ސާޖިދާއަށް އައިމިނަ؟!، މުހައްމަދަށް އަހައްމަދު؟!

ހަނދާނަށް އަންނަނީ އަހަރެމެން ނޫސްވެރިކަމަށް ފަށައިގެން ދުވަސްވަރުގެ މަތިންނެވެ. އޭރުގެ ކަންކަން ހުރިގޮތް ހިތަށް އައީމާ، ބޭއިޚުތިޔާރުގައި ފާޑަކަށް ހިނިވެސް އާދެ އެވެ. އޭރުގެ ހާލަތުންނެވެ. އެކަން އޮތް ގޮތުންނެވެ.

އޭރު ހިނގި އެއްކަމެއް އިއްޔެ ހިނގި ކަމެއްހެން ހަނދާނުގައި އަބަދުވެސް ހުރެ އެވެ. މަޝްހޫރު ސެޕްޓެމްބަރު 19 އެވެ. ޖަލުގައި އަނިޔާކޮށް މަރާލި އީވާން ނަސީމުގެ މަރަށް ފަހު ހިނގާދިޔަ ކަންކަމެވެ. މާލޭގެ މަގުތަކަށް މީހުން އެއްވެ ހިންގި ކަންކަމާއި ޖަލުގައި ބަޑިޖެހުމުގެ ހާދިސާ އެވެ.

ފަހަރެއްގައި ވެސް މިއުޅެނީ އެ ހާދިސާ ނަގަނަގައިގެން އައުކުރާކަށް ނޫނެވެ. އެކަމާ ގުޅިގެން ހިނގި އެހެންކަމެއްގެ ވާހަކަ ދައްކާށެވެ.

އޭރު އުޅުނު ނޫހަށް އެ ރޭ ވަޑައިގެންނެވީ ރައީސުލްޖުމްހޫރިއްޔާގެ އޮފީހުގައި އުޅުއްވާ ބޭފުޅެކެވެ. އާއްމުކޮށް ވަޑައިގަންނަވާ ބޭފުޅެކެވެ. ނޫހުގެ ބޭރުގަނޑުގައި ޖަހަން ޖެހޭ ޚަބަރާއި ތިން ކޮލަމަށް ދަމާލާފައި ޖަހަންޖެހޭ ފޮޓޯފުޅު ރީ-ރައިޓަބްލް ސީޑީއެއްގައި އަބަދުވެސް ގެންނަވާ ބޭފުޅާ އެވެ.

ގެންނެވީ ސިޓީ އުރައެކެވެ. އޭގައި އޮތީ އެންގެވުމެކެވެ. ވަރަށް ކުރު އެހާމެ ސާދާ، އެކަމަކު ބާރުހުރި އިންޒާރެކެވެ.

ޖުމްލަކޮށް އެ އިންޒާރުގައި ބުނެފައިވަނީ "މިއަދު ހިނގާ ދިޔަ ކަންކަމާއި އެ ހާދިސާއާ ގުޅިގެން ހިނގާ ކަންކަމުގެ ވާހަކަ ލިޔާނީ ރައީސް އޮފީހުން އެންގެވި ގޮތަކަށް އަންގަވާ އެއްޗެއް" ކަމަށެވެ.

މިއީ އޭރުގެ ހާލަތެވެ. ނޫސްތަކުގައި ލިޔެވޭނެ އެއްޗިއްސާ ކަވަރ ކުރެވޭނެ މިންވަރު ނިންމާނީ އެޑިޓޯރިއަލް ބޯޑަކުން ނޫނެވެ. ނޫންނަމަ ޚަބަރު ލިޔާ ނޫސްވެރިޔާގެ ލޮލަށް ފެނުނަސް އަދި އެ ޚަބަރެއް ނުލިޔެވޭނެ އެވެ.

މިކަން އެންމެ ރަނގަޅަށް އެނގިވަޑައިގަންނަވާނެ އެއްބޭފުޅާ އިއްތިފާގުން މިއަދު އެހުންނެވީ ރައީސުލްޖުމްހޫރިއްޔާގެ އޮފީހުގެ ޗީފް ގަވަމަންޓް ސްޕޯކްސްޕާސަން އަކަށެވެ. މުހައްމަދު ހުސައިން ޝަރީފް ( މުންދު) އެވެ. އެއަށްވުރެ މާބޮޑު އިއްތިފާގެއް ވެސް އެބައޮތެވެ. ޚަބަރާއި ފޮޓޯފުޅު ސީޑީއަކަށް އަޅުއްވައިގެން ނޫހަށް އޭރު ގެންނެވީ ވެސް މުންދު ކަމަށް ވުމެވެ. ކިހާ ބޮޑު އިއްތިފާގެއް ހެއްޔެވެ.

އެއީ އޭރު އޮތް ހާލަތެވެ. އެކަމަކު މަޑުމަޑުން ލަސްލަހުން، ކަމަކަށްފަހު ކަމަކުން ގޮސް ނޫސްވެރިން ތޮށިގަނޑު ފަޅާލައިފި އެވެ. ސަރުކާރުން ބާއްވާ ޕްރެސް ކޮންފަރެންސްތަކުގައި ސަރުކާރުން ދޭހާ ސުވާލެއް، ނޫންނަމަ ސަރުކާރުން އެދޭހާ ސުވާލެއް ނުކޮށް ނޫސްވެރިން ބޭނުންވާ ސުވާލު ވެސް ކުރަން ފެށުނެވެ. ކަންކަން ހޯދާން ފެށި އެވެ. ތަހުގީގީ ނޫސްވެރިކަން ވެސް ތައާރަފުވި އެވެ. ފެންނަ މަންޒަރާއި އިވޭ އަޑުގެ މައްޗަށް ހަގީގަތް ހާމަކުރަން ފެށި އެވެ. ސަރުކާރުގެ ވެރިންނާއި ވަޒީރު ބޭފުޅުންގެ ވާހަކަތަކުގެ އިތުރުން އެހެން މީހުން ބުނާ ވާހަކަތަކާއި އިންޓަރވިއުތައް ޝާއިއު ކުރާން ފެށުނެވެ. ޚަބަރާ ރިޕޯޓާ ގުޅޭ ފޮޓޯތައް ވެސް ޖަހަން ފެށުނެވެ.

ނޫސްވެރިން ތޮށިގަނޑު ފަޅާލާފައި ނުކުމެވުނީ އެހެން ބަޔަކު ވެސް ކަށިން ހިތްވަރު ނެރުނީތީ އެވެ. އާއްމު ރައްޔިތު މީހާ އެވެ. ސިޔާސީ ވާހަކަ ދައްކަން ނުވަތަ ސަރުކާރާ އިދިކީލި ޚަބަރުތައް ކިޔަން ނޫންނަމަ އަހަން ބިރު ގަންނަ ރައްޔިތު މީހާގެ ބިރު ވެސް ފަހަނައަޅާ ދިޔައީތީ އެވެ. އެތައް އުނދަގުލެއް ހުރަސްކޮށް ސިއްރު ސިއްރުން "ދިވެހި އޮބްޒަރވަރ" ބަލަން ފެށީތީ އެވެ. އެކަން ނުހުއްޓުވި ސަރުކާރާއި ސަރުކާރު އަޑީގައި އޮވެގެން ނެރެންފެށި "ފެކްޓް މޯލްޑިވްސް" އާއި "ދަ މޯލްޑިވްސް" ވެސް ވައިގާ ހިފީތީ އެވެ. "މިނިވަން ނޫހާއި"، "އަށްޑުވަސް މައްޖަލާ" ގައި ޖަހަންފެށި ކަހަލަ އާޓިކަލްތަކުގެ ރައްދު، ހަމަ އެގޮތައް ސަރުކާރު ހިންގާ ޑީއާރުޕީން ނެރެމުންދިޔަ "ހަމަރޯޅި" ގައި ވެސް ޖަހަން ފެށުމުންނެވެ. 

އިސާހިތަކު ނޫސްވެރިކަމުގެ މިނިވަންކަން ލިބުނެވެ. ޚިޔާލު ފާޅުކުރުމުގެ މިނިވަންކަމުގެ ބޭނުން ހިފާން ފެށި އެވެ. ގޭތެރޭގެ ހަތަރު ފާރު އެތެރޭގައާއި ރާއްޖެއިން ބޭރުގައި ތިބެގެން ސިއްރު ސިއްރުން ދައްކަމުންދިޔަ ވާހަކަތައް ހާމަ ތަންތާ ތިބެގެން ވެސް ދައްކާން ފެށީ އެވެ. ބޮޑެތި ޖަލްސާތަކުގެ ޕޯޑިއަމްތަކުގައި އަޑުގެ ކޮޅަށް ގޮވާން ފެށި އެވެ.

ކައްގަލަށް ދިގު ކުރަން ހާސަރުތަކެއް ނުދަމާ ސީދާ ޕޮއިންޓަށް ޖެހިލާނަމެވެ. ހަމަ ސީދާ ޕޮއިންޓުގަ އެވެ. ބޭރުބޭރުން ނޫޅެ ފަހުމް ވާ ވަރަށް ތިލަކޮށެވެ. ސީދާ ވަލިއްޔުލް އަމުރާ ގުޅުވާލާފަ އެވެ. މި ބުނާ މިނިވަންކަން ލިބިދިން އައު ގާނޫން އަސާސީގެ ދަށުން މިހާރު ވެރިކަން ކުރައްވަން ހުންނެވި ރައީސް ޑރ. މުހައްމަދު މުއިއްޒު އަށް މުޚާތަބު ކޮށެވެ. ނަސޭހަތަކަށް ބެލިއަސް ނޫންނަމަ އިންޒާރެކޭ ހިތިއަސް ފަރުވާލެއް ނެތި އެވެ.

ރައީސް މުއިއްޒު އެވެ. މިއީ އެ ޒަމާނެއް ނޫނެވެ. ހެދޭ ޤާނޫނަކުން، ނެރެވޭ "ގެގް އޯޑަރަކުން" އަނގަ ބަންދުކުރެވޭނޭ ޒަމާނެއް ނޫނެވެ. ކަންއޮތްގޮތް، ކަން ހިނގާ ގޮތް ހާމަކުރިއަނުދީ މިއަދަކު އޮތްބެއް ނޭޅުވޭނެ އެވެ. އަދި އާއްމު ކުރާން ބޭނުން ނުވިއަސް އެތެރެ ކޮއިލުގެ ވާހަކަތަކެއް ވެސް މިއަދަކު ސިއްރެއް ނުވާނެ އެވެ. ހިފަހައްޓައިގެނެއް ވެސް ނުތިބެވޭނެމެ އެވެ. ނޫސްވެރިން ލައްވާ ބޭނުންހާ އެއްޗެއް ވެސް ނުލިޔުއްވޭނެ އެވެ. އެ ވެރިން ލައްވާ ރޭގަނޑަށް ދުވާލެކޭ ނުބުނުއްވޭނެ އެވެ. ހާމަޔަށް ފެންނަގޮތައް އެއްޗެއްގެ އަގު 23 ރުފިޔާއަށް ހުއްޓާ އޭގެ އަގަކީ 15 ރުފިޔާއެކޭ އަމުދަކުން ނުބުނެވޭނެ އެވެ. ކިތަންމެ ޤާނޫނެއް ހެދިއަސް، ކިތަންމެ ހިކި އަމުރެއް ކުރިއަސް، އަދި އަދަބަކަށް އުލުބައިންދާ ދަށުން އެންދިއަސް އެކަމެއް މިހާރަކު އެހެނެއް ނުހިނގާނެ އެވެ. އެކަން އެންމެ ރަނގަޅަށް އެނގޭނެ އެއްބޭފުޅަކީ ތަރުޖަމާން މުންދުއެވެ. ހަމަ އެބީދައިން "ސާޖިދާ އަކަށް އައިމިނައެކޭ" "މުހައްމަދަކަށް އަހައްމަދެކޭ" ނުބުނެވޭނެ އެވެ. ސާޖިދާ ވާނީ ސާޖިދާ އަށެވެ. މުހައްމަދު ވާނީ ހަމަ މުހައްމަދަށެވެ. ވަރަށް ސަލާމެވެ.