މިނިވަން ދުވަހު ނަފުރަތާއި ރުޅިއެރުވުން، ޤައުމީ ދުވަހު އެއްބައިވަންތަކަމާއި އެކުވެރިކަން!
18 އޯގަސްޓު 2026 | އަންގާރަ 05:47ހަދަންވީ ކިހިނެއް ހެއްޔެވެ؟ މިނިވަން ދުވަހުގެ ޖަލްސާގައި ފެތުރެއްވީ ނަފުރަތާއި، ހަސަދަ އެވެ. ޤައުމީ ދުވަހުގެ ޖަލްސާގައި އެ ދެއްކެވީ އެކުވެރިކަމާއި އެއްބައިވަންތަކަން އިސްކުރުމުގެ ވާހަކަ އެވެ. ގޮވާލެއްވީ ދެ ކަމަކަށެވެ
ޤައުމީ ދުވަހުގެ ޖަލްސާގައި ރައީސް ޑރ.މުހައްމަދު މުއިއްޒު ވާހަކަފުޅު ދައްކަވަނީ | ރައީސް އޮފީސް
ޤައުމުގެ ރައީސް ދައްކަވާ ވާހަކަފުޅުތަކަކީ ވަރަށް މުހިންމު އަދި އެހާމެ ބޭނުންތެރި ވާހަކަފުޅު ތަކަކަށް ވާން ޖެހޭނެ އެވެ. ޤައުމުގެ ރައްޔިތުންނަށް މިސާލު ދައްކަވަން ހުންނަވާ އެންމެ އިސް ބޭފުޅަކީ ރައީސް އެވެ. ޤައުމުގެ ރައްޔިތުންނަށް ހެޔޮ ނަސޭހަތް ދެއްވައި، ރައްޔިތުންގެ މެދުގައި އެކުވެރިކަމާއި، އެއްބައިވަންތަކަން އާލާ ކުރުމުގެ އެންމެ ބޮޑު ޒިންމާއެއް އަދާކުރައްވާނީ ވެސް ރައީސް އެވެ. ރައީސްގެ ކުރިފުޅުމަތީގައި ޤައުމުގެ ހުރިހާ ރައްޔިތުން ވާާންވާާނީ ހަމަހަމަ އެވެ. ވަކި ކުލަ އަކަށް ވެގެން، ވަކި ފިކުރަކަށް ވަކި ގޮތެއް އަމުދުން އޮވެގެން ނުވާނެ އެވެ.
ޤައުމީ ދުވަސް ފާހަގަ ކުރުމަށް ހއ.އުތީމުގައި ބޭއްވި ޖަލްސާގައި ރައީސް ޑރ. މުހައްމަދު މުއިއްޒު ދެއްކެވި ވާހަކަަފުޅުގައި ގޮވާލެއްވީ، އެކުވެރިކަމާއި އެއްބައިވަންތަކަން އިސް ކުރުމަށެވެ. ޤައުމީ ކަންކަމުގައި އެކުވެރިކަން އިސް ކުރުމުގެ މުހިންމު ކަމުގެ ވާހަކަ އެވެ. އަޅުގަނޑު ހިތަށް އެރި އެވެ. މިދިޔަ ޖުލައި މަހުގެ 26 ވަނަ ދުވަހު މިނިވަސް ދުވަސް ފާހަގަ ކުރުމަަށް ބޭއްވި ޖަލްސާގައި ރައީސް އެ ދެއްކެވީ ދެން ކޮން ވާހަކަފުޅެއްތޯ އެވެ؟
މިނިވަން ދުވަހު ރައީސްގެ ތަޤުރީރުގައި ވަނީ ހައްތަހާ ވެސް، ނަފުރަތާއި ރުޅިވެރިކަމެވެ. މިނިވަން ދުވަހުގެ ތަޤުރީރު ރައީސް ހޭދަކުރެއްވީ، އިދިކޮޅު ޕާޓީ އަށް އެއްޗެތި ވިދާޅުވުމުގަ އެވެ. ގަދަ އަޑުފުޅުން ނުހަނު ކޯފާވެ ހުންނަވައިގެންނެވެ. އިދިކޮޅު ޕާޓީތަކުން ވެރިކަން ކޮށްފައިވާ ގޮތާއި، އިދިކޮޅު ފަރާތްތަކަށް ރައީސްގެ ހިތްޕުޅުގައި އޮތް ހަސަދަ އާއި ނަފްރަތު ދައްކުވައިދެއްވީ މިނިވަން ދުވަހުގެ ތަޤުރީރުގައި އެވެ. އިދިކޮޅު ޕާޓީ އަކީ ލާދީނީ ބައެއް ކަމަށާއި، އިދިކޮޅު ޕާޓީ އަކީ އިސްލާމްދީނާ ދެކޮޅު ބައެއް ކަމަަށް ރައީސްގެ ތަޤުރީރުގައި ވިދާޅުވީ ވެސް، މިނިވަން ދުވަހު އެވެ.
އެ ދުވަހުގެ މުޅި ތަޤުރީރު ބިނާވެފައި އޮތީ މިހެންނެވެ. އެ ތަޤުރީރަށް ފަހު މުޅި ޤައުމުގައި ދެއްކީ ވެސް އެ ވާހަކަ އެވެ. މުޅި ޤައުމުގަައި ވެސް ފެތުރުނީ ނަފުރަތެވެ. ހަސަދަ އެވެ. މުޅި ޤައުމުގައި އޮތީ ބައިބައިވުން އުފެދިފައި އެވެ. ސަބަބަކީ ރައީސްގެ ތަޤުރީރެވެ. ރައީސް ދެއްކެވި ވާހަކަފުޅަކުންނެވެ. ރައީސްގެ މިނިވަން ދުވަހުގެ ތަޤުރީރުގެ ސަބަބުން އެތައް ބަޔަކު ހިތާމަ ކުރި އެވެ. އެތައް ބަޔަކު ބުނަމުން ގެންދިޔައީ، ރައީސްގެ ފަރާތްޕުޅުން ފެނުނީ، ރައީސުލްޖުމްްހޫރިއްޔާގެ މަގާމަށް ހުތުރު މަންޒަރެއް ކަމަށެވެ.
ނަމަވެސް އޭގެ މަސް ދުވަސް ނުވަނީސް، އޮގަސްޓު މަހުގެ 15 ވަނަ ދުވަހު ބޭއްވި ޖަލްސާގައި ރައީސް އެ ގޮވާލެއްވީ އެކުވެރިވުމަށެވެ. އެކުވެރިކަމާއި، އެއްބައިވަންތަކަން އިސް ކުރުމަށެވެ. ޤައުމީ ޖޯޝުގައި ހުންނަވައި ރައީސް އެ ވިދާޅުވީ، ހުރިހާ ދިވެހި ރައްޔިތުން އެއްބައިވަންތަކަން އިސްކުރުމަށެވެ. އެއް މަސް ދުވަހުގެ ތެރޭގައި ރައީސް ދެއްކެވި ދެ ވާހަކަފުޅަކުން، ރައީސްގެ ވާހަކަފުޅު ބަދަލުވެފައިވާ ވަރު ފެނި އަޖައިބު ނުވަނީ ކާކު ހެއްޔެވެ؟ ބައިބައިވާނެ އެންމެހައި ކަންކަމުން ދުރުވުމަށް ރައީސް އިލްތިމާސް ކުރެއްވިއިރު، ތަޤުރީރު ތަކުގައި ނަފުރަތު އުފެދޭނެހެން ވާހަކަފުޅު ދައްކަވައިގެން، ރައީސް އަށް ވުރެ ބޮޑަށް ބައިބައިވުން އުފައްދަވާ ބޭފުޅަކު އެބަ ހުންނެވި ހެއްޔެވެ؟
ހަދަންވީ ކިހިނެއް ހެއްޔެވެ؟ މިނިވަން ދުވަހުގެ ޖަލްސާގައި ފެތުރެއްވީ ނަފުރަތާއި، ހަސަދަ އެވެ. ޤައުމީ ދުވަހުގެ ޖަލްސާގައި އެ ދެއްކެވީ އެކުވެރިކަމާއި، އެއްބައިވަންތަކަން އިސްކުރުމުގެ ވާހަކަ އެވެ. ގޮވާލެއްވީ ދެ ފަހަރު، ދެ ކަމަކަށެވެ.
