މި ސަރުކާރުން ލޯނެއް ނުނަގާނެ، ނަގާނީ ޑޮލަރު!

ރައީސް ޑރ. މުހައްމަދު މުއިއްޒު އަބަދުމެ ވިދާޅުވާ ވާހަކަފުޅެއް އޮވެ އެވެ. އެއީ މި ސަރުކާރުން ލޯނު ނުނަގާނެ ވާހަކަ އެވެ. ޤައުމާ މުޚާތަބު ކުރައްވައި ވާހަކަފުޅު ދެއްކެވި ނަމަވެސް، ޖަލްސާއެއްގައި ތަޤުރީރު ކުރެއްވި ނަމަވެސް، ނޫސްވެރިންގެ ބައްދަލުވުމެއް ބޭއްވެވި ނަމަވެސް، ކެމްޕެއިން ޖަލްސާއެއް ބޭއްވެވި ނަމަވެސް ނުވަތަ ރައްޔިތަކާ ބައްދަލުވި ނަމަވެސް އެ ވާހަކަފުޅު ވިދާޅުވާނެ އެވެ. މިއީ ސަރުކާރުން އަދި ރައީސް ވެސް އެންމެ ގިނައިން ދައްކަވާ އެއް ވާހަކަފުޅެވެ.

މި ދޭތެރެއިން ޚަބަރެއްގެ ސުރުޚީގައި އޮއްވާ ދުށީމެވެ. އޭޝިއަން ޑިވެލޮޕްމަންޓް ބޭންކް (އޭޑީބީ) އިން 50 މިލިއަން އެމެރިކާާ ޑޮލަރުގެ ލޯނެއް ދިވެހި ސަރުކާރަށް ދިން ވާހަކަ އެވެ. އެއީ ހަމަ ހަގީގަތުގައި ވެސް ތެދެއްބާއޭ ހިތަށް އެރި އެވެ. އެކަން ޔަޤީން ކުރުމަށް ފިނޭންސް މިނިސްޓްރީގެ ސޯޝަލް މީޑިއާ ހާވާލީމެވެ. އޭގައި ވެސް އެ ވާހަކަ ޖަހާފައި އޮއްވާ ފެނުމުން، އަދިވެސް ޔަޤީން ކުރުމަށް ދެލޯ ރަނގަޅަށް އުނގުޅާލުމަށް ފަހު ބަލާލީމެވެ. ހަމަ ތެދެކެވެ. އޭޑީބީ އާއެކު ދިވެހި ސަރުކާރުން އެ ސޮއި ކުރީ 50 މިލިއަން އެމެރިކާ ޑޮލަރުގެ ލޯނު އެއްބަސްވުމެއްގައި އެވެ. 

އަހަރެން ހިތަށް އެރި އެވެ. ނޫނެވެ. ސަރުކާރުން ލޯނެއް ނުނަގާނެ އެވެ. އަދި އަމުދުން ރައީސް މުއިއްޒު އެހާ ހަރުކޮށް، އެހާ ގިނައިން އެ ވާހަކަފުޅު ވިދާޅުވެފައި އޮއްވައި، ދިވެހި ސަރުކާރުން ލޯނެއް ނުނަގާނެ އެވެ. ރައްޔިތުން ދަރުވާލާނެ ކަމެއް މި ސަރުކާރުން ނުކުރާނެ އެވެ. އެއަށް ވުރެ ރައްޔިތުން ދެކެ ލޯބިވާނެ އެވެ. ފަހަރުގައި، ފިނޭންސް މިނިސްޓަރު ހަސަން ޒަރީރު، ރައީސް މުއިއްޒު އަށް އެެނގުމެއް ނެތި ނެންގެވި ލޯނަކަށް ވެދާނެ ހެއްޔެވެ؟ އާނއެކެވެ. ވާނީ އެހެންނެެވެ. ރަނގަޅަށް މިކަން ބަލާއިރު ފިނޭންސް މިނިސްޓަރު އޮންނާނީ ރައީސް އަށް އޮޅުވާލައްވައިފަ އެވެ. 

އެ ޚިޔާލުގައި އިންދާ މީހަކު ބުންޏެވެ. ތިޔަ ބަލަނީ ކޯއްޗެއް ހެއްޔެވެ؟ ސިއްސައިގެން އަހަރެން ދައްކާލީ ފޯނުން ބަލަން އިން ޕޯސްޓެވެ. ފިނޭންސް މިނިސްޓްރީ އިން ސޯޝަލް މީޑިއާގައި ޖަހާފައިވާ ޕޯސްޓެވެ. އޭޑީބީ އާއެކު 50 މިލިއަން އެމެރިކާ ޑޮލަރުގެ އެއްބަސްވުމެއްގައި ސޮއި ކުރި ވާހަކަ އެވެ. އެ ދައްކާލާފައި އަހަރެން ބުނީމެވެ. މި ސަރުކާރުން ލޯނު ނުނަގާނެ ކަމަށް ރައީސް އެތައް ފަހަރަކު ވިދާޅުވެފައިވާއިރު، ފިނޭންސް މިނިސްޓަރު މިވަރުގެ ކަމެއް ކުރައްވަން ހެޔޮވާނެ ހެއްޔެވެ؟ ލޯނު ނަގަން ވާނެ ހެއްޔެވެ؟ މިއީ ރައްޔިތުންގެ ކުރިމަތީގައި ރައީސްގެ އަގު ވައްޓާލަން ކުރި ކަމެކެވެ. ނޫނީ މިއީ، ލޯނު ބަޣާވާތަކަށް ވާނެ އެވެ.

އޭނާ ބުންޏެވެ. މި ސަރުކާރުން ލޯނެއް ނުނަގާނެ އެވެ. އަހަރެން ބުނީމެވެ. އެހެން ހެއްޔެވެ؟ ދެން މީގައި މި ބުނަނީ ކޮން 50 މިލިއަން ޑޮލަރުގެ ވާހަކައެއް ހެއްޔެވެ؟ އަނެއްކާ ވެސް އޭނާ ބުނީ، މި ސަރުކާރުން ލޯނު ނުނަގާނެ ވާހަކަ އެވެ. ދެން ބުނީ އެއީ ލޯނެއް ނޫން ކަމަށެވެ. ނެގީ ލޯނެއް ނޫން ކަމަށެވެ. މި ސަރުކާރުން ނެގީ ޑޮލަރެވެ. އެއީ 50 މިލިއަން ޑޮލަރުގެ ލޯނު އެއްބަސްވުމެއް ނޫނެވެ. އެއީ 50 މިލިއަން ޑޮލަރުގެ، ޑޮލަރު ނެގުމުގެ އެއްބަސްވުމެކެވެ. އެހެންވީމާ، އެއީ ލޯނެއް ނޫންތާ އެވެ!

އާނއެކެވެ. އެއީ ލޯނެއް ނޫނެވެ. އެއީ ހަމަ ޑޮލަރެވެ. ސަރުކާރުން އެ ނެގީ ޑޮލަރެވެ.