ހުޅުމާލޭގެ މެކޭނިކަލް ޕާކިންގ ސިސްޓަމްތައް ބޭނުންނުކޮށް ލަސްވާތީ އެޗްޑީސީގެ އެމްޑީއަށް މެންބަރު ކުޑޫގެ ސުވާލުތަކެއް!
13 އޯގަސްޓު 2026 | ބުރާސްފަތި 06:19ހުޅުމާލޭގެ 8 ސަރަހައްދެއްގައި ގާއިމުކޮށްފައިވާ 10 މެކޭނިކަލް ޕާކިންގ ސިސްޓަމް ބޭނުންނުކޮށް 7 އަހަރުވުމުން ދައުލަތަށް ބޮޑު މާލީ ގެއްލުމެއް ލިބެމުންދާތީ، އެކަމުގެ ތަފްސީލު ހޯދުމަށް މަޖިލިސް މެންބަރު މުހައްމަދު އިބްރާހީމް އެޗްޑީސީގައި އެދިވަޑައިގެންފި. ޖުމުލަ 300 އުޅަނދުގެ ޖާގަ ހިމެނޭ މި ސިސްޓަމްތައް ބޭނުންނުކޮށް ހުރުމުން 83 މިލިއަން ރުފިޔާގެ އާމްދަނީއެއް އުނިވެފައިވާކަން ފާހަގަކުރައްވައި، މި ތަންތަން އަލުން އޮޕަރޭޝަނަށް ގެނައުމަށް ރާވާފައިވާ ގޮތުގެ މައުލޫމާތު ސާފުކޮށްދިނުމަށް އޭނާ ވަނީ އެދިވަޑައިގެންފައި
އެޗްޑީސީގެ މެނޭޖިން ޑިރެކްޓަރު ޒުހައިރު | ރާއްޖެ އެމްވީ
ހުޅުމާލޭ ފޭސް 1 ގެ އެކި ސަރަހައްދުތަކުގައި ގާއިމުކޮށްފައިވާ މެކޭނިކަލް ޕާކިންގ ސިސްޓަމްތައް ބޭނުންނުކޮށް ގިނަ ދުވަސްތަކެއް ވަމުންދާތީ އެކަމާ ގުޅޭ މައުލޫމާތު ސާފުކުރުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެޗްޑީސީގެ މެނޭޖިން ޑިރެކްޓަރު އަލީ ޒުހައިރަށް ސިޓީއެއް ފޮނުއްވައިފި އެވެ.
މެންބަރު ކުޑޫ ފާހަގަކުރައްވާފައިވާ ގޮތުގައި ހުޅުމާލޭގެ 8 ސަރަހައްދެއްގައި ހަދާފައިވާ 10 މެކޭނިކަލް ޕާކިންގ ސިސްޓަމް އެބަހުއްޓެވެ. އެ ތަންތަން އާންމުންނަށް ބޭނުން ކުރެވޭހެން ހުޅުވާނުލައި ހުންނަތާ މިހާރު 7 އަހަރަށްވުރެ ގިނަ ދުވަސް ވެފައިވާ ކަމަށް އޭނާ ފާހަގަކުރެއްވި އެވެ.
ޖުމުލަ 300 އުޅަނދު ޕާކު ކުރެވޭނެ ޖާގަ ހިމެނޭ މި ސިސްޓަމްތަކަކީ މިހާތަނަށް އާންމު ރައްޔިތަކަށް ވެސް އަދި ދައުލަތަށް ވެސް އެއްވެސް ފައިދާއެއް ނުލިބި ބޮޑު އިސްރާފުގެ ގޮތުގައި ފާހަގަކުރެވޭ ތަންތަން ކަމަށް މެންބަރު ކުޑޫ ވިދާޅުވި އެވެ.
2019 ވަނަ އަހަރުން ފެށިގެން މި 300 ޕާކިންގ ޖާގަ ދުވާލަކު އެންމެ 100 ރުފިޔާގެ މަގުން ކުއްޔަށް ދޫކުރިނަމަވެސް މިއަދާ ހަމައަށް ދައުލަތަށް އާމްދަނީގެ ގޮތުގައި 83 މިލިއަނަށްވުރެ ގިނަ ރުފިޔާ ލިބޭނެ ކަމަށް މެންބަރު ފާހަގަކުރެއްވި އެވެ. މި ސިސްޓަމްތަކުގެ ބޮޑުބައި އަދިވެސް ބަލާބެލުމަށް ފެންނަނީ ރަނގަޅަށް ކަމަށާއި، މީގެ ތެރެއިން އެއް ސިސްޓަމް ރޫޅާލުމަށްފަހު އޭގެ ބައިތައް މިހާރު ވަނީ އޯޝަން ފްރަންޓު ކުރިމަތީ ހުސް ބިމުގައި ބަހައްޓާފައި ކަމަށް އޭނާ ވިދާޅުވި އެވެ.
އެހެންކަމުން ހުޅުމާލެއަކީ އެޗްޑީސީގެ ބެލުމުގެ ދަށުގައި ހުރި ތަނަކަށްވާއިރު މިކަމާ ގުޅޭ ބައެއް މައުލޫމާތު ސާފުކުރައްވަން ބޭނުންވެވަޑައިގަންނަވާ ކަމަށް މެންބަރު ކުޑޫ ވިދާޅުވި އެވެ.
އޭނާ ސާފުކޮށްދިނުމަށް އެދިވަޑައިގެންފައިވާ މައުލޫމާތުތަކުގެ ތެރޭގައި އަމަލީ ގޮތުން މި ސިސްޓަމްތައް ބޭނުން ކުރެވޭ ގޮތް ހެދުމަށް މިހާތަނަށް ކުރެވިފައިވާ މަސައްކަތްތަކާއި، ސިސްޓަމްތައް އާންމު ބޭނުންތަކަށް ހުޅުވާނުލާ ދިގު މުއްދަތެއް ހޭދަވުމުން ގެއްލުނު އޮޕޮޗުނިޓީ ކޯސްޓަށް ޒިންމާވާނީ ދައުލަތުގެ ކޮން މުއައްސަސާއަކުން ކަމާއި މި ސިސްޓަމްތައް އަލުން ބޭނުންކުރަން ފަށަން ގަސްދުކުރޭތޯ ސާފުކޮށްދިނުމަށް އެދިވަޑައިގެންފައިވެ އެވެ.
އަދި ކުރާނަމަ އެކަން ކުރާނެ ގޮތްތަކާއި ތާރީޚުތައް ސާފުކޮށްދެއްވުމަށް ވެސް މެންބަރު ކުޑޫ އެޗްޑީސީގެ މެނޭޖިންގ ޑިރެކްޓަރަށް ފޮނުއްވި ސިޓީގައި އެދިވަޑައިގެންފައިވެ އެވެ.
