ހައްޖު ކިއު އާންމުކޮށް ހާމަކުރެވޭނެ ގޮތެއް ހޯދުމަށް ހައްޖު ކޯޕަރޭޝަން މަޖިލީހަށް ހާޒިރުކުރަނީ
16 އޯގަސްޓު 2026 | އާދީއްތަ 08:16ހައްޖު ކިއު ތަރުތީބު އާންމުކޮށް ފެންނަން ނެތުމުން ކޯޓާ ދޫކުރުމުގެ ދެފުށް ފެންނަ ކަމާމެދު އާންމުންގެ ކަންބޮޑުވުންތަކެއް ހުރިކަން މެންބަރު މުހައްމަދު އިބްރާހީމް ފާހަގަކުރެއްވި. އެހެންކަމުން ކިއު ކުރިއަށްދާ ގޮތާއި، ނުފޫޒެއް ނެތި އިންސާފުން ކަންކަން ހިނގާކަން ކަށަވަރުކުރުމަށް ހައްޖު ކޯޕަރޭޝަންގެ އިސްވެރިން މަޖިލީހުގެ އެސްއޯއީ ކޮމިޓީއަށް ހާޒިރުކޮށްދިނުމަށް އޭނާ ވަނީ އެދިވަޑައިގެންފައި
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) | ރައްޔިތުންގެ މަޖިލިސް
މޯލްޑިވްސް ހައްޖު ކޯޕަރޭޝަނުން ބަލަހައްޓާ ހައްޖު ކިއު އާންމުކޮށް ހާމަކުރުމާ ގުޅޭގޮތުން އެ ކޯޕަރޭޝަންގެ އިސް ބޭފުޅުން ރައްޔިތުންގެ މަޖިލީހަށް ހާޒިރުކޮށް ދިނުމަށް، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެދިވަޑައިގެންފި އެވެ.
މަޖިލީހުގެ ރައީސް އަބްދުއްރަހީމް އަބްދުﷲ އަށް އެޑްރެސް ކުރައްވާ މެންބަރު ފޮނުއްވާފައިވާ ސިޓީއެއްގައި ވިދާޅުވީ މޯލްޑިވްސް ހައްޖު ކޯޕަރޭޝަނުން މިހާރު ބަލަހައްޓަމުންގެންދާ ހައްދު ކިއުއަކީ އާންމުންނަށް ފެންނަން އޮންނަ ކިއުއަކަށް ނުވުމުގެ ސަބަބުން، ހައްޖު ކޯޓާ ދޫކުރުމުގައި އިންސާފުވެރިކަމާއި ދެފުށް ފެންނަ ސިޔާސަތެއް އޮތްކަމާމެދު ރައްޔިތުންގެ މެދުގައި ބޮޑެތި ކަންބޮޑުވުންތަކެއް އުފެދިފައިވާ ކަމަށެވެ.
ހައްޖަށް ދިއުމަށް ފައިސާ ދައްކައި ރަޖިސްޓަރީ ކޮށްފައިވާ ފަރާތްތަކަށް ކިއުގައި އެމީހުން ތިބި ހިސާބު ބަލައިލެވޭނެ އެއްވެސް ނިޒާމެއް ނެތުމާއި، އެއްވެސް ނުފޫޒެއް ނެތި ކިއު ކުރިއަށްދާ ކަން ކަށަވަރު ނުކުރެވި، އިތުބާރު ގެއްލެމުންދާތީ މި މައްސަލައިގައި މޯލްޑިވްސް ހައްޖު ކޯޕަރޭޝަންގެ ކަމާއި ބެހޭ ބޭފުޅުން ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް ކޮމިޓީ އަށް ހާޒިރުކޮށްދެއްވުމަށް މެންބަރު އެދިވަޑައިގެންފައިވެ އެވެ.
މެންބަރުގެ ސިޓީގައި ވަނީ ސާފު ކުރަން ބޭނުންވާ 5 ކަމެއް ވެސް ހިމަނުއްވާފަ އެވެ.
އެގޮތުން ހައްޖަށް ދިއުމަށް ފައިސާ ދައްކައިގެން އަހަރުތަކެއް ވަންދެން މަޑުކޮށްގެން ތިބި ރައްޔިތުންނަށް، އެ މީހުން ކިއުގައި އޮތް ހިސާބު ސާފުކޮށް، ބަލައިލެވޭނެ ދެފުށް ފެންނަ ނިޒާމެއް މިއަދާ ހަމައަށް ގާއިމުކުރެވިފައި ނުވަނީ ކީއްވެ ތޯ މެންބަރު ވަނީ ސުވާލު ކުރައްވާފަ އެވެ. އަދި ކިއު ކުރިއަށް ދަނީ އެއްވެސް ނުފޫޒެއް އަދި ވަކި ފަރާތަކަށް ބުރަވުމެއް ނެތި އިންސާފުވެރިކަމާއެކު ކަން ރައްޔިތުންނަށް ކަށަވަރު ކޮށްދިނުމަށް ކޯޕަރޭޝަނުން އަޅާފައިވާ ހަރުދަނާ ފިޔަވަޅުތަކަކީ ކޮބައިތޯ އާއި ކިއު ފުންމާލުންފަދަ ކަންކަން ހުއްޓުވުމަށް އޮތް ޔަގީން ކަމަކީ ކޮބައިތޯ މެންބަރު ސުވާލު ކުރައްވާފައިވެ އެވެ.
އޭގެ އިތުރުން އިލްކެޝަންސް ކޮމިޝަނުން ވޯޓަރސް ލިސްޓު އާންމު ކުރާ އުސޫލުން ރައްޔިތުންގެ ޒާތީ މައުލޫމާތު ރައްކާތެރި ކުރުމާއެކު ހައްޖު ކިއު ލިސްޓު އާންމު ނުކުރެވެންވީ ކޮން ސަބަބަކާ ހުރެތޯ އާއި ރަޖިސްޓަރީ ކުރާ ތާރީޚާ ކިއުގެ ތަރުތީބު އެނގޭނެހެން އަދި ކިއު ކުރިއަށްދާ މިންވަރު ވަގުތުން ވަގުތަށް އަޕްޑޭޓްވާ ޕޯޓަލްއެއް އާންމުކޮށް ޝާއިއުކުރުމުގެ ވިސްނުމެއް ނުވަތަ ޕްލޭނެއް ކޯޕަރޭޝަންގެ އޮވޭތޯ ބެލުމާއެކު މިފަދަ ނިޒާމެއް ތައާރަފް ކުރެވޭނީ ކޮން ތާރީޚެއްގައިތޯ މެންބަރު ވަނީ އައްސަވާފަ އެވެ.
މެންބަރު ވިދާޅުވީ ކޮންމެ އަހަރަކު ހައްޖު ކޯޕަރޭޝަނަށް ލިބޭ ކޯޓާގެ ތެރެއިން އާންމު ކިއުއަށް ދޫކުރަނީ ކިހާ އިންސައްތައެއްތޯ އާއި ޚާއްސަ ކެޓަގަރީތަކަށް ކޯޓާ ދޫކުރުމުގައި ގެންގުޅޭ ހާމަކަންބޮޑު އުސޫލަކީ ކޮބައިތޯ ވެސް މެންބަރު ސުވާލު ކުރެއްވި އެވެ.
