުނެފައިވެ އެވެ.

ޔޫއެފްއާއިން ކަށަވަރުކޮށްދިން ގޮތުގައި އެ އަންހެން މީހާއަށް ފައިސާ ދީފައިވަނީ، އެ ސަރަހައްދުގެ ބިޒްނަސް ސްކޫލަކުން އެމްބީއޭ ކޯހެއް ފުރިހަމަކުރުމަށް ބޭނުންވާ ފީ ދެއްކުމަށެވެ.

އެ އިދާރާއިން ބުނީ އެ ދުވަސްވަރު ހުރިހާ ފައިސާއެއް ދޫކޮށްފައިވަނީ އޭރު އަމަލުކުރަމުންދިޔަ ގަވާއިދުތަކާ އެއްގޮތަށް ކަމަށެވެ. ނަމަވެސް، މިހާރު އެ ގަވާއިދުތައް އިތުރަށް ހަރުދަނާކޮށް، ބައިނަލްއަގުވާމީ ބޮޑެތި ޖަމިއްޔާތަކުގައި އަމަލުކުރާ ފަދަ ޒަމާނީ މިންގަނޑުތަކަށް ބަދަލުކޮށްފައިވާ ކަމަށްވެސް ޔޫއެފްއާއިން ބުންޏެވެ.

ވޯލްޑް ކަޕްގެ އަމިއްލަ އިންވެސްޓްމަންޓް ޕްލޭނާ ގުޅިގެން އިންފަންޓީނޯ މަގާމުން އިސްތިއުފާ ދެއްވުމަށް ގޮވާލަމުންދާ ދަނޑިވަޅެއްގައި، އަލަށް ފެންމަތިވި މި ތުހުމަތުތަކުގެ ސަބަބުން އޭނާއަށް ވަނީ އިތުރު ޕްރެޝަރުތަކެއް ކުރިމަތިވެފަ އެވެ.

އުމުރުން 56 އަހަރުގެ އިންފަންޓީނޯ ވަނީ އޭނާ ހުށަހެޅި މައްސަލަ ބޮޑު ޕްލޭންގައި ހުރި "ގޯސްތަކަށް" މާފަށް އެދިވަޑައިގެންފަ އެވެ. ނަމަވެސް، މިދިޔަ ބުދަ ދުވަހު މޮރޮކޯގައި ބޭއްވި ބައްދަލުވުމެއްގައި އިސް އެގްޒެކެޓިވުންގެ ތާއީދު ލިބުމާއެކު، އޭނާ މަގާމުން އިސްތިއުފާ ދެއްވަން ދެކޮޅު ހެއްދެވި އެވެ.

އިންފަންޓީނޯ ޔޫއެފްއާއާ ގުޅުނީ 2000 ވަނަ އަހަރުއެވެ. އަދި 2009 ވަނަ އަހަރު އެ އިދާރާގެ ޖެނެރަލް ސެކްރެޓަރީގެ މަގާމަށް އައްޔަންކުރެވުނުއިރު، ފީފާގެ ރައީސްކަމާ އޭނާ ހަވާލުވެވަޑައިގަތީ 2016 ވަނަ އަހަރު އެވެ.

އިންވެސްޓްމަންޓް ޕްލޭންތައް މިހާރު ހުއްޓާލާފައިވީ ނަމަވެސް، ޔޫރަޕްގެ ޓީމުތަކުން ދަނީ ފީފާގެ މުބާރާތްތައް ބޮއިކޮޓް ކުރާނެ ކަމުގެ އިންޒާރު ދެމުންނެވެ.

އެހެންނަމަވެސް، ދެކުނު އެމެރިކާގެ ފުޓްބޯޅަ ފެޑަރޭޝަން (ކޮންމެބޯލް) އާއި އެފްރިކާގެ ފުޓްބޯޅަ ފެޑަރޭޝަން (ކާފް) ގެ އިތުރުން، މެކްސިކޯ އަދި އެންމެ ފަހުގެ ރަނަރަޕް އާޖެންޓީނާގެ ފުޓްބޯޅަ އެސޯސިއޭޝަނުން ވަނީ އިންފަންޓީނޯއަށް ތާއީދުކޮށްފަ އެވެ.