ޔުއެފާ، ކޮންކާކަފް އަދި އޭއެފްސީގެ ސިޓީއެއް: އިންފަންޓީނޯ އަށް އޮތް އިތުބާރު ގެއްލުނީ ހީލަތްތެރިކަމުގެ ސަބަބުން!
10 އޯގަސްޓު 2026 | ހޯމަ 12:20ސިޓީގައި ބުނެފައި ވަނީ އިތުބާރު ގެއްލިފައި ވަނީ ހީލަތްތެރި ކަމުންނާއި އިސްވެރިޔަކަށް ހުރި ފަރާތަށް އޭނާގެ ބާރުތަކުގެ މަތިން ހަނދާން ނެތުމުން ކަމަށް. އަދި އޭނާ އަށް އެ ބާރުތައް ދިން މީހުންނަށް ވުރެ މަތީގައި ހުންނަން ބޭނުންވުމުން ކަމަށް ވެސް ބުނެފައިވޭ. މި ބަޔާނުގައި އިންފަންޓީނޯގެ ނަން ނުހިމެނި ނަމަވެސް، މިއީ އިސްތިއުފާ ދެއްވުމަށް ފަހު ޝަރަފުވެރިކަމާ އެކު ވަޑައިގެންނެވުމުގެ ފުރުސަތެއް ކަމަށް ވެސް ބުނެފައިވޭ
ނިއުޔޯކް ނިއު ޖާޒީ ސްޓޭޑިއަމްގައި 2026 ޖުލައި މަހުގެ 19 ވަނަ ދުވަހު ސްޕެއިން އާއި އާޖެންޓީނާ ބައްދަލުކުރި 2026 ވަނަ އަހަރުގެ ފީފާ ވޯލްޑް ކަޕް ފައިނަލް މެޗުގެ ތެރެއިން، ފީފާގެ ރައީސް ޖިއާނީ އިންފަންޓީނޯ | ގެޓީ އިމޭޖަސް
ފީފާގެ ރައީސް ޖިއާނީ އިންފަންޓީނޯ އާއި އެ އިދާރާ އަށް އޮތް އިތުބާރު ގެއްލިފައި ވަނީ ހީލަތްތެރިކަމުގެ ސަބަބުން ކަމަށް ޔުއެފާ އާއި ކޮންކާކަފް އަދި އޭޝިއަން ފުޓުބޯޅަ ކޮންފެޑެރޭޝަން (އޭއެފްސީ) އިން ބުނެފި އެވެ.
މި ކޮންފެޑެރޭޝަންތަކުގެ ރައީސުންނާއި ޖެނެރަލް ސެކްރެޓަރީ އިން ސޮއި ކުުރައްވާފައިވާ މި ސީޓުގައި ބުނެފައި ވަނީ، ފީފާ ފޯވާޑް އެންޓަޕްރައިޒް ހުށަހެޅުމާ ގުޅިގެން މިހާރު ހިނގަމުން އަންނަ ދެކޮޅުވެރިކަން ވަނީ، ކުޅިވަރުގެ ހަމަޔާއި، އެ ކުޅިވަރު ކުރިއަށް ގެންދަން އިންތިޚާބު ކުރެވިފައިވާ ފަރާތްތަކުގެ ހަމަޔާ ގުޅިފައި ކަމަށެވެ.
ފީފާ ފޯވަޑް އެންޓަޕްރައިޒް ހުށަހެޅުމުގައި ހިމެނިފައި ވަނީ ފީފާގެ ހުރިހާ މުބާރާތްތަކުގެ ވިޔަފާރީގެ ހައްގުތަކާއި ޓިކެޓު ވިއްކުމުގެ ހައްގުތައް ބެލެހެއްޓުމަށް އައު ކުންފުންޏެއް އުފެއްދުމެވެ. މި ކުންފުނީގެ 20 އިންސައްތަ ހިއްސާ އަމިއްލަ އިންވެސްޓްމަންޓް ކުންފުންޏަކަށް ވިއްކުމަށް ވަނީ ހަމަޖެހިފައި އެވެ. ނަމަވެސް މި ހުށަހެޅުމަށް ގިނަ ކޮންފެޑެރޭޝަންތަކުން ފާޑު ކިޔުމުގެ ސަބަބުން މި ހުށަހެޅުން ވަނީ ބާތިލު ކޮށްފައި އެވެ.
މި ސިޓީގައި ބުނެފައި ވަނީ އިތުބާރު ގެއްލިފައި ވަނީ ހީލަތްތެރިކަމުންނާއި އިސްވެރިޔަކަށް ހުންނެވި ފަރާތަށް އޭނާގެ ބާރުތަކުގެ މަތިން ހަނދާން ނެތުމުން ކަމަށެވެ. އަދި އޭނާ އަށް އެ ބާރުތައް ދިން މީހުންނަށް ވުރެ މަތީގައި ހުންނަން ބޭނުންވުމުން ކަމަށް ވެސް ބުނެފައިވެ އެވެ. މި ބަޔާނުގައި އިންފަންޓީނޯގެ ނަން ނުހިމެނި ނަމަވެސް، މިއީ އިސްތިއުފާ ދެއްވުމަށް ފަހު ޝަރަފުވެރިކަމާ އެކު ވަޑައިގެންނެވުމުގެ ފުރުސަތެއް ކަމަށް ވެސް ބުނެފައިވެ އެވެ.
މި ތިން ކޮންފެޑެރޭޝަން އިން މިފަދަ ސިޓީއެއް އާންމު ކޮށްފައިވާއިރު، ދާދި ފަހުން ފީފާ އިން ވަނީ އިންފަންޓީނޯގެ ދިފާއުގައި ވަރުގަދަ ބަޔާނެއް ނެރެފައި އެވެ. އަދި އިންފަންޓީނޯ މަޤާމުން ދުރުކުރުމުގެ މަސައްކަތް ކުރަމުން އަންނަ ފަރާތްތަކަށް ވަނީ އިންޒާރެއް ވެސް ދީފައި އެވެ.
މި މައްސަލައިގައި ގިނަ ބައެއްގެ ނުރުހުން އިންފަންޓީނޯ އަށް އަމާޒުވެފައި އޮތްއިރު، ޔުއެފާ އިން ވަނީ ވޯލްޑް ކަޕް ބޮއިކޮޓް ކުރާނެ ކަމުގެ އިންޒާރު ދީފައި އެވެ. އަދި ފީފާ އިން އެ ހުށަހެޅުން އަނބުރާ ގެންދިޔަ ނަމަވެސް، ޔުއެފާ އިން އޮތީ ވޯލްޑް ކަޕް ބޮއިކޮޓް ކުރުމުގެ ވިސްނުމުގައި އެވެ.
